ROMA PEU INTAT HABA
PEU INTAT HABA
Surat Paulus Keu Jeumaáh di Roma teutuléh keu teupeusiab awaknyan keuhai kunjongan gobnyan ubak awaknyan. Meunurot reuncana, Paulus teuma geumubuet sikeujab lamkawan ureuëng Kristen nyang na disinan, óh lheueh nyan, ngon jibantu lé awaknyan, gobnyan na niet keuneuk jak u Seupanyol. Paulus geutuléh surat nyoe keu geupeugah peungeurtian gobnyan keuhai agama Kristen dan tuntotan-tuntotan jih nyan nyang praktis keu udeb ureuëng-ureuëng Kristen.
Óh ka lheueh geupeusampoe saleuem gobnyan bak ureuëng-ureuëng lam jeumaáh di Roma, dan geubri tée bak awaknyan keuhai doá gobnyan keu awaknyan, Paulus geupeugah tema surat nyoe: “Ngon Haba Gét nyan Allah geutunyok pakriban cara jih hubongan manusia ngon Po teu Allah jeuet keu gét lom teuma; cara jih na kheueh ngon meuiman ubak Allah, phon awai sampoe akhé” (1:17).
Óh lheueh nyan Paulus geu boh makna tema jih nyan. Banmandum ureuëng – bah kheueh Yahudi meunan cit kon ureuëng Yahudi – peureulée teupeugét hubongan jih ngon Po teu Allah, sabab mandum nyan saban na lam keukuasaan desya. Hubongan manusia ngon Po teu Allah jeuet keu gét lom meunyoe manusia jimeuiman ubak Isa Almaseh. Óh lheueh nyan Paulus geupeugah teuma keuhai manusia udeb barô nyang jirasa lé manusia meunyoe jihnyan meusaboh ngon Almaseh. Udeb barô nyan timoh sabab na hubongan nyang barô ngon Po teu Allah. Ureuëng nyang ka peucaya ubak Isa, udeb jih damé ngon Po teu Allah, dan Roh Allah geupeubeubaih awaknyan nibak keukuasaan desya dan maté. Lam pasai 5–8 Paulus geupeugah teuma tujuan Huköm-huköm Allah dan kuasa Roh Allah lam udeb ureuëng meuiman. Óh lheueh nyan Paulus geupeugah teuma keuhai ureuëng Yahudi dan bukon Yahudi jitamong lam reuncana Po teu Allah keu umat manusia. Paulus geucok keusimpolan bahwa hana jiteurimong Isa lé ureuëng Yahudi ka jitamong lam reuncana Allah keu teutulông manusia nyang dasai jih nibak rahmat Gobnyan rot Isa Almaseh. Paulus yakén bahwa ureuëng Yahudi hana sabe jitulak Isa. Óh lheueh nyan Paulus geutuléh pakriban manusia harôh udeb sibagoe ureuëng Kristen, nyang paleng phon keuhai praktek ureuëng nyan keuhai geunaséh lam hubongan jih ngon ureuëng laén. Keu nyan Paulus geupiléh pokok-pokok lagée nyang teupeugah nyoe: teulayani Allah, keuwajéban ureuëng Kristen teuhadab neugahra dan seusamoe ureuëng Kristen, dan mubagoe peusoalan nyang teusangkot até nurani. Paulus geutôb surat geuhnyoe ngon peusan-peusan pribadi dan puja ngon pujoe ubak Allah.
Asoe jih
Haba phon dan tema 1:1-17
keubutuhan manusia ubak keuseulamatan 1:18–3:20
Jalan keuseulamatan nibak Po teu Allah 3:21–4:25
Udeb barô sabab meusaboh ngon Isa 5:1–8:39
Israel lam reuncana Allah 9:1–11:36
Pi-e Kristen 12:1–15:13
Peunutôb dan saleuem pribadi 15:14–16:27
S'ha seleccionat:
ROMA PEU INTAT HABA: LAIACE
Subratllat
Comparteix
Compara
Copia
Vols que els teus subratllats es desin a tots els teus dispositius? Registra't o inicia sessió
Old and New Testament in Today's Aceh Language @ LAI, 1997.