मरकुस 1
1
यूहन्ना बपतिस्मा देणे औल़े रा प्रचार
(मत्ती 3:1-12; लूका 3:1-18; यूहन्ना 1:19-28)
1ये यीशु मसीह रे बारे च खुशखबरिया री शुरुआत इ, सै जे परमेशरा रा पुत्र आ। 2तियां जे यशायाह भविष्यवक्ते कताबा च, परमेशरे अपणे पुत्र मसीह जो गलाया भई :
“देख, हऊँ अपणा सनेहा देणे औणे जो तेरते पैहले भेज्यारां,
सै माहणुआं जो तेरा स्वागत करने खातर त्यार करगा।#1:2 मत्ती 11:10, मला. 3:1
3सुनसान जगह च इक माहणु हाक पांदा हुआ सुणया राँ भई
प्रभुये रा स्वागत करने खातर अप्पूँजो त्यार करा।”#1:3 यशा. 40:3
4यशायाह भविष्यवक्ते जिस सनेहा देणे औल़े माहणुये रे बारे च लिखया था ये सै यूहन्ना था, तिसजो जे लोक बपतिस्मा देणे औल़ा बोलां थे। सै जे सुनसान जगह च बपतिस्मा देआं, कने लोकां जो ये प्रचार कराँ था भई “अपणे पापी स्वाभावा जो बदला कने मांह तुहांजो बपतिस्मा देणा, तां परमेशरा तुहांरे पाप माफ करने।” 5यहूदिया प्रदेशा ते कने यरूशलेम नगरा ते बौहत लोक निकल़ीने यूहन्ने लौ गये, कने अपणे पापां जो मन्नीने यरदन नदिया च तिसते बपतिस्मा लेआ।
6यूहन्ना ऊँटा रिया ऊन्ना रे बणीरे कपड़े पैहनां था कने अपणे लक्का पर चमड़े री पेट्टी बन्ही रक्खां था। सै टिट्टे कने जंगली शैहत खां था।#1:6 2 राजा. 1:8, मत्ती 3:4 7कने ये प्रचार कराँ था, भई “मेरते बाद प्रचार करने जो सै औणे औल़ा सै जे माहते जादा सामर्थी आ; कने हऊँ तिसरे मुकावले किछ बी नींआ, हऊँ इक्की सेवका रा सब्बीं ते छोट्टा काम्म तिस खातर करना चाऊँ, तां तिस बी लायक नींआ। 8हऊँ तुहांजो पाणिये ने बपतिस्मा देआं पर तिस तुहांजो पवित्र आत्मा सौगी बपतिस्मा देणा।”
यीशुये रा बपतिस्मा कने परख
(मत्ती 3:13; 4:11; लूका 3:21,22; 4:1-13)
9तिस वगत ताहली जे यूहन्ना प्रचार करीराँ था, यीशुये गलील प्रदेशा रे नासरत नगरा ते आईने, यरदन नदिया च यूहन्ना ते बपतिस्मा लैया। 10ताहली जे यीशु पाणिये चते निकल़ीने बाहर आया, तां इकदम तिसजो स्वर्ग खुल्हीरा दुस्या कने तिस पर कबूतरा रे रुपा च पवित्र आत्मा उतरया। 11कने परमेशरे स्वर्गा ते यीशुये जो गलाया भई, “तू मेरा प्यारा पुत्र आ, तेरते हऊँ बड़ा प्रसन्न आ।” 12फेरी यीशुये रे वपतिस्मे ते बाद पवित्र आत्मे इकदम तिसजो सुनसान जगह च भेज्या। 13कने तिसा जगह च चाल़ियां दिनां तक शैताने तिसरी परीक्षा कित्ती; कने सै जंगली जानबराँ रे बिच रैया; कने स्वर्गदूत तिसरी सेवा करदे रै।
यीशुये रे सेवा रे कम्मां री शुरुआत
(मत्ती 4:12-17; लूका 4:14,15)
14किछ वगता ते बाद राजा हरोदेशे यूहन्ने जो पकड़ीने जेल्ला च पाया, इसते बाद यीशु गलील प्रदेशा च आया तित्थी तिने परमेशरा रिया खुशखबरिया रा प्रचार कित्या, 15कने तिने गलाया, “हुण बगत आईग्या ताहली जे परमेशरा अपणयां लोकां पर राज करना; इस खातर अपणे पापी स्वभावा जो छड्डा कने खुशखबरिया पर विश्वास करा।”
मच्छुआरयां रा सद्दया जाणा
(मत्ती 4:18-22; लूका 5:1-11)
16गलील समुद्रा रे कनारे-कनारे जान्दे हुये, तिने शमौन कने तिसरे भाई अन्द्रियासा जो समुद्रा च जाल़ पान्दे देख्या; काँह्भई सै मच्छुआरे थे। 17यीशुये तिन्हांने गलाया, “मेरे सौगी औआ; तियां जे तुहें मच्छियां जो कठेराँ थे, मांह तुहांजो सखाणा भई लोकां जो मेरा चेला बणने खातर कियां कठेरना।” 18सै इकदम मच्छियां पकड़ने रे तिस कम्मा जो छड्डिने तिसने सौगी चलीपे।
19ताहली जे यीशु थोड़ा जेआ अग्गे गया, तां तिने जब्दिये रे बड्डे पुत्र याकूब, कने तिसरे छोट्टे भाई यूहन्ने जो, किश्तिया पर जाल़ां जो सधेरदे देख्या। 20यीशुये तिन्हांजो इकदम सद्दया; कने सै अपणे पिता जब्दिये जो मजदूराँ ने सौगी किश्तिया पर छड्डिने, तिसने सौगी चलीगे।
बुरीआत्मा रे सताईरे माहणुये जो चंगा करना
(लूका 4:31-37)
21यीशु कने तिसरे चेले कफरनहूम नगरा च आये, कने सै इकदम विस्राम रे दिन, यहूदी सभा घरा च जाईने उपदेश देणे लगया। 22कने लोक तिसरे उपदेशा ते हैरान हुईगे; काँह्भई सै तिन्हांजो व्यवस्था रे सखाणे औल़यां साई नीं, पर अपणे अधिकारा ने सखां था। 23ताहली जे यीशु शिक्षा देई ही कराँ था, तां अचानक तिन्हांरे यहूदी सभा घरा च इक माहणु आया, तिसच जे इक बुरीआत्मा थी। 24तिने चिल्लाई ने गलाया, “हे यीशु नासरी, अहांजो तेरते क्या काम्म आ? क्या तू अहांरा नाश करने आईरा? हऊँ तिज्जो जाणाँ, भई तू कुण आ, तू परमेशरा रा पवित्र पुत्र आ!” 25यीशुये तिस्सो थिड़की ने गलाया, “चुप रै! कने तिस चते निकल़ी जा।” 26फेरी बुरीआत्मा तिस्सो मरोड़ीने, कने बड़े जोरा ने रड़ांदे हुये तिस चते निकल़ीगी। 27येढ़ा देखीने यहूदी सभा घरा रे लोक बड़े हैरान हुये कने अप्पूँ चियें गलाणे लगे, “ये क्या गल्ल इ? ये कोई नौआं उपदेश आ! ये तां अधिकारा ने बुरीआत्मां जो बी हुक्म देआं, कने सै तिसरे हुक्मां जो मन्नां ये।” 28कने तिसरा नौं इकदम गलील परदेशा रे आसे-पासे रे सारे लाकयां च फैल्लीग्या।
मते सारे बमाराँ जो ठीक करना
(मत्ती 8:14-17; लूका 4:38-41)
29यीशु इकदम याकूब कने यूहन्ने सौगी यहूदी सभा घरा ते निकल़ीने शमौन कने अन्द्रियासा रे घरें गया। 30कने शमौना रिया सस्सा जो बौहत बुखार आईरा था, तिन्हें इकदम तिसारे बारे च यीशुये जो गलाया। 31तां यीशुये तिसारे नजदीक जाईने तिसारा हात्थ पकड़ीने तिसाजो ठुआलया; तां तिसारा बुखार उतरीग्या। कने सै तिन्हांरी सेवा-टैहल करने लगी। 32दिन घरने ते बाद संझा रे वगत किछ लोक येढ़यां लोकां जो यीशुये ले ल्याये सै जे बमार थे, कने तिन्हां च जे बुरीआत्मां थिआं। 33कने तिस नगरा रे मते सारे लोक दरवाजे रे सामणे कट्ठे हुईगरे थे। 34तिने बौहत लोकां जो सै जे कईयां बमारियां ते दुखी थे, ठीक कित्या, कने कई सारी बुरीआत्मां जो कड्डया; कने बुरीआत्मां जो बोलणे नीं दित्या, काँह्भई सै जाणा थिआं, भई यीशु परमेशरा रिया तरफा ते आईरा।
सुनसान जगह च यीशुये रा प्राथना करना
(लूका 4:42-44)
35सवेरे तड़के इ, ताहली जे हल्तियें अन्धेरा इ था, यीशु उट्ठीने घरा ते बाहर निकल़या, कने गाँवां ते दूर सुनसान जगह च जाईने प्राथना करने लगया। 36फेरी शमौन कने तिसरे साथी तिसरिया खोज्जा च गये। 37ताहली जे तिन्हांजो यीशु मिलीग्या, तां तिन्हें बोल्या, भई “गाँवां रे बौहत सारे लोक तिज्जो टोल़या रायें।” 38यीशुये तिन्हांजो गलाया, “औआ; अहांजो नेड़े-तेड़े रे नगराँ च जाणा चाहिन्दा, काँह्भई हऊँ संसारा च इसा इ वजह ते आईरा भई लोकां रे बिच खुशखबरिया रा प्रचार करूँ।” 39कने तिने गलील प्रदेशा रे बौहत सारयां लाकयां च कने तिन्हांरे यहूदी सभा घराँ च जाईने प्रचार कित्या कने बुरीआत्मां जो कड्डया।
कोढ़ा रे रोगिये जो चंगा करना
(मत्ती 8:1-4; लूका 5:12-16)
40इक कोढ़ी माहणुये तिसले आईने, तिसरे सामणे घुटने टेक्कीने तिसने विनती कित्ती, “जे तुहें चाओ तां मेहरवानी करीने मिन्जो इस रोगा ते ठीक करा।” 41यीशुये तिस पर दया करीने हात्थ रख्या, कने तिस्सो छुईने गलाया, “हऊँ चाँह भई तू ठीक हुई जाओ।” 42कने इकदम सै तिस रोगा ते ठीक हुईग्या। 43फेरी यीशुये तिस्सो ये चेतावनी देईने भेजित्या, 44कने तिस माहणुये ने गलाया, “देख, किसी ने इस बारे च किछ बी देहां बोल्दा, पर यरूशलेम जाईने अप्पूँजो याजका ले दास्स, कने अपणे ठीक हुणे रे बारे च सै जे किछ मूसे ठैहराईरा तिसजो भेंट चढ़ा, ताकि लोकां जो पता लगी जो भई तू रोगा ते ठीक हुईग्या।”#1:44 लैव्य. 14:1-32 45तिसते बाद तिने सब्बीं लोकां जो दस्सीत्या भई यीशुये कियाँ तिस्सो रोगा ते ठीक कित्या, इस खातर यीशु लोकां रे सामणे गाँवां च नीं जाई सक्कया। तां सै गाँवां ते बाहर सुनसान जगह च रैहणे लगया, पर लोक तिस इलाके रे चऊँ पासयां ते तिसला जो औंदे रै।
S'ha seleccionat:
मरकुस 1: KFSNT
Subratllat
Comparteix
Compara
Copia
Vols que els teus subratllats es desin a tots els teus dispositius? Registra't o inicia sessió
This work is licensed under Creative Commons Attribution-ShareAlike 4.0 License.