मत्ती 16
16
यहूदी नेतयां री चाल
(मरकुस 8:11-13; लूका 12:54-56)
1फेरी फरीसी कने सदूकी यीशुये ले आये, सै तिस्सो परखणा चाँह थे इस खातर तिन्हे तिसजो कोई स्वर्गीय नशाण दसणे जो बोल्या ताकि पता लगी सक्को भई तिस्सो परमेशरे भेज्जिरा। 2तिने तिन्हांजो जबाब दित्या, “सूरज छपणे पर तुहें लोक बोलां ये, आज मौसम ठीक रैहणा, काँह्भई अम्बरा लाल आ, 3कने सूरज उगणे पर तुहें बोलां ये, ‘आज तूफान औणा, काँह्भई अकाश धुंधला कने लाल आ।’ तुहें अम्बरा रे लक्षणां जो पढ़ना जाणाँ ये, पर अपणे बगता रे लक्षणां जो नीं पढ़ी सकदे। 4इस जुगा रे दुष्ट लोको तुहें नशाण देखणा चाँये, पर तुहांजो सिवाय योना रे नशाणा ते कोई होर दुज्जा नशाण नीं दस्या जाणा।” फेरी सै तिन्हांजो छड्डिने चलिग्या।
यीशुये री चेतावनी
(मरकुस 8:14-21)
5यीशुये रे चेले दरयावा रे पार चलीगे, पर सै रोटी लेणा भुल्ली गरे थे। 6यीशुये तिन्हाने गलाया, “देक्खा, फरीसियां कने सदूकियां रे मलेड़े ते कने तिन्हांरे अविश्वासा कने झुट्ठिया शिक्षा ते बचीने रौआ।” 7सै अप्पूँ चियें बचार करदे हुये गलाणे लगे, “हुई सक्कां तिने ये इस खातर बोल्या काँह्भई अहें रोटी सौगी नीं ल्याये।” 8सै क्या सोच्ची रायें, यीशु ये जाणाँ था, इस खातर तिने बोल्या, “अरे कमजोर विश्वासियो, तुहें अप्पूँ चियें कजो सोच्ची रायें भई अहांले रोटी नीं? 9क्या तुहें हुण बी नीं समझदे? क्या तुहांजो पांज्ज हजार लोकां खातर पांज्ज रोटियां याद नीं, कने ये बी याद निआं भई कितणियां टोकरियां भरी ने तुहें चक्कियां थी? 10कने क्या तुहांजो चऊँ हजाराँ लोकां रे खातर सात्त रोटियां, कने फेरी कितणी टोकरियां भरी ने तुहें चक्की थीं याद निआं? 11तुहें काँह नीं समझदे भई मैं तुहांजो रोटियां रे बारे च नीं गलाया? पर मैं त तुहांजो फरीसियां कने सदूकियां रे धोखे ते चौकन्ना रैहणे जो गलाया था सै जे मलेड़े साई आ।” 12फेरी सै समझीगे भई रोटिया रे मलेड़े ते नीं, पर तिसरा मतलब फरीसियां कने सदूकियां री गल़त शिक्षां ते बचीने रैहणे तेआ।
पतरसा रा यीशुये जो मसीह स्वीकारना
(मरकुस 8:27-30; लूका 9:18-21)
13ताहली जे यीशु कैसरिया फिलिप्पी रे प्रदेशा च आया, तां तिने अपणे चेलयां ते पुच्छया, “लोक क्या बोल्लां ये भई हऊँ माहणुये रा पुत्र कुण आ?” 14तिन्हे बोल्या, “किछ बोलां ये भई तू बपतिस्मा देणे औल़ा यूहन्ना, कने किछ बोलां ये भई तू एलिय्याह कने किछ होर बोलां ये भई तू यिर्मयाह या भविष्यवक्तयां चते कोई इक आ।” 15यीशुये तिन्हाने बोल्या, “कने मेरे बारे च तुहांरा क्या बचार आ भई हऊँ कुण आ?” 16शमौन पतरसे जबाब दित्या, “तू मसीह आ, साक्षात परमेशरा रा पुत्र।” 17यीशुये तिस्सो जबाब दित्या, योना रे पुत्र, शमौन, परमेशर आशीष देओ तिज्जो, काँह्भई माहणुये नीं, पर स्वर्गा च रैहणे औल़े मेरे पिता, तूह पर जाहिर किति। 18हऊँ बोलां भई तू पतरस आ, कने तू माह च विश्वास करने औल़यां निऊँ हूणा, तियां जे भई इक बड्डी चट्टान किसी घरा री निऊँ हुआं इ; कने तिस पर मौती रा कोई जोर नीं चलना। 19मांह तुहौं मेरयां लोकां पर राज करने खातर परमेशरा ते अधिकार दिलाणा ताकि जो किछ तुहें धरतिया पर लोकां जो करने री अनुमति नीं देंगे तिस्सो करने री परमेशरा बी अनुमति नीं देणी, कने जो किछ तुहें धरतिया पर लोकां जो करने री अनुमति देंगे तिस्सो परमेशरा बी करने री अनुमति देणी। 20फेरी तिने अपणे चेलयां जो शख्त हिदायत दित्ति भई “किसी जो येनी दस्यों भई हऊँ मसीह आ।”
यीशुये रे जरिये अपणिया मौती री भविष्यवाणी
(मरकुस 8:31-33; लूका 9:22)
21तिस बगत यीशु अपणे चेलयां जो दसणे लगया, भई “मिन्जो यरूशलेम जाणा चाहिन्दा कने तित्थी यहूदी शास्त्रियां, बजुर्ग यहूदी नेतयां, कने मुखियायाजकां रे जरिये बड़ा दुख सहीने; मारया जाऊँ; फेरी तिज्जे दिन मूईरयां चा ते माह जिऊंदे हुई जाणा।” 22फेरी पतरस तिस्सो इक्की बक्खा लेईग्या कने गुस्सा हुईने बोलणे लगया, “प्रभु, परमेशर तू पर दया करो भई तूहने येढ़ा कदीं नीं ओ!” 23यीशु तिसरी तरफ मुड़या कने गलाया, “पतरस, मेरे रस्ते ते हटि जा! अरे शैतान! तू मेरे खातर इक अड़चन ई: काँह्भई तू परमेशरा साई नीं, पर माहणुआं साई सोच्चां।”
यीशुये रे पिच्छे चलने रा मतलब
(मरकुस 8:31; 9:1; लूका 9:22-27)
24फेरी यीशुये अपणे चेलयां ने बोल्या, “सै जे कोई मेरा चेला बणना चाओ, सै खुद अपणा इन्कार करो कने अपणा क्रूस चक्कीने मेरे पिछे आई जाओ। 25सै जे कोई अपणा प्राण बचाणा चाँह, तिस सै पक्का गवाई देणा; पर सै जे कोई मेरे खातर अपणी जान गवांगा, तिस सदा जिऊंदा रैहणा। 26जे माहणु इस संसारा जो जित्ति लो कने अनन्त जीवन नीं पाओ, तां तिस्सो क्या फैदा? सच्चीजो, माहणु अनन्त जीवन पाणे रे खातर क्या देई सक्कां? 27माहणुये रा पुत्र स्वर्गदूतां सौगी अपणे पिता रिया महिमा च औणे औल़ा, तिसजे हर किसी जो तिसरे कर्मां रे मुतावक ईनाम देणा। 28हऊँ तुहांजो बोलां भई येत्थी किछ येढ़े तिन्हां तदुआं तक नीं मरना, तदुआं तक जे माहणुये रे पुत्रा जो तिसरे राज्जा च औन्दे हुये नीं देक्खी लो।”
S'ha seleccionat:
मत्ती 16: KFSNT
Subratllat
Comparteix
Compara
Copia
Vols que els teus subratllats es desin a tots els teus dispositius? Registra't o inicia sessió
This work is licensed under Creative Commons Attribution-ShareAlike 4.0 License.