यूहन्ना 10
10
पुहाल ते भैड्डां केरि मिसाल
1अवं तुसन सेइं सच़-सच़ ज़ोताईं, “कि ज़ै कोई दारेरे बत्तां बाड़े मां न गाए, पन होरि बत्तां गाते, तै च़ोर ते डैकूए। 2पन भैड्डां केरो पुहाल दारेरे बत्तां गाते। 3तैसेरेलेइ दरबान दार खोलते, ते भैड्डां तैसेरी गल पिशैनतिन, ते तै अपनि भैड्डन नंव्वे सेइं कुजाते ते बेइर नेते। 4ते ज़ैखन तै अपनि सैरी भैड्डां बेइर कढते, त तैन केरे अग्री-अग्री च़लते, ते भैड्डां तैस पत्ती-पत्ती गैतिन, किजोकि तैना तैसेरी आवाज़ पिशैनचन। 5तैना बखले पत्ती न गैली, पन तैस करां नश्शेली, किजोकि तैना बखलेरी आवाज़ न पिशानन।” 6यीशुए तैन सेइं मिसाल देइतां ज़ोवं, पन तैनेईं न समझ़ू कि एसेरी गल्लां केरो कुन मतलबे, ज़ैना तै असन सेइं ज़ोते।
7तैखन यीशुए तैन सेइं फिरी ज़ोवं, “अवं तुसन सेइं सच़-सच़ ज़ोताईं, भैड्डां केरू दार अव्वें आईं। 8ज़ेत्रे मीं करां पेइले आए सब च़ोर ते डैकून, पन मेरी भैड्डेईं तैन केरि न शुनी। 9दार अवं आईं, अगर कोई मेरे ज़िरिये अन्तर गालो, त परमेशर तैस मुक्ति देलो, ते तै अन्तर बेइर एइतो गालो ते खूराक पालो। 10च़ोर होरि कोन्ची कम्मेरे लेई न एज्जे, बल्के च़ोरी केरने ते मारने ते नाश केरने एइते, अवं एल्हेरेलेइ एवरोईं कि तैन भरपूर ज़िन्दगी ज़ीन। 11रोड़ो पुहाल अव्वें आईं, रोड़ो पुहाल भैड्डां केरे लेई अपनि जान देते। 12ज़ैखन नौकर गिद एंइतू लाते त तै भैड्डां शैरतां नेश्शी गालो। किजोकि तै तैन केरो न पुहाले न मालिके, ते गिद तैन पुड़ हमलो केरतां तितर-बितर केरते। 13तै एल्हेरेलेइ नशते कि तै नौकरे, ते तैस भैड्डां केरि फिक्र नईं। 14रोड़ो पुहाल अवं आईं, अवं अपनि भैड्डां पिशानताईं, ते मेरी भैड्डां मीं पिशैनचन। 15ज़ेन्च़रे बाजी मीं ज़ानते, तेन्च़रे अवं भी तैस ज़ानताईं, ते अवं भैड्डां केरे लेई अपनि जान देताईं। 16ते मेरी होरि भी भैड्डन, ज़ैना इस बाड़े मां नईं, मीं तैना भी ऐनिन ज़रूरिन, तैना मेरी आवाज़ पिशैनेली, फिरी अक्के डेरो ते अक्के पुहाल भोनोए। 17अवं अपनि जान देताईं, एल्हेरेलेइ बाजी मीं सेइं प्यार केरते, कि अवं फिरी ज़ींतो भोईं। 18कोई मेरी ज़िन्दगी मीं करां न थसोड़े, बल्के अवं एप्पू देताईं, मीं तैस देनेरो भी अधिकारे ते नेनेरो भी अधिकारे, ई हुक्म मीं मेरे बाजी करां मैल्होरोए।” 19एल्लां पत्ती, यहूदन मां फिरी अनबन भोइ। 20तैन मरां बड़े ज़ोने लगे, “तैस मां भूते, ते तै पागले, तैसेरी किजो शुन्तथ?” 21होरे लोकेईं ज़ोवं, “एना गल्लां एरे मैन्हेरी नईं ज़ैस मां भूत भोए, कुन भूत कांना केरि एछ़्छ़ी खोल्ली बटते?”
यहूदी केरो अविश्वास
22यरूशलेम नगरे मां तिहार भोवं, ते हीवतड़ेरो मौसम थियो। 23यीशु सुलैमानेरे मन्दरेरे अंगने मां हंठने फिरने लग्गोरो थियो। 24तैखन यहूदेईं तै घेरो ते पुछ़ू, “तू केइस तगर इश्शे दिले डामाडोल केरतस? असन सेइं साफ-साफ ज़ो। कुन तू मसीह आस?” 25यीशुए तैन जुवाब दित्तो, “मीं तुसन सेइं ज़ोवं पन तुस विश्वास न केरथ। ज़ैना कम्मां अवं अपने बाजी केरे अधिकारे सेइं केरताईं तैना मेरे गवाह आन। 26पन तुस एल्हेरेलेइ विश्वास न केरथ कि मेरी भैड्डन मरां नईं। 27मेरी भैड्डां मेरी आवाज़ पिशैनचन, अवं तैन ज़ानताईं, ते तैना मीं पत्ती-पत्ती च़ेलचन। 28ते अवं तैन हमेशारी ज़िन्दगी देताईं, तैना कधी नाश न भोल्हे, ते कोई तैन मेरे हथ्थे मरां न थसोड़ी सके। 29मेरो बाजी, ज़ैनी तैना मीं दित्तोरिन, सेब्भन करां महान आहे, ते कोई तैन बाजी केरे हथ्थे मरां न नेइ बटे। 30अवं त बाजी अक्के आम।”
31दुबारां फिरी, यहूदेईं तैस घोड़ेव देनेरे लेई फिरी घोड़ सल्ले। 32एस पुड़ यीशुए तैन सेइं ज़ोवं, “मीं अपने बाजी केरे तरफां बड़ां रोड़ां कम्मां हिरां, तैन मरां कोस कम्मेरे लेई घोड़ेव देतथ?” 33यहूदेईं तैस जुवाब दित्तो, “रोड़ां कम्मां केरे लेई अस तीं पुड़ घोड़ेव नईं केरने लेवरे, पन परमेशरेरी तुहीन केरनेरे लेई, एल्हेरेलेइ कि मैन्हु भोइतां अपनो आप परमेशर बनातस।” 34यीशुए तैन जुवाब दित्तो, “मूसेरे कानूने मां एन लिखोरू कि परमेशरे अपने लोकां केरे लीडरन सेइं ज़ोवं कि तैना ईश्वरन। 35(तुसन पत्तोए पवित्रशास्त्रेरी गल कोई भी बेदली न बटे) अगर परमेशरे तैन लोकन जो ईश्वर ज़ोवं ज़ैन कां परमेशरेरू वचन पुज़्ज़ू, 36फिरी तुस किजो ज़ोतथ कि तू तुहीन केरतस, ज़ैखन अवं ज़ोताईं कि अवं परमेशरेरू मट्ठू आईं? बाजी परमेशरे अवं पवित्र ठहरेइतां दुनियाई मां भेज़ो। 37अगर अवं अपने बाजेरू कम न केरि, त मेरो विश्वास न केरा। 38पन अगर अवं अपने बाजेरू कम केरताईं, त चाए तुस मेरो विश्वास न भी केरा, पन तैन कम्मन पुड़ विश्वास केरा। तैखन तुस बुझ़ेले ते समझ़ेले कि बाजी मीं मां आए, ते अवं बाजी मां आईं। 39तैनेईं फिरी तैस ट्लानेरी कोशिश की, पन तै तैन करां च़लो जेव।”
40फिरी यीशु यरदन दरियारे पार तैस ठैरी जेव, ज़ैड़ी यूहन्ना पेइलो बपतिस्मो देतो थियो, ते तैड़ी राव। 41बड़े लोक तैस कां एइतां ज़ोते थिये, “यूहन्ना त कोई चमत्कारी निशान न हिराव, पन ज़ैन किछ यूहन्ना एसेरे बारे मां ज़ोवं, तैन सब सच़ थियूं।” 42ते तैड़ी बड़े लोकेईं यीशु पुड़ विश्वास कियो।
S'ha seleccionat:
यूहन्ना 10: BHDNT
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Bhadrawahi Bible (भड्लाई बाइबिल), 2020 by Beyond Translation is licensed under a Creative Commons Attribution-ShareAlike 4.0 International License.