भजन संहिता 79
79
इस्राएल के छुटकारै खात्तर प्रार्थना
आसाप का भजन
1हे परमेसवर गैर जात तेरी अपणी विरासत म्ह घुस आई;
उननै तेरे पवित्र मन्दर ताहीं अशुद्ध कर दिया;
अर यरुशलेम ताहीं खण्डहर कर दिया सै।
2उननै तेरे दास्सां की लाशां ताहीं अकास के पंछियाँ का खाणा बणा दिया,
अर तेरे भक्तां का माँस धरती के बण पशुआं तै खुआ दिया सै।
3उननै उनका खून यरुशलेम के च्यांरु ओड़ पाणी की तरियां बहाया,
अर उननै माट्टी देण आळा कोए न्ही था।
4पड़ोसियाँ कै बीच म्हारी बदनामी होई;
च्यांरु ओड़ के रहण आळे म्हारे पै हास्सै, अर मजाक करै सै।
5हे यहोवा, तू कद तक लगातार छो करदा रहवैगा?
तेरे म्ह आग के जिसी जळण कद तक भड़कदी रहवैगी?
6जो जात तन्नै न्ही जाणदी,
अर जिस राज्य के लोग तेरे तै प्रार्थना न्ही करदे,
उन्हे पै अपणी सारी जळजळाहट भड़का!
7क्यूँके उननै याकूब ताहीं निगळ लिया,
अर उसके वासस्थान ताहीं उजाड़ दिया सै।
8म्हारे नुकसान खात्तर म्हारे बुजुर्गां के अधर्म के काम्मां नै याद ना करै;
तेरी दया म्हारे पै तावळ करकै हो, क्यूँके हम बड़ी दुर्दशा म्ह पड़े सां।
9हे म्हारे उद्धारकर्त्ता परमेसवर, अपणे नाम की महिमा खात्तर म्हारी मदद कर;
अर अपणे नाम कै खात्तर म्हारे ताहीं छुड़ाकै म्हारे पापां नै ढक दे।
10गैर जात क्यूँ कहण पावै के उनका परमेसवर कड़ै गया?
तेरे दासों के खून का बदला गैरजात्तां तै म्हारे देखदे लिया जावै।
11बन्दियाँ का कराहणा तेरे कान्नां तक पोहचै;
नाश होण आळयां ताहीं अपणे बाजुआं के जोर तै बचा।
12हे प्रभु, म्हारे पड़ोसियाँ नै जो तेरी निन्दा करी सै,
उसका सातगुणा बदला उननै दे!
13फेर हम जो तेरी प्रजा अर तेरी चराई की भेड़ सां,
तेरा धन्यवाद सदा करदे रहवांगें;
अर पीढ़ी तै पीढ़ी तक तेरा गुणगान करदे रहवांगें।
S'ha seleccionat:
भजन संहिता 79: BGC
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Haryanvi Bible (हरियाणवी), by Beyond Translation is licensed under Creative Commons Attribution-ShareAlike 4.0 License.