भजन संहिता 26
26
एक खरे माणस की प्रार्थना
दाऊद का भजन
1हे यहोवा मेरा न्याय कर,
क्यूँके मै खराई तै चाल्दा रह्या सूं,
अर मेरा भरोस्सा यहोवा पै अटल बण्या सै।
2हे यहोवा, मन्नै जाँच अर परख;
मेरे मन अर दिल नै परख।
3क्यूँके तेरी करुणा तो मेरी आँखां कै स्याम्ही सै,
अर मै तेरे सच की राह पै चाल्दा रह्या सूं।
4मै निकम्मी चाल-चाल्लण आळयां कै गैल न्ही बैठ्या,
अर ना मै कपटियाँ कै गैल किते जाऊँगा;
5मै कुकर्मिया की संगति तै घृणा राक्खूँ सूं,
अर दुष्टां कै गैल न्ही बैठूँगा।
6मै अपणे हाथ्थां नै निर्दोषता के पाणी तै धोऊँगा,
हे यहोवा, फेर मै तेरी वेदी के चक्कर लगाऊँगा,
7ताके तेरा धन्यवाद ऊँच्ची आवाज तै करुँ,
अर तेरे सारे अचम्भे काम्मां का जिक्र करुँ।
8हे यहोवा, मै तेरे धाम तै
तेरी महिमा के रहण आळी जगहां तै प्रीति राक्खूँ सूं।
9मेरे प्राण नै पापियाँ कै गैल,
अर मेरे जीवन नै हत्यारां कै गैल ना मिला।
10वे तो ओच्छेपण करण म्ह लाग्गे रहवै सै,
अर उनका सोळा हाथ रिसवत तै भरया रहवै सै।
11पर मै तो खराई तै चाल्दा रहूँगा।
तू मन्नै छुड़ाले, अर मेरे पै अनुग्रह कर।
12मेरे पैर चौरस जगहां म्ह टिके सै;
हर सभा म्ह मै यहोवा नै धन्य कह्या करुँगा।
S'ha seleccionat:
भजन संहिता 26: BGC
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Haryanvi Bible (हरियाणवी), by Beyond Translation is licensed under Creative Commons Attribution-ShareAlike 4.0 License.