यहो. 22
22
पूर्वी गोत्रां का अपणी भूमि म्ह बोहड़ना
1उस बखत यहोशू नै रूबेनियाँ, गादियाँ, अर मनश्शे के आध्धे गोत्रियाँ ताहीं बुलवाकै कह्या, 2“जो-जो हुकम यहोवा के दास मूसा नै थारे ताहीं दिए थे वे सारे थमनै मान्ने सैं, अर जो-जो हुकम मन्नै थारे तै दिए सैं उन सारया ताहीं भी थमनै मान्या सै; 3थमनै अपणे भाईयाँ ताहीं इतणे दिनां म्ह आज कै दिन ताहीं न्ही छोड्या, पर अपणे परमेसवर यहोवा के हुकम थमनै चौकसी तै मान्ने सै। 4अर इब थारे परमेसवर यहोवा नै थारे भाईयाँ ताहीं अपणे वचन कै मुताबिक आराम दिया सै; इस करकै इब थम बोहड़कै अपणे-अपणे डेरयां म्ह, अर अपणी-अपणी धरती म्ह, जिस ताहीं यहोवा के दास मूसा नै यरदन पार थारे दिया सै चले जाओ। 5सिर्फ इस बात की पूरी चौकसी करियो के जो-जो हुकम अर नियम-कायदे यहोवा के दास मूसा नै थारे ताहीं दिए सै उसनै मानकै अपणे परमेसवर यहोवा तै प्रेम राक्खो, उसके सारे राह पै चाल्लों, उसकै हुकम मान्नो, उसकी भगति म्ह मगन रहो, अर अपणे सारे मन अर सारे प्राण तै उसकी सेवा करो।” 6फेर यहोशू नै उन ताहीं आशीर्वाद देकै विदा करया; अर वे अपणे-अपणे डेरे म्ह चले गए।
7मनश्शे के आध्धे गोत्रियाँ नै मूसा तै बाशान म्ह हिस्सा दिया था; पर दुसरे आध्धे गोत्र ताहीं यहोशू नै उनके भाईयाँ कै बिचाळै यरदन के पश्चिम की ओड़ हिस्सा दिया। उन ताहीं जिब यहोशू नै विदा करया की अपणे-अपणे डेरे म्ह जावै, 8फेर उन ताहीं भी आशीर्वाद देकै कह्या, “घणे से पशु, अर चाँदी, सोन्ना, पीतळ, लोहा, अर घणे से कपड़े अर घणी धन-सम्पत्ति लिए होए अपणे-अपणे डेरे म्ह बोहड़ आओ; अर अपणे बैरियाँ की लूट की सम्पत्ति नै अपणे इस्राएली भाईयाँ कै गैल बाँट लियो।”
9फेर रूबेनी, गादी, अर मनश्शे के आध्धे गोत्र इस्राएलियाँ के धोरै तै, यानिके कनान देश के शीलो नगर तै, अपणी गिलाद नाम के अपणी धरती म्ह, जो मूसा के जरिये दी गई, यहोवा के हुकम कै मुताबिक उनकी अपणी धरती होगी थी, जाण की मनसा तै बोहड़गे।
10अर जिब रूबेनी, गादी, अर मनश्शे के आध्धे गोत्र यरदन नदी की उस तराई म्ह पोहचे जो कनान देश म्ह सै, फेर उननै ओड़ै देखण खात्तर एक बड़ी वेदी बणाई। 11अर इसकी खबर इस्राएलियाँ के सुणण म्ह आई, के रूबेनियाँ, गादियाँ, अर मनश्शे के आध्धे गोत्र आळयां नै कनान देश कै स्याम्ही यरदन की तराई म्ह, यानिके उसके उस पार जो इस्राएलियाँ का सै, एक वेदी बणाई सै। 12जिब इस्राएलियाँ नै यो सुण्या, तब इस्राएलियाँ की सारी मण्डळी उनतै लड़ण खात्तर चढ़ाई करण नै शीलो म्ह कठ्ठी होई।
13फेर इस्राएलियाँ नै रूबेनियाँ, गादियाँ, अर मनश्शे के आध्धे गोत्रियाँ के गैल गिलाद देश म्ह एलीआजर याजक के बेट्टे पीनहास ताहीं, 14अर उसकै गैल दस प्रधानां ताहीं, यानिके इस्राएल के एक-एक गोत्र म्ह तै पूर्वजां के घरान्ने के एक-एक प्रधान ताहीं भेज्या, अर वे इस्राएल के हजारां म्ह अपणे-अपणे पूर्वजां के घरान्ने के खास आदमी थे। 15वे गिलाद देश म्ह रूबेनियाँ, गादियाँ, अर मनश्शे के आध्धे गोत्रियाँ कै धोरै जाकै कहण लाग्गे, 16“यहोवा की सारी मण्डळी न्यू कहवै सै, के ‘थमनै इस्राएल के परमेसवर यहोवा का यो किसा बिश्वासघात करया; आज जो थमनै एक वेदी बणा ली सै, इस म्ह थमनै उसकै पाच्छै चालणा छोड़कै उसकै खिलाफ आज बलवा करया सै? 17सुणो, पोर की पहाड़ी पै होए पाप म्हारे खात्तर किमे कम थे#22:17 कम थे गिन. 25:1-9, जो यहोवा की मण्डळी नै भारी सजा मिली तोभी आज कै दिन ताहीं हम उस अधर्म तै शुद्ध न्ही होए; के वा तेरी नजर म्ह एक छोट्टी बात सै, 18के आज थम यहोवा नै त्याग कै उसकै पाच्छै चालणा छोड़ देओ सो? के थम यहोवा तै फिर जाओ सो, अर कल वो इस्राएल की सारी मण्डळी तै गुस्सा होवैगा। 19पर जै थारी अपणी धरती अशुद्ध हो, तो पार आकै यहोवा की अपणी धरती म्ह, जित्त यहोवा का निवास रहवै सै, हम माणसां कै बीच म्ह अपणी-अपणी धरती कर ल्यो; पर म्हारे परमेसवर यहोवा की वेदी फेर छोड़ और कोए वेदी बणाकै ना तो यहोवा तै बलवा करो, अर ना म्हारे तै। 20देक्खो, जिब जेरह का बेट्टा आकान नै चढ़ाई होई चीज कै बारै म्ह बिश्वासघात करया, फेर के यहोवा का कोप इस्राएल की पूरी मण्डळी पै न्ही भड़क्या? अर उस माणस के अधर्म का प्राणदण्ड एक्ले उस्से नै न्ही मिल्या#22:20 मिल्या यहो. 7:1-26।’”
21तब रूबेनियाँ, गादियाँ, अर मनश्शे के आध्धे गोत्रियाँ ताहीं इस्राएल के हजारां खास आदमियाँ ताहीं यो जवाब दिया, 22“यहोवा जो ईश्वरां का परमेसवर सै, ईश्वरां का परमेसवर यहोवा इसनै जाणै सै, अर इस्राएली भी इसनै जाण लेवैगें, के जै यहोवा तै फिरकै या उसका बिश्वासघात करकै हमनै यो काम करया हो, तो तू आज हमनै मारदे, 23जै आज कै दिन हमनै वेदी ताहीं ज्यांतै बणाया हो के यहोवा कै पाच्छै चालणा छोड़ दें, या ज्यांतै के उसपै होमबलि, अन्नबलि, या मेलबलि चढ़ावां, तो यहोवा आप इसका हिसाब ले; 24पर हमनै इस्से विचार अर मनसा तै यो करया सै के कदे भविष्य म्ह थारी औलाद म्हारी औलाद तै यो ना कहण लाग्गे, ‘थमनै इस्राएल के परमेसवर यहोवा तै के काम? 25क्यूँके, हे रूबेनियों, हे गादियों, यहोवा नै जो म्हारे अर थारे बीच म्ह यरदन म्ह हद ठहरा दी सै, ज्यांतै यहोवा म्ह थारा कोए हिस्सा न्ही सै।’ इसा कहकै थारी औलाद म्हारी औलाद म्ह तै यहोवा का भय छुड़ा देगी। 26ज्यांतै हमनै कह्या, ‘आओ, हम अपणे खात्तर एक वेदी बणा ल्या, वा होमबलि या मेलबलि खात्तर न्ही, 27पर ज्यांतै के म्हारे अर थारे, अर म्हारे बाद म्हारे अर थारे वंश कै बीच म्ह गवाही का काम दे; ज्यांतै के हम होमबलि, मेलबलि, अर बलिदान चढ़ाकै यहोवा के धोरै उसकी उपासना करां; अर भविष्य म्ह थारी औलाद म्हारी औलाद तै यो ना कहण पावै, के यहोवा म्ह थारा कोए हिस्सा न्ही।’ 28ज्यांतै हमनै कह्या, ‘जिब वे माणस भविष्य म्ह म्हारे तै या म्हारे वंश तै न्यू कहण लाग्गे, फेर हम उनतै कहवागें, के यहोवा के वेदी के नमूने पै बणी होई इस वेदी नै देक्खो, जिस ताहीं म्हारे पुरखां नै होमबलि या मेलबलि खात्तर न्ही बणाया; पर ज्यांतै बणाया था के म्हारे अर थारे बीच म्ह गवाही का काम दे।’ 29यो म्हारै तै दूर रहवै के यहोवा तै फिरकै आज उसकै पाच्छै चालणा छोड़ द्या, अर अपणे परमेसवर यहोवा की उस वेदी ताहीं छोड़कै जो उसके निवास कै स्याम्ही तै होमबलि, अर अन्नबलि, या मेलबलि खात्तर दुसरी वेदी बणावै।”
30रूबेनियाँ, गादियाँ, अर मनश्शे के आध्धे गोत्रियाँ की इन बात्तां ताहीं सुणकै पीनहास याजक अर उसकै गैल मण्डळी के प्रधान, जो इस्राएल के हजारां के खास आदमी थे, वे घणे खुश होए। 31अर एलीआजर याजक के बेट्टे पीनहास नै रूबेनियाँ, गादियाँ, अर मनश्शेइयां तै कह्या, “थमनै जो यहोवा का इसा बिश्वासघात न्ही करया, इसतै आज हमनै यो जाण लिया के यहोवा म्हारे बीच म्ह सै: अर थमनै इस्राएलियाँ ताहीं यहोवा के हाथ तै बचाया सै।” 32फेर एलीआजर याजक का बेट्टा पीनहास प्रधानां समेत रूबेनियाँ अर गादियाँ कै गैल गिलाद होन्दे होए कनान देश म्ह इस्राएलियाँ कै धोरै बोहड़ ग्या अर यो घटना उन ताहीं कह सुणाई। 33फेर इस्राएली खुश होए; अर परमेसवर तै धन्य कह्या, अर रूबेनियाँ अर गादियाँ तै लड़ण अर उनके रहण का देश उजाड़ण खात्तर चढ़ाई करण की चर्चा फेर न्ही करी। 34अर रूबेनियाँ अर गादियाँ नै यो कहकै, “या वेदी म्हारे अर उनके बीच म्ह इस बात की गवाही ठैहरी सै, के यहोवा ए परमेसवर सै;” उस वेदी का नाम एद धरया।
S'ha seleccionat:
यहो. 22: BGC
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Haryanvi Bible (हरियाणवी), by Beyond Translation is licensed under Creative Commons Attribution-ShareAlike 4.0 License.