यहो. 18
18
बचे होए हिस्से का बाट्या जाणा
1फेर इस्राएलियाँ की सारी मण्डळी नै शीलो म्ह कठ्ठी होकै ओड़ै मिलापआळे तम्बू ताहीं खड्या करया; क्यूँके देश उनके वश म्ह आ ग्या था। 2अर इस्राएलियाँ म्ह तै सात गोत्रां के माणस अपणा-अपणा हिस्सा बिना पाये रहगे थे। 3फेर यहोशू नै इस्राएलियाँ तै कह्या, “जो देश तेरे पूर्वजां के परमेसवर यहोवा नै थारे तै दिया सै, उस नै अपणे हक म्ह कर लेण म्ह थम कद ताहीं ढिलाई करदे रहोगे? 4इब हरेक गोत्र के पाच्छै तीन माणस ठहरा ल्यो, अर मै उननै ज्यांतै भेज्जूँगा के वे चालकै देश म्ह घूम्मै-फिरै, अर अपणे-अपणे गोत्र के हिस्से की जरूरत कै मुताबिक उसका हाल लिख लिखकै मेरे धोरै बोहड़ आए। 5अर वे देश के सात भाग लिक्खे, यहूदी तो दक्षिण की और अपणे हिस्से म्ह, अर यूसुफ के कुण्बे के माणस उत्तर की और अपणे हिस्से म्ह रहवै। 6अर थम देश के सात हिस्से लिखकै मेरे धोरै ले आओ; अर मै उरै थारै खात्तर अपणे परमेसवर यहोवा कै स्याम्ही चिट्ठी गेरूँगा। 7अर लेवियाँ का तेरे बीच म्ह कोए हिस्सा न्ही होवैगा, क्यूँके यहोवा का दिया होया याजक पद ए उनका हिस्सा सै; अर गाद, रूबेन, अर मनश्शे के आध्धे गोत्र के माणस यरदन के पूर्व की और यहोवा के दास मूसा का दिया होया अपणा-अपणा हिस्सा पा चुके सैं।”
8फेर वे माणस उठकै चाल पड़े; अर जो माणस उस देश का हाल लिखण नै चाल्ले उनतै यहोशू नै यो हुकम दिया, “जाकै देश म्ह घूम्मो-फिरो, अर उसका हाल लिखकै मेरै धोरै बोहड़ आओ; अर मै उरै शीलो म्ह यहोवा कै स्याम्ही तेरै खात्तर चिट्ठी डालूँगा।” 9फेर वे माणस चाल पड़े, अर उस देश म्ह घूम्में, अर उसके नगरां के सात हिस्से करकै उनका हाल किताब म्ह लिखकै शीलो की छावणी म्ह यहोशू कै धोरै आए। 10फेर यहोशू नै शीलो म्ह यहोवा कै स्याम्ही उनकै खात्तर चिट्ठियाँ गेरी; अर ओड़ै यहोशू नै इस्राएलियाँ ताहीं उनके भागां के मुताबिक देश बाँट दिया।
11बिन्यामीनियाँ के गोत्र की चिट्ठी उनके कुलां के मुताबिक लिकड़ी, अर उनका हिस्सा यहूदियाँ अर यूसुफियाँ कै बिचाळै म्ह पड्या। 12अर उनकी उत्तरी हद यरदन तै शरु होई, अर यरीहो की उत्तरी और तै चढ़दे होए पश्चिम की और पहाड़ी देश म्ह होकै बेतावेन के जंगळ म्ह लिकड़ी; 13ओड़ै तै वो लूज नै पोहची (जो बेतेल भी कुह्वावै सै), अर लूज दक्षिणी और तै होन्दे होए निचले बेथोरोन के दक्षिणी और के पहाड़ कै धोरै हो अत्रोतदार नै उतरगी। 14फेर पश्चिमी हद मुड़कै बेथोरोन कै स्याम्ही अर उसकी दक्षिण और के पहाड़ तै होन्दे होए किर्यतबाल नाम के यहूदियाँ के एक नगर पै लिकड़ी (जो किर्यत्यारीम भी कुह्वावै सै); पश्चिम की हद याए ठैहरी। 15फेर दक्षिण की और की हद पश्चिम तै शरु होकै किर्यत्यारीम के सिरे तै लिकड़कै नेप्तोह के चोए पै पोहची; 16अर उस पहाड़ के सिरे पै उतरी, जो हिन्नोम के बेट्टे की तराई कै स्याम्ही अर रपाईम नाम की तराई के उत्तरी ओड़ सै; ओड़ै तै वो हिन्नोम की तराई म्ह, यानिके यबूस के दक्षिणी और होकै एनरोगेल नै उतरी; 17ओड़ै तै वो उत्तर की और मुड़कै एनशेमेश नै लिकड़कै उस गलीलोत की ओड़ गई, जो अदुम्मीम की चढ़ाई कै स्याम्ही सै, फेर ओड़ै तै वो रूबेन के बेट्टे बोहन के पत्थर ताहीं उतरगी; 18ओड़ै तै वो उत्तर की ओड़ जाकै अराबा कै स्याम्ही के पहाड़ की और तै होन्दे होए अराबा नै उतरी; 19ओड़ै तै वो सीमा बेथोग्ला की उत्तरी और तै जाकै मृत सागर की उत्तर ओड़ के खाड़ी म्ह यरदन के मुहाने पै लिकड़ी; दक्षिण की सीमा याए ठैहरी। 20अर पूर्व की और की सीमा यरदन ए ठैहरी। बिन्यामीनियाँ का हिस्सा, च्यांरु और की हदां समेत, उनके कुलां कै मुताबिक, योए ठहरया।
21बिन्यामीनियाँ के गोत्र नै उनके कुलां कै मुताबिक ये नगर मिले, यानिके यरीहो, बेथोग्ला, एमेक्कसीस, 22बेतराबा, समारैम, बेतेल, 23अब्बीम, पारा, ओप्रा, 24कपरम्मोनी, ओफनी अर गेबा; ये बाराह नगर अर इनके गाम मिले। 25फेर गिबोन, रामाह, बेरोत, 26मिस्पे, कपीरा, मोसा, 27रेकेम, यिर्पेल, तरला, 28सेला, एलेप, यबूस (जो यरुशलेम भी कुह्वावै सै), गिबा अर किर्यत; ये चौदाह नगर अर इनके गाम उननै मिले। बिन्यामीनियाँ का हिस्सा उनके कुलां कै मुताबिक योए ठहरया।
S'ha seleccionat:
यहो. 18: BGC
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Haryanvi Bible (हरियाणवी), by Beyond Translation is licensed under Creative Commons Attribution-ShareAlike 4.0 License.