सभोपदेशक 1
1
सब कुछ बेकार सै
1यरुशलेम के राजा, दाऊद के बेट्टे अर उपदेशक के वचन। 2उपदेशक का यो वचन सै, “बेकार ए बेकार, बेकार ए बेकार! सब किमे बेकार सै।” 3उस सारी मेहनत नै जिस ताहीं माणस सूरज के नीच्चै#1:3 सूरज के नीच्चै धरती पै करै सै, उसका के फायदा होवै सै? 4एक पीढ़ी दुनिया तै जावै सै, अर दुसरी पीढ़ी दुनिया मै आवै सै, पर धरती सदा बणी रहवै सै। 5सूरज लिकड़कै डुबै भी सै, अर फेर लिकड़ भी जावै सै। 6हवा दक्षिण की ओड़ बहवै सै, अर उत्तर की ओड़ घुमदी जावै सै; वो घुमदी अर बहन्दी रहवै सै, अर अपणी दिशा म्ह बोहड़ आवै सै। 7सारी नदी समुन्दर म्ह जा मिलै सै, फेर भी समुन्दर भरदा कोनी, जिस जगहां तै सारी नदी लिकड़ै सै, ओड़ैए वे फेर चली जावै सै। 8सारी बात मेहनत तै भरी सै, माणस इसका बखान न्ही कर सकदा, ना तो आँख देक्खण तै छिकै सै, अर ना कान सुणण तै भरै सै। 9जो किमे होया था, वोए फेर होवैगा, अर जो कुछ बण चुक्या सै वोए फेर बणाया जावैगा, अर सूरज के नीच्चै कोए बात नई कोनी। 10के इसी कोए बात सै जिसके बारे म्ह लोग कह सकै के देख या नई सै? या तो पुराणे जमान्नै म्ह भोत पैहले तै थी। 11पुराणे बखत की बात्तां की कुछ याद न्ही रही, अर होण आळी बात्तां की भी याद उनकै बाद होण आळयां नै न्ही रहवैगी।
ज्ञान का शोक
12मै उपदेशक यरुशलेम म्ह इस्राएल का राजा था। 13मन्नै अपणा मन लगाया के जो कुछ आसमान कै नीच्चै करया जावै सै, उसका भेद बुद्धि तै सोच-सोचकै पता करुँ, यो बड़े दुख का काम सै जो परमेसवर नै माणसां खात्तर ठहराया सै ताके वे उस म्ह लाग्गै। 14मन्नै उन सारे काम्मां ताहीं देख्या जो सूरज कै नीच्चै करे जावैं सै, देक्खो वे सारे बेकार अर मान्नो हवा कै पाच्छै पकड़ण भाजणा जिसा सै। 15जो टेढ़ा सै, वो सीध्धा न्ही हो सकदा, अर जितनी चीज न्ही सै, वे गिणी न्ही जान्दी।
16मन्नै मन म्ह कह्या, “देख, जितने यरुशलेम म्ह मेरे तै पैहल्या थे, उन सारया तै मन्नै भोत घणी बुद्धि पाई सै, अर मन्नै भोत घणी बुद्धि अर ज्ञान मिल्या सै।” 17अर मन्नै अपणा मन लगाया के बुद्धि का भेद ल्यूँ अर बावळेपण अर बेकूफी नै भी जाण ल्यूँ। मन्नै समझ आया के यो भी हवा नै पकड़ण जिसा सै।
18क्यूँके भोत बुद्धि कै गैल भोत घणे दुख भी होवै सै,
अर जो अपणा ज्ञान बढ़ावै सै वो अपणा दुख भी बढ़ावै सै।
S'ha seleccionat:
सभोपदेशक 1: BGC
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Haryanvi Bible (हरियाणवी), by Beyond Translation is licensed under Creative Commons Attribution-ShareAlike 4.0 License.