2 शमूएल 9
9
मपीबोशेत पै दाऊद की करुणा
1एक दिन दाऊद नै सोच्या अर अपणे आप तै कह्या, “के राजा शाऊल के घराने म्ह तै कोए इब तक बच्या सै, जिस ताहीं मै योनातान कै कारण प्यार दिखाऊँ?” 2शाऊल के घराने का सीबा नाम का एक कर्मचारी था, वो दाऊद कै धोरै बुलाया गया; अर जिब राजा नै उसतै पूछ्या, “के तू सीबा सै?” फेर उसनै जवाब दिया, हाँ, “तेरा दास वोए सै।” 3राजा नै पूच्छया, “के शाऊल के घराने म्ह तै कोए इब तक बच्या सै, जिस ताहीं मै परमेसवर का सा प्यार दिखाऊँ?” सीबा नै राजा तै कह्या, “हाँ, योनातान का एक बेट्टा सै, जो दोन्नु टांगाँ तै लंगड़ा सै।” 4राजा नै उसतै पूछ्या, “वो कित्त सै?” सीबा नै राजा तै कह्या, “वो तो लोदबार नगर म्ह, अम्मीएल के बेट्टे माकीर के घर म्ह रहवै सै।” 5फेर राजा दाऊद नै दूत भेजकै उस ताहीं लोदबार तै, अम्मीएल कै बेट्टे माकीर के घर तै बुलवा लिया। 6जिब मपीबोशेत, जो योनातान का बेट्टा अर शाऊल का पोत्ता था, दाऊद के धोरै आया, फेर मुँह के बळ गिरकै दण्डवत करया। दाऊद नै कह्या, “हे मपीबोशेत!” उसनै कह्या, “तेरे दास ताहीं के हुकम?” 7दाऊद राजा नै उसतै कह्या, “मत डर; तेरे पिता योनातान कै कारण मै जरुर तेरे तै प्यार दिखाऊँगा, अर तेरे दादा शाऊल की सारी जमीन तेरे ताहीं फेर दियुँगा; अर तू मेरी मेज पै रोज भोजन करया करैगा।” 8उसनै दण्डवत करकै कह्या, “तेरा दास के सै, के तू मेरे ताहीं इसे मरे कुत्ते की ओड़ नजर करै?”
9फेर राजा नै शाऊल के कर्मचारी सीबा ताहीं बुलवाकै उसतै कह्या, “जो कुछ शाऊल अर उसके सारे घराने का था वो मन्नै तेरे स्वामी के पोत्ते ताहीं दे दिया सै। 10इब तै तू अपणे बेट्यां अर सेवकां समेत उसकी धरती पै खेत्ती करकै उसकी उपज ले आया करणा, के तेरे स्वामी के पोत्ते ताहीं भोजन मिल्या करै; पर तेरे स्वामी का पोत्ता मपीबोशेत मेरी मेज पै रोज भोजन करया करैगा।” अर सीबा के तो पन्द्रह बेट्टे अर बीस सेवक थे। 11सीबा नै राजा तै कह्या, “मेरा माल्लिक राजा अपणे दास नै जो-जो हुकम दे, उन सारया कै मुताबिक तेरा दास करैगा।” दाऊद नै कह्या, “मपीबोशेत राजकुमारां कै बराबर मेरी मेज पै खाणा खाया करैगा।” 12मपीबोशेत कै भी मीका नाम का एक छोट्टा बेट्टा था। अर सीबा के घर म्ह जितने रह्या करदे वे सारे मपीबोशेत की सेवा करया करदे। 13मपीबोशेत यरुशलेम म्ह रह्या करदा; क्यूँके वो राजा की मेज पै रोज भोजन करया करै था। अर वो दोन्नु पाँयां तै अपाहिज था।
S'ha seleccionat:
2 शमूएल 9: BGC
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Haryanvi Bible (हरियाणवी), by Beyond Translation is licensed under Creative Commons Attribution-ShareAlike 4.0 License.