1 शमूएल 22
22
दाऊद अर च्यार सौ माणस
1दाऊद ओड़ै तै चाल्या, अर बचकै अदुल्लाम नगर की गुफा म्ह पोहच ग्या; या सुणकै उसके भाई, बलके उसके पिता का सारा घराना ओड़ै उसके धोरै गया। 2अर जितने संकट म्ह पड़े थे, अर जितने कर्जदार थे, अर जितने उदास थे, वे सारे उसके धोरै कठ्ठे होए; अर वो उनका प्रधान होया। अर कोए च्यार सौ माणस उसके गैल होगे।
3ओड़ै तै दाऊद नै मोआब के मिस्पे जाकै मोआब के राजा तै कह्या, “मेरे पिता नै अपणे धोरै जिब ताहीं आकै रहण द्यो, जिब ताहीं के मै ना जाणु के परमेसवर मेरे खात्तर के करैगा।” 4अर वो उन ताहीं मोआब के राजा के सम्मुख लेग्या, अर जिब ताहीं दाऊद उस गढ़ म्ह रह्या, तब ताहीं उसके माँ-बाप उसकै धोरै रहे। 5फेर गाद नाम के एक नबी नै दाऊद तै कह्या, “इस गढ़ म्ह मत रह; चल, यहूदा के देश म्ह जा।” अर दाऊद चालकै हेरेत के जंगळ म्ह गया।
6फेर शाऊल नै सुण्या के दाऊद अर उसके संगियां का पता चल ग्या सैं उस बखत शाऊल गिबा की ऊँच्ची जगहां पै, एक झाऊ के पेड़ के तळै, हाथ म्ह अपणा भाला लिए होए बैठ्या था, अर उसके सारे कर्मचारी उसके आस्सै-पास्सै खड़े थे। 7फेर शाऊल अपणे कर्मचारियाँ तै जो उसके आस्सै-पास्सै खड़े थे कहण लाग्या, “हे बिन्यामिनियों, सुणो; के यिशै का बेट्टा थमनै सारया नै खेत अर दाख की बारियाँ देवैगा? के वो थमनै सारया नै सहस्त्रपति अर शतपति करैगा? 8थम सारया नै मेरे बिरुध्द क्यूँ राजद्रोह की साजिस करी सै? अर जिब मेरे बेट्टे नै यिशै के बेट्टे तै करार करया, फेर किसे नै मेरे ताहीं न्ही बताया; अर थारै म्ह तै किसे नै मेरे खात्तर दुखी होकै मेरे ताहीं प्रगट न्ही करया, के मेरे बेट्टे नै मेरे कर्मचारी ताहीं मेरे बिरुध्द इसा घात लगाण ताहीं उभारया सै, जिसा आज कै दिन सै।” 9फेर एदोमी दोएग नै, जो शाऊल के सेवकां के उप्पर ठहराया गया था, जवाब देकै कह्या, “मन्नै तो यिशै के बेट्टे ताहीं नोब म्ह अहीतूब के बेट्टे अहीमेलेक के धोरै आन्दे देख्या, 10अर उसनै उसकै खात्तर यहोवा तै पूच्छया, अर उस ताहीं भोजनवस्तु दी, अर पलिश्ती गोलियत की तलवार भी दी।”
11अर राजा नै अहीतूब के बेट्टे अहीमेलेक याजक ताहीं अर उसके पिता के सारे घराने ताहीं, यानिके नोब म्ह रहणआळे याजकां ताहीं बुलवा भेज्या; अर जिब वे सारे के सारे शाऊल राजा के धोरै आए, 12फेर शाऊल नै कह्या, “हे अहीतूब के बेट्टे, सुण,” वो बोल्या, “हे प्रभु, के हुकम सै?” 13शाऊल नै उसतै पूछ्या, “के कारण सै के तू अर यिशै के बेट्टे दोनुआं नै मेरे बिरुध्द राजद्रोह की गोष्ठी करी सै? तन्नै उस ताहीं रोट्टी अर तलवार दी, अर उसके खात्तर परमेसवर तै पूच्छया भी, जिसतै वो मेरे बिरुध्द उठै, अर इसा घात लगावै जिसा आज कै दिन सै?” 14अहीमेलेक नै राजा ताहीं जवाब देकै कह्या, “तेरे समस्त कर्मचारियाँ म्ह दाऊद के बराबर बिश्वासयोग्य कौण सै? वो तो राजा का दामाद सै, अर तेरी राजसभा म्ह उपस्थित होया करदा, अर तेरे परिवार म्ह सम्मानित करया जावै सै। 15के मन्नै आज ए उसकै खात्तर परमेसवर तै पूछणा शरु करया सै? वो मेरे तै दूर रहे! राजा ना तो अपणे दास पै इसा किमे दोष लगावै, ना मेरे पिता के सारे घराने पै, क्यूँके तेरा दास इन सारी बात्तां के बारै किमे भी न्ही जाणदा।” 16पर राजा नै कह्या, “हे अहीमेलेक, तू अर तेरे पिता का सारा घराना पक्का मार डाल्या जावैगा।” 17फेर राजा नै उन पहरुआं तै जो उसके आस्सै-पास्सै खड़े थे हुकम दिया, “मुड़ो अर यहोवा के याजकां ताहीं मार गेरो; क्यूँके उननै भी दाऊद की मदद करी सै, अर उसके भाजण जाणण पै भी मेरे ताहीं न्ही बताया।” पर राजा के सेवक यहोवा के याजकां ताहीं मारण कै खात्तर हाथ बढ़ाणा न्ही चावै थे। 18फेर राजा नै दोएग तै कह्या, “तू मुड़कै याजकां ताहीं मारदे।” फेर एदोमी दोएग नै मुड़कै याजकां ताहीं मारया, अर उस दिन सणी आळा एपोद पहरे होए पचास्सी#22:18 एपोद पहरे होए पचास्सी : पचास्सी माणस जो एपोद ले जाण के योग्य थे माणसां ताहीं घात करया। 19अर याजकां के नगर नोब ताहीं उसनै जनानियाँ-माणसां, अर बाल-बच्यां, अर दूध पीन्दे, अर बळधां, गधां, अर भेड़-बकरियाँ समेत तलवार तै मारया।
20पर अहीतूब के बेट्टे अहीमेलेक का एब्यातार नाम का एक बेट्टा बच लिकड्या, अर दाऊद के धोरै भाज ग्या। 21फेर एब्यातार नै दाऊद ताहीं बताया, के शाऊल नै यहोवा के याजकां का वध करया सै। 22अर दाऊद नै एब्यातार तै कह्या, “जिस दिन एदोमी दोएग ओड़ै था, उसे दिन मन्नै जाण लिया था, के वो पक्का शाऊल ताहीं बतावैगा। तेरे पिता के सारे घराने के मारे जाण का कारण मै ए होया। 23ज्यांतै तू मेरे गैल निडर रह; जो मेरे प्राण का गाहक सै वोए तेरे प्राण का भी गाहक सै; पर मेरे गैल रहण तै तेरी इफाजत होवैगी।”
S'ha seleccionat:
1 शमूएल 22: BGC
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Haryanvi Bible (हरियाणवी), by Beyond Translation is licensed under Creative Commons Attribution-ShareAlike 4.0 License.