1 राजाओं 3
3
बुद्धि खात्तर सुलैमान की प्रार्थना
1फेर राजा सुलैमान राज्य की संधि करण खात्तर मिस्र के राजा फिरौन#3:1 फिरौन यो एक पद सै की बेट्टी तै ब्याह करकै उसका दामाद बणग्या, अर उसनै दाऊदपुर म्ह ल्याकै जिब ताहीं अपणा भवन अर यहोवा का भवन अर यरुशलेम के च्यांरु और की शहरपनाह ना बणवा चुक्या, तब ताहीं उसनै उस ताहीं ओड़ैए राख्या। 2क्यूँके प्रजा के माणस तो ऊँच्चे स्थानां पै बलि चढ़ावैं थे अर उन दिनां ताहीं यहोवा के नाम का कोए भवन न्ही बण्या था।
3सुलैमान यहोवा तै प्रेम करै था अर अपणे पिता दाऊद की विधियाँ पै चाल्दा तो रह्या, पर वो ऊँच्चे स्थानां पै भी बलि चढ़ाया अर धूप जळाया करै था। 4अर एक दिन राजा गिबोन नगर म्ह बलि चढ़ाण गया, क्यूँके सबतै ऊँच्चा स्थान वोए था, फेर ओड़ै की वेदी पै सुलैमान नै एक हजार होमबलि चढ़ाए।
5गिबोन म्ह यहोवा नै रात म्ह सपने के जरिये सुलैमान तै दर्शन देकै कह्या, “जो कुछ तू चावै के मै तन्नै देऊँ, वो माँग।” 6सुलैमान नै कह्या, “तू अपणे दास मेरे पिता दाऊद पै बड़ी करुणा करदा रह्या, क्यूँके वो अपणे-आपनै तेरै स्याम्ही जाणकै तेरे गैल सच्चाई अर धार्मिकता अर मन की सिधाई तै चालदा रह्या; अर तन्नै उरै ताहीं उसपै करुणा करी थी के उसतै उसकी गद्दी पै बैठण आळा एक बेट्टा दिया सै, जिसा के आज वर्तमान म्ह सै। 7अर इब हे मेरे परमेसवर यहोवा! तन्नै अपणे दास ताहीं मेरे पिता दाऊद की जगहां पै राजा बणाया सै, पर मै छोट्टा छोरा सा सूं जो भित्तर-बाहर आणा-जाणा न्ही जाणदा। 8फेर तेरा दास तेरी चुणी होई प्रजा के भोत-से माणसां कै बिचाळै सै, जिनकी गिणती बहुतायत के मारे न्ही हो सकदी। 9तू अपणे दास नै अपणी प्रजा का न्याय करण कै खात्तर समझण की इसी शक्ति दे, के मै भले-बुरे नै परख सकूँ; क्यूँके कौण इसा सै के तेरी इतणी बड़ी प्रजा का न्याय कर सकै?” 10इस बात तै प्रभु खुश होया, के सुलैमान नै इसा वरदान मांग्या सै। 11फेर परमेसवर नै उसतै कह्या, “ज्यांतै के तन्नै यो वरदान मांग्या सै, अर ना तो लाम्बी उम्र अर ना धन अर ना अपणे बैरियाँ का नाश मांग्या सै, पर समझण के विवेक का वरदान मांग्या सै ज्यांतै सुण, 12मै तेरी बिनती कै मुताबिक करुँ सूं, तन्नै बुद्धि अर विवेक तै भरया मन देऊँ सूं, उरै ताहीं के तेरै बराबर ना तो तेरे तै पैहल्या कोए कदे होया, अर ना बाद म्ह कोए कदे होवैगा। 13फेर जो तन्नै न्ही मांग्या, यानिके धन अर महिमा, वो भी मै तन्नै उरै ताहीं देऊँ सूं, के तेरे जीवन भर कोए राजा तेरे बराबर ना होवैगा। 14फेर जै तू अपणे पिता दाऊद की तरियां मेरे राह म्ह चाल्दा होया, मेरी विधियाँ अर हुकमां नै मानदा रहवैगा तो मै तेरी उम्र नै बढ़ाऊँगा।”
15फेर सुलैमान जाग उठ्या; अर देख्या के यो सपना था; फेर वो यरुशलेम म्ह गया, अर यहोवा के करार के सन्दूक कै स्याम्ही खड्या होकै, होमबलि अर मेलबलि चढ़ाए, अर अपणे सारे कर्मचारियाँ कै खात्तर भोज करया। 16उस बखत दो वेश्या राजा कै धोरै आकै उसकै स्याम्ही खड़ी होई। 17उन म्ह तै एक जनान्नी कहण लाग्गी, “हे मेरे प्रभु! मै अर या जनान्नी दोन्नु एके घर म्ह रहवां सां; अर इसकै गैल घर म्ह रहन्दे होए मेरै एक बच्चा होया। 18फेर मेरै जच्चा के तीन दिन कै बाद इसा होया के या जनान्नी भी जच्चा होगी; हम तो गैल ए गैल थी, हम दोन्नु नै छोड़कै घर म्ह और कोए भी ना था। 19अर रात म्ह इस जनान्नी का बाळक इसकै तळै दबकै मर ग्या। 20फेर इसनै आध्धी रात म्ह उठकै, जिब तेरी दास्सी सोवै ए थी, तब मेरा बाळक मेरै धोरै तै लेकै अपणी छात्ती पै लिटा लिया, अर अपणा मरया होया बाळक मेरी छात्ती पै लिटा दिया। 21सुबेरै नै जिब मै अपणे बाळक नै दूध पियाण खात्तर उठ्ठी, फेर उस ताहीं मरया होया पाया; पर सबेरै मन्नै ध्यान तै यो देख्या, के वो मेरा बेट्टा कोनी।” 22फेर दुसरी जनान्नी नै कह्या, “न्ही जिन्दा बेट्टा मेरा सै, अर मरया होया बेट्टा तेरा सै।” पर वा कहन्दी रह्यी, “ना मरया होया तेरा बेट्टा सै अर जिन्दा मेरा बेट्टा सै,” इस तरियां वे राजा कै स्याम्ही बात करदी रहीं।
23राजा नै कह्या, “एक तो कहवै सै ‘जो जिन्दा सै, वोए मेरा बेट्टा सै, अर मरया होया तेरा बेट्टा सै;’ अर दुसरी कहवै सै, ‘ना, जो मरया सै वोए तेरा बेट्टा सै, अर जो जिन्दा सै, वोए मेरा बेट्टा सै।’” 24फेर राजा नै हुक्म दिया, “मेरै धोरै तलवार ल्याओ;” आखर एक तलवार राजा कै स्याम्ही ल्याई गई। 25फेर राजा नै कह्या, “जिन्दे बाळक नै दो टुकड़े करकै आध्धा इसनै अर आध्धा उसनै दे द्यो।” 26फेर जिन्दे बाळक की माँ का मन अपणे बेट्टे के प्यार तै भर आया, अर उसनै राजा तै कह्या, “हे मेरे प्रभु! जिन्दा बाळक उस्से तै दे; उसनै मारै ना।” दुसरी जनान्नी नै कह्या, “वो ना तो मेरा हो अर ना तेरा, वो जीवित बाळक दो टुकड़े करया जावै।” 27फेर राजा नै कह्या, “पैहली नै जिन्दा बाळक द्यो; उसनै ना मारो; क्यूँके उसकी माँ वाए सै।” 28जो न्याय राजा नै करया था, उसकी खबर सारे इस्राएल नै मिली, अर उननै राजा का भय मान्या, क्यूँके उननै यो देख्या, के उसके मन म्ह न्याय करण कै खात्तर परमेसवर की बुद्धि सै।
S'ha seleccionat:
1 राजाओं 3: BGC
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Haryanvi Bible (हरियाणवी), by Beyond Translation is licensed under Creative Commons Attribution-ShareAlike 4.0 License.