1 इतिहास 22
22
1फेर दाऊद कहण लाग्या, “यहोवा परमेसवर का भवन#22:1 यहोवा परमेसवर का भवन सुर्गदूत का प्रगट होणा अर सुर्ग तै आग गिरणा, इन दोन्नु चमत्कारां नै दाऊद ताहीं बिश्वास दिला दिया था के यहोवा के घर का पूर्व निर्धारित जगहां वोए सै जित्त उसका बेट्टा भविष्यवाणी कै मुताबिक भवन बणावैगा। योए सै, अर इस्राएल कै खात्तर होमबलि की वेदी योए सै।”
मन्दर के बणाण की तैयारी
2फेर दाऊद नै इस्राएल के देश म्ह जो परदेशी थे उन ताहीं कठ्ठा करण का हुकम दिया, अर परमेसवर का भवन बणाण ताहीं पत्थर गढ़ण कै खात्तर संगतराश ठहरा दिए। 3फेर दाऊद नै फाटकां के किवाड़ां की कील्लां अर जोड़ां कै खात्तर भोत सा लोहा, अर तौल तै बाहर घणाए पीतळ, 4अर गिणती तै बाहर देवदार के पेड़ कठ्ठे करये; क्यूँके सीदोन अर सोर के माणस दाऊद कै धोरै भोत-से देवदार के पेड़ ल्याये थे। 5अर दाऊद नै कह्या, “मेरा बेट्टा सुलैमान सुकुमार अर छोरा सै, अर जो भवन यहोवा कै खात्तर बणाणा सै, उस ताहीं अत्यन्त तेजोमय अर सारे देशां म्ह प्रसिद्ध अर शोभायमान होणा चाहिये; ज्यांतै मै उसकै खात्तर तैयारी करुँगा।” आखर दाऊद नै मरण तै पैहल्या घणी त्यारी करी।
6फेर उसनै अपणे बेट्टे सुलैमान ताहीं बुलाकै इस्राएल के परमेसवर यहोवा कै खात्तर भवन बणाण का हुकम दिया। 7दाऊद नै अपणे बेट्टे सुलैमान तै कह्या, “मेरी मनसा तो थी के अपणे परमेसवर यहोवा के नाम का एक भवन बणाऊँ। 8पर यहोवा का यो वचन मेरै गैल पोहच्या, ‘तन्नै लहू घणाए बहाया अर बड़े-बड़े युद्ध करे सैं, ज्यांतै तू मेरै नाम का भवन ना बणाण पावैगा, क्यूँके तन्नै धरती पै मेरी नजर म्ह घणाए लहू बहाया सै। 9देख, तेरै तै एक बेट्टा पैदा होवैगा, जो शान्त माणस होवैगा; अर मै उसनै च्यांरु और के दुश्मनां तै शान्ति दियुँगा; उसका नाम तो सुलैमान होवैगा, अर उसके दिनां म्ह मै इस्राएल ताहीं शान्ति अर चैन दियुँगा। 10वो मेरै नाम का भवन बणावैगा। अर वो मेरा बेट्टा ठहरैगा अर मै उसका पिता ठहरूँगा, अर उसकी राजगद्दी नै मै इस्राएल कै उप्पर सदा खात्तर स्थिर राखूँगा।’ 11इब हे मेरे बेट्टे, यहोवा तेरै गैल रहवै, अर तू सिध्द होकै उस वचन कै मुताबिक जो तेरे परमेसवर यहोवा नै तेरै बारै म्ह कह्या सै, उसका भवन बणाणा। 12इब यहोवा तन्नै बुद्धि अर समझ दे अर इस्राएल का अधिकारी ठहरा दे, अर तू अपणे परमेसवर यहोवा के नियम-कायदे नै मानदा रहवै। 13तू जिब ए सफल होगा जिब उन विधियाँ अर नियमां पै चालण की चौकसी करैगा, जिनके हुकम यहोवा नै इस्राएल कै खात्तर मूसा तै दिये थे। होसला राख अर मजबूत हो।#22:13 होसला राख अर मजबूत हो। इस्राएलियाँ अर यहोशू तै कहे गए शब्दां का इस्तमाल उरै दाऊद करण लागरया सै। डरै ना; अर तेरा मन कच्चा ना हो। 14सुण, मन्नै अपणे क्ळेश कै बखत#22:14 क्ळेश कै बखत दाऊद अपणे राज्यकाल की अनेक मुश्किलां ताहीं दोष दे रहता सै जिनकै कारण वो घणा भण्डार कठ्ठा करण म्ह कामयाब न्ही हो पाया था। यहोवा के भवन कै खात्तर एक लाख किक्कार सोन्ना, अर दस लाख किक्कार चाँदी, अर पीतळ अर लोहा इतणा कठ्ठा करया सै, के बहुतायत कै कारण तौल तै बाहर सै; अर लाकड़ी अर पत्थर मन्नै कठ्ठे करें सैं, अर तू उन ताहीं बढ़ा सकैगा। 15अर तेरै धोरै घणे कारीगर सैं, यानिके पत्थर अर लाकड़ी के काटण अर गढ़ण आळे बलके सारे ढाळ के काम कै खात्तर सारे ढाळ के प्रवीण माणस सैं। 16सोन्ना, चाँदी, पीतळ अर लोहे की तो किमे गिणती न्ही सै, सो तू उस काम म्ह लाग जा! यहोवा तेरै गैल लगातार रहवै।”
17फेर दाऊद नै इस्राएल के सारे हाकिमां ताहीं अपणे बेट्टे सुलैमान की मदद करण का हुकम या कहकै दिया, 18“के थारा परमेसवर यहोवा थारै गैल न्ही सै? के उसनै थारै च्यांरु ओड़ तै विश्राम न्ही दिया? उसनै तो देश के निवासियां ताहीं मेरै वश म्ह कर दिया सै; अर देश यहोवा अर उसकी प्रजा कै स्याम्ही दब्या होया सै। 19इब तन-मन तै अपणे परमेसवर यहोवा कै धोरै जाया करो, अर जी लगाकै यहोवा परमेसवर की पवित्र जगहां बणाणा, के थम यहोवा की वाचा का सन्दूक अर परमेसवर के पवित्र बरतन उस भवन म्ह ल्याओ जो यहोवा के नाम का बणण आळा सै।”
S'ha seleccionat:
1 इतिहास 22: BGC
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Haryanvi Bible (हरियाणवी), by Beyond Translation is licensed under Creative Commons Attribution-ShareAlike 4.0 License.