Luke 10
10
Jisü no Lhotsüni Kini Puwu
1Hipathiu Ampeu no kütami lhotsüni kini süküsü shilu eno kini-ni no pa züu no pa no wu niye kutò akeu mishiphu eno aqha kümtsü lo puwue. 2Pa no panongu vilo pi, “Ghile hu kepu ye kupukuno shi ani ikemu ajumi ye aghulo likhi anie. Tighenguno ghile Mipeu vilo pa lu lo ajumiqo puhu tsü penike inikhulo. 3Wulo! ambeti no tüngtügha gholo ilolu aketoi ino nongu puwu anie. 4Pisabo, jolabo momu apukhukuqho pewu kevilo; eno alà lo khiumu sasü petha shi kevilo.
5“Kughou nongu no aki lo iloni keno, ‘Aki hipau lo aloino keu alo,’ ipi paghilo. 6Aloino keu ghenguno alomsü chekemi tile aghí aye, nongu lokiqi pano shou alu nani, tishimo aye nongu lau idechile ighive nani. 7Aki tile ngolo, eno panongu no kiu kutotsü keno chu eno sholo, kughengu akümlà kishiu ye pa jumeqo ithulu küzü ke. Aki-aki lo homüxa itsü wu kevilo.
8“Kughou nongu no mishiphu lo ilo no timi no nongu sasüni keno, kiu pesü nongu tsü keno ti chulo. 9Küsükinimi tile akeqo shipivilo eno panongu vilo pilo, ‘Alhou kükaqha ye nongu lau kupunú ighivae.’ 10Ikemu nongu no mishiphu lo ilo kelo nongu sasümove aye, tipau laghila lo wu no ishi pilo, 11‘Now mishiphu lono ni pukhu müzá lo ayeghimukhu ikughive keu ghí nongu lachile keu michi shi kukhuqhivae. Ikemu mütsümishei hi ithilo: Alhou kükaqha ye nongu lau kupunú ighivae.’ 12Ino nongu vilo piani, küghakütha tsalà lo mishiphu tipau ye Sodom nguno alau ghimeqhi nani.
13“Chorazin! Oghenguno ahaküsapue, Bethsaida! Oghenguno ahaküsapue, kughengu tsalá akümzapu kümlà nongu gholo shikeu Tyre eno Sidon lo mülà ke aye, panongu ye yeqhiyephi pepu püzü ayevǜ kuchhu no khaghi no amlo pebideve aghíni cheke. 14Ikemu küghakütha tsalà ghuloki lo Tyre ngò Sidon nguno alau mishiphu tipau ghimeqhi nani. 15Eno O Capernaum! No ye opesü atsütsǘ kutólo süqhe iku niye keshea? Moe, no ye Hades lo iqive nanie.
16“Khukhumu nongu tsà iní akeu ye itsà iní anie, eno khukhumu nongu milive akeu ye imilive anie; ikemu khukhumu imili kemi ye ino puwu akemi milive anie.”
17Lhotsüni kini hu no alokivishi ideighi no pi, “Ampeu, tüghaküsaqo ghí oje vechewo ningu qhoqhüe.”
18Pa no khochile, “Tsütsüpha toi atsütsǘ lono Satan ikiqi keu ino ithulue. 19Ino nongu pelo apighi, achuwa pazá, eno aghümi küká kümtsü shou qodalu penikeu kükagha tsüvae; kiunomu nongu ghüzamo nani. 20Tishi namu, aghawuqo no nongu qhoqhü keu lo alovi akevilo, ikemu nongu je atsütsǘ lo yèpüa keu ghenguno alovishe alo.”
21Tipau tüqhüdo lo Aghungú Kimthe vechewo alokivi pesü Jisü hupite tsü, eno pa no ishi pi, “Atsütsǘ eno ayeghi Mipeu, Apùo, ino osheqhe ani, kughengu nono alokütsümi eno ithisheve kemiqo lau no thime hipaqo küsüpe qhive, eno anuli itimiqo lau tipaqo pephe piye ke. Iyei, Apùo, hitoi shikeu ye opulou kiqi lono shikeu ke.
22“Ipù no thowkha kümtsü pesü ipichevetsüae. Apù nguno alau ye khumu Anu müthae, eno Anu nguno alau ye khunomu Apù müthae eno khunoqo lau Anu no Apù pephe piyeni keno tipaqo likhi no ithi cheni.”
23Tithiu Jisü no akhopemiqo lau kugho ighino lomo shi panongu vilo pi: “Nongu no kiu ithulu ani keno ti ithulu akeu nhethiqo ye müghae. 24Ino nongu vilo piani, tungkupumi eno kükami kutomo no nongu no kiu ithulu ani keno ti ithulu nishi che kemu ithumlave, eno nongu no kiu chilu ani keno chilu nishi che kemu chimlave ke.”
Samariami Akiviu Holetsa
25Ghuthu lakhi ayeza lo shitsami lakhi no Jisü peju niye puthugho no iniju, “Akükütsüu, lhokta küxü ighilu nike ghenguno ni ye kiu shimoayesa kea?”
26Jisü no khochile, “Ayeza kaku lo kiu yèpüani eno no ye tile kíshi philu kea?”
27Pa no khochile, “No ye omlo, ongulho, okumto eno okükümsü kümtsü#10:27 Zaki 6:5 pesü O Mipeu O Lhou kimiyelo; eno, ‘Olikhi otoi okisüghümi kimiyelo.’#10:27 Achine 19:18”
28Jisü no khochile, “No ye achipishi khochilevae, hi shilo eno no ye xülu nani.”
29Ikemu ayeza kükütsüu ye pa likhi pa ye achipie pinishive kehu Jisü vilo iniju, “Imaye khuu no ikisüghümi kea?”
30Jisü no khochile ghi pi, “Timi lakhi Jerusalem lono Jericho lo iqi cheke lono süxakuchumiqo u lo ilove. Ikelo panongu no paw tiphiminiqo xalukhave, eno akìthí kumlhoshi pa heqhi pe qhive no wuve. 31Achinemi lakhi tipau là lo iqiche, kughou pa no timi hu ithulu keno pa ye kughowu no müxüsü wuve. 32Tihutoi, Levimi lakhi tipau-a lo ighi, kughou pa no timi hu ithulu keno pa ghí kughowu no müxüsü wuve. 33Ikemu Samariami lakhi kicheghüzü shi chekeu no tipau-a lo ighino timi hu ithulu kelo ighono pa kimiyeqhiyive. 34Pa no pa lau wu püzü pa ghüzakuqo lo thazü ngò atsaizü lepuku no khave tsü. Tisheno timi hu paw khurha shou khape puku no pa sasü kicheghüzümi ki lo ighino pa tucho-mjoe. 35Tishiwo thoghiu pa no ghükayi kini ikhipe kicheghüzümi ki kheu tsüe. Eno pa vilo pi, ‘Pa tucho-mujo aghílo, nono hinguno alau puwove kepu shinamu ino ideighike lono otsü chileve nani ke.’
36“Hipano küthü dolo no ye khikhiu no süxakuchumi u lo ilove keu lau akisüghümi kivi ghili pephe piye kepi kümsülu ania?”
37Ayeza kükütsüu hu no khochile, “Kimiyekini kümlà shikeu hunoe.”
Jisü no pa vilo pi, “Wu no titoi shilo!”
Jisü no Martha ngò Mary Ki lo wu
38Jisü ngò pa khopemiqo no kicheghüzü shisü aphu lakhi tolu kelo totimi lakhi Martha ipikeu no li ki khaqhipe Jisü sasüe. 39Li tsünipu lakhi Mary ipikeu ye Ampeu pukhuphi lo iqa no pa no kiu pi akeno iní ae. 40Ikemu Martha ye mülà kepu kutomo akehu mighemghai akümlà shiae. Li no pa lau ighino iniju, “Ampeu, itsünipu no akümlà kümtsü kulhuqhipe itsüvea ke, no ghí jutsümo keshea? Li vilo ikuphulo pitsülo!”
41“Martha, Martha,” ipi Ampeu no khochile ghi pi, “No ye thime kutomo kehu amlosa eno kütakihi ani, 42ikemu thime lakhi likhi avehupu shi ani. Mary ye kiu no akiviu keno ti kìsheluvea, eno tiye li lau no ikhisüwuve mülae.”
S'ha seleccionat:
Luke 10: STB
Subratllat
Comparteix
Compara
Copia
Vols que els teus subratllats es desin a tots els teus dispositius? Registra't o inicia sessió
Sümi Tiqhelimi Bible™| Copyright © 2023, 2026 by Biblica, Inc. |
Used with permission. All rights reserved worldwide.