Wulo 3
3
1Asoo Dwuuma gyi boɛ tɛla bɛdabɛ mɔɔ bɛnle Dwuuma la? Anzɛɛ nvasoɛ bie wɔ mrenyanu nzonlɛyɛlɛ zo ɔ? 2Nɔhalɛ bɔkɔɔ, wɔ adenle biala azo! Ɔboalekɛ alumua ne, bɛmɛ yɛɛ Nyamenle vale ye ngilehilelɛ ne wulale bɛ sa nu a. 3Na saa yera kɛ menli ne bie mɔ anli nɔhalɛ a, ɛnee ɔkile kɛ Nyamenle ɔdaye ɔnrɛli nɔhalɛ ɔ? 4#Edw 51.4 Kyɛkyɛ, ɔnle zɔhane fee. Saa menli ɛnli nɔhalɛ bɔbɔ a Nyamenle bahɔ zolɛ ali nɔhalɛ dahuu. Nyamenle Edwɛkɛ ne se,
“Ɔwɔ kɛ bɛkile wɔ bɛmaa ɛka nɔhalɛ;
na bɛdi wɔ edwɛkɛ a wɔali benle.”
5Saa yɛ nyɛleɛ ɛtane ɛtane ne mɔ maa yɛnwu Nyamenle pɛlepɛlelilɛ ne wienyi a, ɛnee kɛ yɛse ɛ? Saa yɛyɛ ɛtane na Nyamenle tea yɛ a, ɛnee Nyamenle ɔdaye yeyɛ ɛtane ɔ? (Melɛtendɛ kɛ sonla ala la.) 6Ɔnle nɔhalɛ! Saa Nyamenle ɛnli pɛlepɛle a, ɛnee kɛ ɔkɛzi ɔkɛbua ewiade ndɛne ɛ?
7Saa me adalɛ mɔɔ mele la kile maa Nyamenle anyunlunyia ne nee ye nɔhalɛ ne da ali wienyi a, ɛnee duzu ati yɛɛ bɛbua me fɔlɛ kɛ mele ɛtanenli ɛ? 8Duzu ati yɛɛ bɛnga kɛ, “Bɛmaa yɛli ɛtane amaa kpalɛ ara ɛ?” Nɔhalɛ, ɛzonle mɔɔ menli ne bie mɔ ɛva ɛdo yɛ nwo zo la ɛne. Na bɛdabɛ bɛ munzule doa bɛ!
Sonla biala ɛnle tenlenenli
9Saa ye zɛhae a, ɛnee yɛdayɛ Dwuuma yɛgyi boɛ yɛtɛla bɛdabɛ mɔɔ bɛnle Dwuuma la ɔ? Kyɛkyɛ, ɔnle zɔhane fee. Mehile nuhua dɛba kɛ Dwuuma nee bɛdabɛ mɔɔ bɛnle Dwuuma la amuala zo ɛtane. 10#Edw 14.1-3; 53.1-3 Nyamenle Edwɛkɛ ne se,
“Awie biala ɛnle ɛkɛ mɔɔ le tenlenenli a,
Kyɛkyɛ ko bɔbɔ ɛnle ɛkɛ.
11Biala ɛnlɛ ndelebɛbo,
biala ɛmkpondɛ Nyamenle abo zo.
12Menli kɔsɔɔti ɛde Nyamenle anwo atua;
biala ɛvo, yɛɛ biala ɛnli boɛ,
kyɛkyɛ, ko bɔbɔ ɛnle ɛkɛ.
13 #
Edw 140.3
Bɛ nloa deda nwolɛ kɛ sɛka mɔɔ ɛbubu,
adalɛ yɛɛ vi bɛ nloa anu finde a.
Bɛ nloa edwɛkɛ yɛ nla tɛla ɛwɔlɛ gye.
14Amowa nee nzɛnvunli wɔ bɛ nloa anu.
15Bɛle ahɔdiawu,
16ɛleka biala mɔɔ bɛkɛhɔ la
bɛtwehwe amaneɛnwunlɛ nee nyanelilɛ bɛmaa.
17Bɛnze anzonudwolɛ adenle ne
18yɛɛ Nyamenle ɛzulolɛ biala ɛnle bɛ nu.”
19Mɔɔ yɛnwu ye la a le kɛ, debie biala mɔɔ wɔ mɛla ne anu la wɔ ɛkɛ ne maa bɛdabɛ mɔɔ bɛwɔ mɛla ne abo la, amaa menli muala aha bɛ nloa ado nuhua kɛ bɛdi fɔlɛ wɔ Nyamenle ndɛnebualɛ ne anu. 20Ɔluakɛ awie biala mɔɔ di Mosisi mɛla ne azo la ɛngola ɛnzɔ Nyamenle anye. Mɛla ne gyima a le kɛ, ɔmaa sonla nwu ye ɛtane mɔɔ yeyɛ la.
Kɛ Nyamenle si maa menli sɔ ɔ nye la
21Kɛkala, adenle mɔɔ Nyamenle dua zo maa menli sɔ ɔ nye la ɛrala ɛkɛ wienyi, yɛɛ ɔnvane mɛla ne anwo hweledede. Mɛla mumua ne nee Nyamenle kpɔmanvolɛma di ɛhye anwo daselɛ. 22#Gal 2.16 Nyamenle dua menli diedi mɔɔ lɛ ye wɔ Gyisɛse Kelaese anu la azo a maa bɛsɔ ɔ nye a. Nyamenle yɛ ɛhye maa bɛdabɛ mɔɔ bɛdie Kelaese bɛdi la amuala, ɔboalekɛ ngakyile fee ɛnle nuhua; 23menli kɔsɔɔti ɛyɛ ɛtane na bɛnfɛta Nyamenle anyunlunyia ne. 24Ɔlua mgbɔdalɛ mɔɔ Gyisɛse Kelaese ɛva ɔ nwo ɛli la azo, Nyamenle ɛlolɛ ne mɔɔ ɔfa ɔkyɛ mgbane la maa menli muala sɔ ɔ nye. 25Nyamenle ɔdaye ɔvale Gyisɛse ɔmanle, amaa ɔlua ye ewule ne azo yeayɛ menli ɛtane nwo mgbɔdalɛ boane, wɔ bɛ diedi mɔɔ bɛkɛnyia ye wɔ ye nu la azo. Nyamenle yɛle ɛhye vale hilele ye tenleneyɛlɛ ne. Mɔmoane, ɔzile abotane na ɔbule ɔ nye ɔguale menli ɛtane zo; 26na kɛkala ɔ nee menli di wɔ bɛ ɛtane nwo, ɔfa ɔkile ye tenleneyɛlɛ ne. Nyamenle dua adenle ɛhye azo kile kɛ ɔle tenlenenli na ɔmaa awie biala mɔɔ die Gyisɛse di la sɔ ɔ nye.
27Ɛnee akee duzu a yɛfa yɛtu yɛ nwo a? Yɛnlɛ ɛhwee! Na ɛnee akee duzu ati ɔ? Ɛnee yɛ gyima kpalɛ nwo anzɛɛ? Kyɛkyɛ. Na yɛdie yɛdi la ati ɔ. 28Ɔluakɛ yɛnwu kɛ sonla mɔɔ die Nyamenle di la yɛɛ Nyamenle maa ɔsɔ ɔ nye a, na tɛ mɔɔ di mɛla ne azo la ɔ. 29Na Nyamenle le Dwuuma angome Nyamenle ɔ? Anzɛɛ ɔnle bɛdabɛ noko mɔɔ bɛnle Dwuuma la Nyamenle ɔ? Kɛmɔti ɛ, ɔle bɛdabɛ noko bɛ Nyamenle! 30#Mɛla 6.4; Gal 3.20 Nyamenle le kokye yɛɛ ɔbalua diedi zo a yeamaa Dwuuma azɔ ɔ nye a; zɔhane ala yɛɛ ɔbalua bɛdabɛ mɔɔ bɛnle Dwuuma la noko diedi zo yeamaa bɛazɔ ɔ nye a. 31Na ɛnee ɛhye kile kɛ yɛdua diedi zo yɛavuandi mɛla ne yɛagua ɔ? Kyɛkyɛ! Ɔnle zɔhane fee. Yɛdua yɛ diedi zo yɛkpogya mɛla ne zo.
S'ha seleccionat:
Wulo 3: NB
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Bible in Nzema © Bible Society of Ghana, 1998.