Wulo 11
11
Nyamenle anwunvɔnezelɛ wɔ Yizilayɛma anwo zo
1 #
Fel 3.5
Ɛnee akee mebiza kɛ, se ɛnee Nyamenle ɛkpo ye menli ne o? Ɔnle zɔhane fee! Medame, mele Yizilayɛnli, Ebileham anlɔnra mɔɔ vi Bɛngyaman abusua nu. 2Nyamenle ɛtɛkpole ye menli ne mɔɔ mɔlebɛbo ne amuala ɔkpale nu ɔyele bɛ la. Se bɛze Nyamenle Edwɛkɛ ne ɛleka mɔɔ kile kɛ ɛnee Yelaegya ɛlɛsɛlɛ Nyamenle atia Yizilayɛma la? 3#1 Arl 19.10,14 Ɔse, “Awulae, bɛhu wɔ kpɔmanvolɛma ne mɔ amuala, na bɛbubu wɔ azukponle ne mɔ amuala; me ngomekye ala yɛɛ meha a, yɛɛ bɛ nye ɛbolo noko kɛ bɛkpondɛ me bɛahu me.” 4#1 Arl 19.18 Duzu mualɛ a Nyamenle vale manle ye a? Ɔse, “Meva menli apenle nsuu mɔɔ ɛtɛbule ndwɛlɛ wɔ bozonle Beeyale anyunlu ɛlɛ la mezie ɛkɛ memaa me nwo.” 5Zɔhane ala yɛɛ kɛkala noko ɔde a; ye ɛlolɛ ne ati, Nyamenle ɛkpa nu ɛye menli ekyi bie ɛzie ɛkɛ. 6Saa ɛlolɛ zo ala yɛɛ ɔlua a, ɛnee tɛ nyɛleɛ ti ɔ. Ɔluakɛ saa Nyamenle kpa nu aye sonla amaa ɔ nwo wɔ ahenle ne mɔdenlebɔ ti a, ɛnee Nyamenle ɛlolɛ ne ɛnle ɛlolɛ.
7Duzu bieko? Yizilayɛma annyia mɔɔ bɛkpondɛ la. Menli ekyi bie mɔɔ Nyamenle kpale nu yele bɛ la a nyianle ye a. Mɔɔ hale la yɛle anzosesebɛ. 8#Mɛla 29.4; Aye 29.10 Nyamenle Edwɛkɛ ne se, “Nyamenle manle bɛsolole ɔmanle ɛnɛ nee ɛnɛ ala bɛ nye ɛnnwu debie, yɛɛ bɛ nzo ɛnde edwɛkɛ.” 9#Edw 69.22-23 Devidi noko hanle kɛ,
“Bɛ ɛkponledolɛ kɛbɔ bɛ ti tɔɔ,
ɔkɛyɛ kuma nee ndeanlɛ ɔkɛmaa bɛ.
10Bɛ nye kɛzi amaa bɛannwu debie,
bɛkɛnwu bɛ nyunlu dahuu.”
11Ɛnee akee mebiza kɛ, mɔɔ Dwuuma dule koti la, se ɛnee bɛminli bɔkɔɔ? Ɔnle zɔ. Ɔlua bɛ ɛtane ti, ngoanelielɛ vi bɛ ɛkɛ ɛhɔ bɛdabɛ mɔɔ bɛnle Dwuuma la ɛkɛ, amaa Dwuuma anye abolo bɛ. 12Dwuuma ɛtane mɔɔ ɛyɛ la ɛva nyilalɛ dɔɔnwo ɛra ewiade, na bɛ sunsum nu ehyia ɛlilɛ ɛva nyilalɛ ɛrɛlɛ bɛdabɛ mɔɔ bɛnle Dwuuma la. Yemɔti saa Dwuuma amuala baraboka nwo a anrɛɛ nyilalɛ ne bayɛ kpole kpalɛ!
Menli mɔɔ ɛnle Dwuuma la ngoanelielɛ
13Akee metendɛ meahile bɛmɛ mɔɔ bɛnle Dwuuma la, kɛ suzuamgba ala mɔɔ mele ɛzoanvolɛ memaa bɛ la, me nye die me gyima nwo kpalɛ, 14amaa meawula me gɔnwo mɔ Dwuuma anyebolo, na ɔlua zo bɛalie bie mɔ ngoane. 15Ɔluakɛ bɛkpole bɛ la ati dasanli rayɛle Nyamenle agɔnwo, na saa akee bɛdie bɛ bɛto nu a bɛ fɛlɛkolilɛ bayɛ kɛ asɛɛ bɛvi ewule nu bɛdwazo bɛra ngoane nu la. 16Saa bɛfa alumua kpanwo ebule ekyi ne bɛmaa Nyamenle a, ɛnee noko kpanwo kunguma ko ne amuala le ye ɛdeɛ; yɛɛ saa baka bie ndinli anwo te na bɛfa bɛbɔ azu bɛmaa Nyamenle a ɔyɛ boɛ a, ɛnee ye ngane ne mɔ amuala noko anwo te. 17Kɛkala ɛdeɛ Dwuuma le kɛ baka belɛ mɔɔ bɛpepɛ ye ngane ne mɔ bie bɛgua na bɛva bɛmɛ mɔɔ bɛle kɛ baka nyinli la ngane bɛrasisa zolɛ, kɛ bɛnyia nyilalɛ ne mɔɔ vi baka ne anu ba la bie. 18Yemɔti, ɔnle kɛ bɛtu bɛ nwo bɛkile bɛdabɛ mɔɔ bɛpɛ bɛ bɛgua kɛ baka ngane la. Duzu ati a bɛmemaa bɛ nwo zo ɛ? Bɛle ngane ala; tɛ bɛmɛ a bɛsɔ ndinli ne a, ndinli ne a sɔ bɛ a.
19Ɛbaha kɛ, “Ɛhɛe, noko bɛpepɛle ngane zɔhane mɔ bɛguale na bɛvale yɛ bɛsisiale zolɛ.” 20Ɔle nɔhalɛ bɔkɔɔ. Bɛpepɛle bɛ bɛguale, ɔluakɛ bɛanlie bɛanli, na bɛmɛ bɛlie bɛli yemɔti bɛgyi ye kpundii. Noko akee bɛmmafa bɛtu bɛ nwo; anrɛɛ bɛzulo Nyamenle. 21Ɔluakɛ saa Nyamenle anvavi Dwuuma ne mɔɔ le kɛ baka ne ɔdaye ye ngane ne mɔ la a, ɛnee ɔnrɛvavi bɛdabɛ noko. 22Ɛhye maa yɛnwu kɛ Nyamenle si se anwunvɔne na eza ɔ sa yɛ ɛnlomboɛ la. Ɔ sa yɛ ɛnlomboɛ maa bɛdabɛ mɔɔ bɛkpo aze la, noko saa bɛtɛnla ye kpalɛyɛlɛ ne abo dahuu a, anrɛɛ ɔkɛze bɛ anwunvɔne. Na saa bɛanyɛ ye zɔhane a ɔbakpanekpane bɛdabɛ noko yeagua. 23Saa Dwuuma gyakyi bɛ anzosesebɛyɛlɛ ne, na bɛdie bɛdi a bɛbava bɛ bɛazia bɛarazie bɛ bo zo ne, ɔluakɛ Nyamenle lɛ tumi, ɔkola ɔyɛ ye zɔhane bieko. 24Bɛmɛ mɔɔ bɛnle Dwuuma la, bɛle kɛ ɛhoayelɛ nu baka nyinli ngane mɔɔ bɛpepɛ bɛ na bɛva bɛ bɛsisia egyinli nu baka belɛ zo la. Dwuuma le kɛ egyinli nu baka belɛ; yemɔti ɔnyɛ se ɔmmaa Nyamenle kɛ ɔkɛva ngane ne mɔ mɔɔ yepepɛ yevi ɛkɛ ne la ɔkɛziezie bɛ bo zo ne mɔ.
Nyamenle se awie biala anwunvɔne
25Me mediema, nɔhalɛ bie vea ɛkɛ mɔɔ mekulo kɛ bɛnwu ye a, amaa bɛagyakyi kɛ bɛkɛdwenle kɛ asɛɛ bɛze nrɛlɛbɛ somaa. Yemɔ a le kɛ Yizilayɛma anzosesebɛ ne ɛnrɛhɔ zolɛ dahuu; saa bɛdabɛ mɔɔ bɛnle Dwuuma la dodo mɔɔ ba Nyamenle ɛkɛ ne la nyia ba a, anzosesebɛ ne babɔ aze. 26#Aye 59.20 Na ɛhye bamaa Yizilayɛma amuala anyia ngoane, kɛmɔ Nyamenle Edwɛkɛ ne se la. Ɔse,
“Ngoanedievolɛ ne vi Zayɔn bara,
na yearaye amumuyɛ muala yeavi
Gyekɔbo nlɔnra ne mɔ anu.
27 #
Gyɛ 31.33-34
Ngyekyeleɛ ɛhye a saa mefa bɛ ɛtane ne mɔ mekyɛ bɛ a
me nee bɛ bayɛ a.”
28Dwuuma kpole Edwɛkpa ne la ati, Nyamenle ɛyɛ kpɔvolɛ wɔ bɛmɛ mɔɔ bɛnle Dwuuma la ati. Noko kɛmɔ Nyamenle ɛkpa nu ɛye bɛ la ati, bɛle ɔ gɔnwo mɔ wɔ bɛ nlenya mɔ ati. 29Ɔluakɛ Nyamenle ɛngakyi ye adwenle ɛlɛ wɔ menli mɔɔ yekpa nu yeye bɛ na yeyila bɛ la anwo. 30Bɛmɛ mɔɔ bɛnle Dwuuma la, bɛkpole Nyamenle wɔ mekɛ mɔɔ ɛze ɛhɔ la, na ɛnɛ bɛnyia Nyamenle ɛlolɛ ne, ɔluakɛ Dwuuma ɛyɛ anzosesebɛ. 31Zɔhane ala yɛɛ Dwuuma ɛyɛ Nyamenle anwo anzosesebɛ, amaa ɔlua bɛmɛ mɔɔ bɛnle Dwuuma la anwunvɔne mɔɔ Nyamenle ɛze bɛ la azo, yeaze bɛdabɛ Dwuuma anwunvɔne ne bie. 32Ɔluakɛ Nyamenle ɛva ye kɛ menli kɔsɔɔti ɛyɛ anzosesebɛ, amaa yeanwu bɛ muala anwunvɔne.
Ayɛlɛyelɛ ɛha Nyamenle
33 #
Aye 55.8
Nyamenle anwonyia le kpole. Ye nrɛlɛbɛ nee ye adwenle le kpole bo zolɛ. Nwane a kɛhola kɛde ye kpɔkɛ mɔɔ ɔkɛbɔ la abo a? 34#Aye 40.13 Nyamenle Edwɛkɛ ne se,
“Nwane a ze Awulae adwenle a?
Nwane a kɛhola kɛdu ye folɛ a?
35Nwane a ɛhola ɛhyɛ ye debie
mɔɔ ɔwɔ kɛ ɔsie ɔ bo zo a?”
36 #
1 Kɔl 8.6
Ɔdaye a ɔbɔle ninyɛne kɔsɔɔti a, debie biala lua ɔ nwo zo, yɛɛ bɛwɔ ɛkɛ ne bɛmaa ye. Anyunlunyia ɛha Nyamenle dahuu! Amen.
S'ha seleccionat:
Wulo 11: NB
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Bible in Nzema © Bible Society of Ghana, 1998.