Gyi 27
27
Pɔɔlo dua nyevile nye ahɔ Wulomu
1Nzinlii mɔɔ bɛyɛle adwenle kɛ akee ɔwɔ kɛ yɛkɔ Yetale la, bɛvale Pɔɔlo nee pilizama bie mɔ mɔɔ boka nwolɛ la bɛwulale Dwuleɛse mɔɔ le sogya kpanyinli wɔ Wulomu Maanle Maanle belemgbunli ne sogyama ne anu la asa anu. 2Yɛhɔvole ɛlɛne bie mɔɔ vi Adelameteɛm, mɔɔ ɛlɛkɔ Ehyea maanzinli nu la anu na yɛdule. Alesetaakɛse, mɔɔ le Masidoneanli na ɔvi Tɛsalonaeka la boka yɛ nwo. 3Aleɛ hyenle la yɛradwule Saedɛn. Dwuleɛse hilele ye ahunlunyele wɔ Pɔɔlo anwo. Ɔmanle ye adenle ɔmanle ɔhɔle ɔ gɔnwo mɔ anwo kɛ ɔhɔkpondɛ ninyɛne mɔɔ ɔbahyia nwolɛ la. 4Yɛvi Saedɛn yɛdule la ɛnee anwoma ne ɛlɛbɔ atia yɛ. Yemɔti yɛwɔle yɛ ti aze yɛsianenle Saepelɛse aze. 5Yɛluale Selesea nee Pamefelea anwuma yɛrale Maela mɔɔ wɔ Lesea maanzinli nu la. 6Ɛkɛ yɛɛ sogya kpanyinli ne nyianle ɛlɛne bie mɔɔ vi Alɛzandelea ɛlɛkɔ Yetale la, na ɔvale yɛ ɔhɔvole nuhua.
7Yɛdule la ɛnee yɛngola kɔ kpalɛ biala, yemɔti yɛlile kenle dɔɔnwo wɔ adenle nu. Yɛ nwo hyelele yɛ kpalɛ na yɛaradwu Kenaedɛse. Kɛmɔ ɛnee anwoma ne tɛtu tɛtia yɛ la ati, yɛdɛlale bɔra ne mɔɔ bɛfɛlɛ ye Salemoni ala la yɛɛ yɛsianenle Kiliti bɔra ne aze a. 8Yɛsianenle aze kpalɛ kpalɛ, yɛvɛle dedee na yɛrale ɛleka bie mɔɔ bɛfɛlɛ ye “Ahonle Kɛnlɛmazo” mɔɔ ɔ nee Lasia sua zo anwa biala la.
9Yɛhyɛle ɛkɛ kpalɛ na ɔrale kɛ akee yɛkɔ a ɔngɔ, ɔluakɛ mekɛ ne anu ɛnee azule nye ɛvalɛ akee ɛyɛ ɛzulolɛ na eza Buada Ɛvoyia#27.9 Buada Ɛvoyia anzɛɛ Nyamenle Mgbɔdalɛ Kenle: Dwuuma di Ɛvoyia ne wɔ siane ɛhɔnla ne awieleɛ anzɛɛ siane bulu ne mɔlebɛbo. Ɔdwu zɔhane mekɛ ne a azule nye ɛvalɛ yɛ ɛzulolɛ, ɔluakɛ ɔle ahumu nee ezule mekɛ. ne ɛpɛ nu. Ɛhye ati, Pɔɔlo dule folɛ ɛhye: 10“Yɛmenle mɔ, menwu kɛ yɛ adendulɛ ye ɛlɛba arayɛ ɛzulolɛ amaa yɛ. Yɛbaminli ninyɛne dɔɔnwo. Ɛlɛne ye bazɛkye, yɛ ninyɛne bahɔ, yɛɛ yɛdayɛ noko yɛbawu.” 11Na sogya kpanyinli ne adwenle hɔle ɛlɛne menle ne nee mɔɔ nea zo la ɛdeɛ ne mɔɔ bɛhanle la anu, na ɔgyakyile mɔɔ Pɔɔlo hanle la. 12Eza ahonle ne azo bɔbɔ ɛnle kpalɛ biala mɔɔ bɛdi fɔsɛlɛ ɛkɛ ne a ɔyɛ boɛ a. Ɛhye ati bɛdabɛ mɔɔ bɛwɔ ɛlɛne ne anu la anu somaa ne ala hulole kɛ bɛkɛdu bɛkɛdɔ azule nye bieko na bɛkɛbɔ mɔdenle bɛkɛdwu Fonekese mɔɔ lɛ ahonle kpalɛ wɔ Kiliti na ɔ nye wɔ nyiakɛ adɔleɛ nee ɛbɔ nu adɔleɛ la, na bɛkɔdi fɔsɛlɛ ne wɔ ɛkɛ.
Nyevile nye ahumu ne
13Nyiakɛ anwoma bɛtɛɛ bie vɛlɛle, na menli ne dwenlenle kɛ akee ɔwɔ kɛ bɛyɛ, kɛmɔ bɛzuzule ala la. Bɛdule sɛkɛ na bɛsianenle Kiliti bɔra ne aze kpalɛ kpalɛ. 14Noko bɛandwu ɛleka biala yɛɛ anwoma ɛsesebɛ bie mɔɔ vi ɛbɔ nu la dwazole a. 15Ɔkpale yɛ ɛlɛne ne kpalɛ, na kɛmɔ ɛnee yɛyɛ nwolɛ biala a ɔnyɛ boɛ la, yɛgyakyile nu yɛmanle ye kɛ ɔkpa yɛ ɔhɔ ɛleka biala mɔɔ ɔbɔ yɛ yeahɔ la. 16Ɔkpale yɛ ɔhɔluale bɔra ekyi bie mɔɔ bɛfɛlɛ ye Kɔda la aze, na yɛbɔle mɔdenle yɛziele ɛlɛne ekyi ne mɔɔ wɔ ɛlɛnemgbole ne anu la boɛ. 17Bɛkpogyale ye na bɛsosɔle ye nyɛma. Bɛzulole kɛ bɛkɛhɔnwe Lebea ese ne azo la ati, bɛdwulale avela ne mɔ na bɛgyakyile nu kɛ anwoma ne ɛkpa ye ɛhɔ ɛleka biala mɔɔ ɔkulo la. 18Aleɛ hyenle la ɛnee kɛ maanle nu ɛzi ɛmunla, na ahumu ne tɛsa la ati, bɛbɔle ɔ bo kɛ bɛyeye ɛlɛne ne anu ninyɛne ne bie bɛagua nyevile nu. 19Ye kenle nsa ne azo bɛvuandinle ɛlɛne ne anwo ninyɛne ne bie noko bɛguale nyevile nu. 20Kenle dɔɔnwo pɛle nu mɔɔ ɛnee yɛ nye ɛnnwu sɛnzɛne na yeayɛ ɛwɔlɔra a, yɛɛ kɛ ahumu ne noko gyi zo ala ɛne. Yemɔti yɛ nwo vɔle bɔkɔɔ kɛ yeannyia yɛanyɛ boɛ, yɛbawu.
21Menli ne anloa nu dole, yemɔti mekɛ dɔɔnwo ne ala ɛnee bɛnli debie. Na kenle ko Pɔɔlo dwazole gyinlanle bɛ avinli na ɔzele bɛ kɛ, “Ebiamɔ, anrɛɛ bɛvale mɔɔ menganle la, na yɛvi Kiliti yɛandu; anrɛɛ munzule kpole ɛhye kpale yɛ ti na yɛamminli ninyɛne dɔɔnwo ɛhye mɔ. 22Noko kɛkala, mesɛlɛ bɛ, bɛzi ahonle na awie biala ɛnrɛminli ye ngoane; ɛlɛne ye ala a bazɛkye a. 23Nɔe, Nyamenle ne mɔɔ mele ye ɛdeɛ na mesonle ye la soanvolɛ rale me nwo ɛke, 24na ɔzele me kɛ, ‘Pɔɔlo, mmasulo, na ɔwɔ kɛ ɛgyinla Maanle Maanle belemgbunli ne anyunlu. Ɔlua zo Nyamenle ɛva bɛdabɛ mɔɔ bɛ nee wɔ lua nyevile ye anye la amuala ngoane ɛhyɛ wɔ.’ 25Ɛhye ati ayi mɔ, bɛzi ahonle. Medie Nyamenle medi kɛ mɔɔ bɛha bɛhile me la bayɛ zɔhane. 26Noko akee ahumu ne bakpa yɛ ahɔnwe bɔra bie ɛnweanloa.”
27Asɛɛ kenle bulu nee nna ɛnee ahumu ne tɛkpa yɛ wɔ Mɛdetɛlenia nyevile nye. 28Kenle ko ne nɔe ne, kɛyɛ alevinli mu nwiɔ avinli, gyimayɛvoma mɔɔ wɔ ɛlɛne ne anu la nwunle kɛ yɛbikye bɔra bie anwo. 29Bɛzulole kɛ yɛ ɛlɛne ne kɛhɔfofo bolɛ bie azo la ati, bɛdwulale sɛkɛ nna azule nu na yɛzɛlɛle alehyenlɛ. 30Ɛnee gyimayɛvoma ne kpondɛ avi ɛlɛne ne anu anriandi la ati, bɛdwulale ɛlɛne ekyi ne na bɛyɛle kɛ asɛɛ bɛkado sɛkɛ ne bie wɔ ɛlɛnemgbole ne anyunlu lɔ la. 31Pɔɔlo hanle hilele sogya kpanyinli ne kɛ, “Saa gyimayɛvoma ne mɔ andɛnla ɛlɛne ye anu a yɛ nuhua ko bɔbɔ ɛnrɛha.” 32Zɔhane ati sogyama ne pɛle nyɛma ne mɔɔ lɛ ɛlɛne ekyi ne la anu na bɛmanle ɔhɔle.
33Aleɛbahye ne, Pɔɔlo bodole bɛ kɛ bɛ muala bɛli debie. Ɔzele bɛ kɛ, “Ɛnɛ le kenle bulu nee nna ɛne, ahunlundetelɛ ɛmaa bɛlɛ bɛ ko mgbane. 34Yemɔti mesɛlɛ bɛ, bɛli debie ekyi bɛmaa bɛ nwo ɛgyinla bɛ, na bɛ biala ati enrinli ko bɔbɔ ɛnrɛminli.” 35Pɔɔlo hanle ɛhye la, ɔvale kpanwo, ɔyɛle nzɛlɛlɛ, ɔyɛle Nyamenle mo na ɔbɔle ɔ bo kɛ ɔbubu yeali wɔ bɛ nyunlu ɛkɛ. 36Bɛ muala akee bɛzile ahonle, na awie biala lile debie. 37Yɛdayɛ mɔɔ ɛnee yɛwɔ ɛlɛne ne anu la yɛlua ɛya nwiɔ abulasuu nee nsia.#27.37 Ɛya nwiɔ abulasuu nee nsia: Mbuluku bie mɔ se “Ɛya nwiɔ abulasuu nee nnu,” yɛɛ bie mɔ se “kɛyɛ abulasuu nee nsia.” 38Akee mɔɔ awie biala ako yile la bɛdule abɛlɛ mɔɔ wɔ ɛlɛne ne anu la bie bɛguale nyevile nu, amaa ɛlɛne ne ayɛ felafela.
Ɛlɛne ne ɛzialɛ
39Mɔɔ aleɛ hyenle la ɛnee bɛnnwu azɛlɛ holɛ ko mɔɔ bɛra zolɛ la ɛdeɛ, noko bɛnwunle ɛnwea wɔ ye ebolo bie anu, na bɛyɛle kɛ bɛbɔ mɔdenle bɛahɔnwe ɛlɛne ne wɔ ɛkɛ. 40Yemɔti bɛpɛle sɛkɛ ne mɔ amuala anu na bɛzianyinle nyɛma ne mɔɔ lɛ ɛlɛne ne kotogyampa ne anu la. Bɛvolale avela ne mɔɔ wɔ ɛlɛne ne ati la bɛmanle anwoma ne vale ye hɔle aze. 41Na ɛlɛne ne hɔdɔle ɛsa nu; ɔ ti ne minle ɛnwea ne anu mɔɔ bɛtu ye a ɔnyɛ boɛ fee a, na nyevile azɛlɛkye ne bule zile ɔ bo ne bubule ye.
42Sogyama ne yɛle kɛ bɛku pilizama mɔɔ wɔ ɛlɛne ne anu la amuala, amaa bie anweɛ anvo file zo na yeanriandi. 43Na kɛmɔ ɛnee sogya kpanyinli ne kulo kɛ ɔdie Pɔɔlo ngoane la ati, yeamkponle zolɛ. Ɔzele bɛ kɛ bɛdabɛ mɔɔ bɛze weɛ la ɛweɛ ɛhɔ file zo. 44Menli noko mɔɔ hale la bie mɔ sesale ndaboa mɔɔ wɔ ɛlɛne ne anu, mɔɔ ɛlɛtudu ahɔ la bie, bie mɔ noko sosɔle ɛlɛne ne abɛta abɛta ne mɔɔ ɛdudu la anu bɛvole bɛbutubutule zolɛ. Ɛnee kɛ yɛyɛle mɔɔ yɛ muala yɛholale aze dwu la ɛne.
S'ha seleccionat:
Gyi 27: NB
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Bible in Nzema © Bible Society of Ghana, 1998.