Gyi 20
20
Pɔɔlo kɔ Masidonea nee Akaya
1Nzinlii mɔɔ nzakadolɛ ne guale la, Pɔɔlo vɛlɛle ɛdoavolɛma ne na ɔmanle bɛ akɛnrazilɛ, ɔ nee bɛ lile nrɛlaleɛ na ɔhɔle Masidonea. 2Ɔvale maanzinli ne mɔ anu na ɔhɔdendɛle ɔzile ɛdoavolɛma ne mɔ ahonle na akee ɔrale Akaya. 3Ɔlile siane nsa wɔ Akaya. Na mɔɔ ɔhuohuanle ɔ nwo kɛ ɔkɔ Selea la, ɔnwunle kɛ Dwuuma ne ɛhɔ ɔ ti akpamo. Yemɔti ɛkɛ ne ala ɔyɛle ye adwenle kɛ ɔpe aze yealua Masidonea yeazia. 4Na Sosepatɛ, mɔɔ le Pelɛse ara nrenya ne mɔɔ vi Bɛlia, yɛɛ Alesetaakɛse nee Sɛkɛndɛse, mɔɔ vi Tɛsalonaeka, Gayɛse mɔɔ vi Dɛbi, yɛɛ Temɔte, akee Tekekɛse nee Tulofemɛse mɔɔ vi Ehyea maanzinli nu la nee ye a hɔle a. 5Menli ɛhye mɔ lumuale yɛ nyunlu hɔhendɛle yɛ wɔ Tulowase. 6Na mɔɔ Angye Ɛvoyia ne pɛle nu la, yɛvale ɛlɛne yɛvile Felepae; ye kenle nnu ne azo yɛhɔdole bɛ wɔ Tulowase na yɛlile dapɛne ko wɔ ɛkɛ.
Pɔɔlo kakpɔla diedima mɔɔ wɔ Tulowase la
7Dapɛne ne anu kenle ne mɔɔ lumua la nɔsolɛ nu, yɛyiale nu yɛlile Awulae aleɛ ne, na Pɔɔlo dendɛle hilele diedima ne mɔ, ɔluakɛ ɛnee ye alehyenlɛ nu ɔbahɔ, na ɔhɔle zolɛ ɔdendɛle dedee alevinli mu nwiɔ avinli. 8Ahɛnlaneɛ dɔɔnwo wɔ esanwu ne ekpumgbunli ne mɔɔ yɛwɔ nu la anu. 9Na kpavolɛ bie mɔɔ bɛfɛlɛ ye Yutekɛse, mɔɔ ɛnee de nvɛnzɛlɛ ne mɔ ko azo la bɔle ngɔsɔkɛ, na nzinlii ɔlafele kpole na ɔvi esanwu nzɛzo nsa ne azo ɔdɔle aze. Bɛhɔmanle ye zo la, ɛnee yewu bɔkɔɔ. 10Pɔɔlo dwule aze hɔbutule ɔ nwo zo, ɔbɛlale ye na ɔzele bɛ kɛ, “Bɛgyakyi mɔɔ bɛlɛyɛ la na ɔtɛwule.” 11Pɔɔlo ziale hɔle esanwu ne azo bieko na ɔhɔlile debie. Nzinlii eza Pɔɔlo dendɛle hilele menli ne toonwo alehyenlɛ, akee ɔhɛlale bɛ na ɔhɔle. 12Na bɛ nee kpavolɛ ne hɔle sua nu arɛlekyekyelɛ nu mɔɔ ɛnee ɔte kpɔkɛ bɔkɔɔ a.
Pɔɔlo vi Tulowase kɔ Maelitɛse
13Na yɛmɛ yɛvale ɛlɛne yɛlumuale Asɔso kɛ yɛkava Pɔɔlo wɔ ɛkɛ; ɔluakɛ ɛnee ɔ nee yɛ ɛhyehyɛ kɛ ɔpe aze yealumua lɔ. 14Mɔɔ ɔ nee yɛ yiale Asɔso la, ɔravole ɛlɛne ne anu na yɛtelele zolɛ yɛhɔle Metelin. 15Yɛvi ɛkɛ ne la ye alehyenlɛ nu yɛradwule Kayɔso. Aleɛ hyenle bieko la yɛrale Seemɔso, ye alehyenlɛ nu ɛnee yɛwɔ Maelitɛse. 16Pɔɔlo yɛle ye adwenle kɛ ɔnrɛgyinla Ɛfɛsɛse na ɔpɛ nu yeahɔ, amaa yeanzɛkye mekɛ dɔɔnwo wɔ Ehyea maanle ne anu na ɔ nwo ayɛ ndɛ, amaa saa ɔyɛ na ɔkɛyɛ boɛ a, yeadwu Gyɛlusalɛm wɔ Pɛntekɔso kenle ne.
Pɔɔlo nee Ɛfɛsɛse asɔne mgbanyima di nrɛlaleɛ
17Pɔɔlo dole Ɛfɛsɛse asɔne mgbanyima ne mɔ nrɛlaleɛ kɛ bɛyia ye wɔ Maelitɛse. 18Bɛrale la ɔzele bɛ kɛ, “Bɛdabɛ bɛnwu kɛ mezi mebɔ me ɛbɛla, ɔvi kenle mɔɔ membandwule Ehyea maanle ye anu toonwo mɔɔ ɛradwu ɛnɛ la. 19Wɔ Dwuuma akpamo ne mɔ mɔɔ bɛvale wɔ me ti la amuala anu, mendole me nwo aze menvale monle nee amaneɛnwunlɛ menyɛle me gyima kɛ Awulae akɛlɛ. 20Bɛze kɛ meanva debie biala mɔɔ kɛyɛ moalɛ kɛmaa bɛ la meanvea bɛ, na menzile me ahonle mengilehilele bɛ wɔ bagua nu nee bɛ azua nu. 21Mengakyele Dwuuma nee bɛdabɛ mɔɔ bɛnle Dwuuma la amuala kɛ bɛnlu bɛ nwo wɔ bɛ ɛtane ne mɔ mɔɔ bɛyɛ bɛtia Nyamenle la anwo na bɛlie yɛ Awulae Gyisɛse bɛli. 22Kɛkala melɛkɔ Gyɛlusalɛm, kɛmɔ Sunsum ne ɛhile la. Menze mɔɔ bazi me nwo zo wɔ ɛkɛ ne a, 23mɔɔ meze la a le kɛ Sunsum Nwuanzanwuanza ne ɛhakye me wɔ sua biala azo kɛ efiadedolɛ nee esiane yɛɛ ɛlɛkendɛ me a. 24#2 Tem 4.7 Noko me ngoane ɛdeɛ, mendwenle nwolɛ, amaa meahola meawie Awulae Gyisɛse gyima ne mɔɔ yeva yemaa me kɛ membɔ Edwɛkpa ne mɔɔ fane Nyamenle ɛlolɛ ne anwo la nolo.
25“Mekpɔsa bɛ nwo zo meha Nyamenle Belemgbunlililɛ ne anwo edwɛkɛ mehile bɛ. Kɛkala, bɛ biala ɛnrɛnwu me nyunlu bieko. 26Ɛhye ati memaa bɛade ɔ bo wienyi ɛnɛ kenle ye kɛ saa bɛ nuhua biala minli a, menli nwolɛ ɛzonle. 27Ɔluakɛ meanva debie biala mɔɔ fane Nyamenle ngyehyɛlɛ ne anwo la meanvea bɛ. 28Bɛnlea bɛ nwo boɛ na bɛnlea mboane ne mɔ mɔɔ Sunsum Nwuanzanwuanza ne ɛva bɛ ɛwula bɛ sa nu la boɛ. Bɛnlea Nyamenle asɔne ne mɔɔ yeva ɔ Ra ne mogya a yekpondɛ la azo boɛ. 29Meze kɛ saa mekɔ a, bɛdi anwo ɛzulolɛ baragua mboane ne mɔ avinli, na bɛnrɛze bɛ anwunvɔne fee. 30Mekɛ bara mɔɔ menli vi bɛ avinli badwazo araha edwɛkɛ adalɛ ahwe diedima ne bie mɔ ahɔli bɛ nzi a. 31Yemɔti bɛnlea boɛ, na bɛhakye kɛ mendwinle monle ɛvolɛ nsa a mengilehilele bɛ wɔ nɔɔzo nee ewiazo a.
32“Kɛkala mefa bɛ mewula Nyamenle nee ye edwɛkɛ ne mɔɔ ɛlolɛ wɔ nu la asa anu. Ɔdo bɛ ngoane nu na ɔva ye nyilalɛ ne mɔɔ yeva yezie ye menli ne ɛkɛ ne la ɔmaa bɛ. 33Me nye ambolo awie biala ezukoa nvutuke, dwɛtɛ fufule anzɛɛ ndanlɛ. 34Bɛdabɛ bɛze kɛ medame me sa anloa gyima mɔɔ meyɛ la yɛɛ meva menlea me nwo nee me gɔnwo mɔ a. 35Mehilehile bɛ wɔ debie biala anu kɛ ɔlua gyima ɛsesebɛ ɛyɛlɛ zo yɛɛ bɛkɛhola bɛkɛboa menli mɔɔ ɛnlɛ anwosesebɛ la a. Bɛhakye Awulae Gyisɛse edwɛkɛ ne mɔɔ ɔhanle la. Ɔse, ‘Nyilalɛ dɔɔnwo wɔ ɛmanlɛ nu tɛla ɛlielɛ.’ ”
36Mɔɔ Pɔɔlo wiele la, ɔ nee bɛ bɛ muala bɛhotole na bɛyɛle nzɛlɛlɛ. 37Mɔɔ bɛlɛfua ye, bɛlɛfo ɔ nvoka anwo bɛayɛ ye tia boɛ la, ɛnee biala ɛlɛsu. 38Debie mɔɔ manle bɛ nwo bubule bɛ kpalɛ bɔbɔ la a le ye edwɛkɛ kpɔkɛ ne mɔɔ ɔhanle kɛ bɛnrɛnwu ye bieko la. Na bɛhɔzɔhonle ye wɔ ɛlɛne ne anwo.
S'ha seleccionat:
Gyi 20: NB
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Bible in Nzema © Bible Society of Ghana, 1998.