Ɛyf 9

Sool kubsen è beeme Jesus

1Ko se lu nɛ Sool bo nduu kɛn ɛ mbiy nɛ̀ ɛyyuyte ghel ɛbeemene, è me ndu è yɛn ketuu se ghɛ́ ntaŋlee, 2è lon ge əb nyak ŋwaale se ngayse ɛyjem sɛ se luun ɛ Damaskus è fo əbtaawe se yi, é yi ndu fo è kɛŋ ghel ghɛ ɛ́ jumten ɛybame Jesus ghɛ luun fo, kene ɛluumen, kene əbkiy, é yɛ koo gwiy so se Jolesalem.

3Sool me lòò è se nduu ɛ Damaskus. Ka əb nduun è loo baksen ɛ leghɛ kefaa me liak ɛyyio ka ɛyghuu è chite wen. 4Əb fɛy se ntiɛ è yio ka giɛ suuyen se wen ge: Sool, Sool! Wɛ̀ nəkse mɛ lɛ bek ghɛ?

5Əb bif ge: Lu wɛ̀ ndɛ, Báàba? Giɛ yi fise ge: “Lu mɛ Jesus wɛ wɛ̀ nəksen. 6Loole se ɛyyio, è lii ɛ məme ntɛk, ɛ́ suuy kenəə kɛ wɛ̀ luun se nɛɛy.”

7Ghel ghɛ ghene ghe Sool nè jɛ́len se tiy fo, yio giɛ yi, yɛne wiy wel, nɛ əbchio yúm ghene. 8Sool loole se ntiɛ è yìàse ɛshiɛ ə wen è jia gese yɛn kelik. Ɛ́ me ghal wen ɛ keghoo è lii sô se Damaskus. 9Əb chii fo se əbchii əbtal, yɛne wiy əblik, nɛ̀ əb báà yiɛ kefaa è jia nəə kefaa.

10Wel əbbeemen əblee nè lu ɛ Damaskus əbliy fo, nɛ ɛyghel ə wene lu Ananias. Kuumese koo wen nɛ Báàba toŋte wen ge: Ananias. Əb fise ge: Mɛ vine Báàba. 11Báàba me suuy se wen ge: Loole è ndu ɛ jii yɛ ɛ́ toŋten ge Titiy. Wɛ̀ chin ɛ Judas ə ndaa wɛ̀ bif ge wele wɛ̂ Talsus wɛ ɛ́ toŋten ge Sool sɛ waay-a! Bek ge əb lu fô jeme. 12Kuumese kè koomen wen ge wel nɛ toŋte ge Ananias, gwiy è lii ɛ ndaa è lɛm keghoo ɛ yi ə ketuu ge ɛshiɛ ə ghi yiase. 13Ananias me suuy ge: Báàba, mɛ lu nɛ mɛ yiomen se ghel se ɛydio kum mbɛm yɛ wel vine feken se ghel ə ghiɛ ɛ Jolesalem. 14Se lu nɛ əb fiimen əbtaawe se ghele mbiy se ghɛ́ ntaŋlee è gwiy fɛn se koote ghel ghɛ ɛ́ jemen ɛ wɛ̀ ɛyghel.

15Báàba suuy se wen ge: Ndu fo, bek ge mɛ chokmen wen ge wel ɛyfɛl nə mɛ ge əb yɛ fekte kenəə ə kom se ghel əbtume, ghene tefon ə ghene, è gese yɛ fekte se ghele Islaele. 16Mɛ nɛ̂y din é əb yɛn əbnəə əbjim wɛ ə́b luun se yɛne ngɛk ɛ ten bek mɛ.

17Ananias me ndu è lii ɛ ndaa fɛy, è lɛm ɛghoo ə wen ɛ Sool ə ketuu è suuy se wen ge: Wan-nyii Sool, Báàba Jesus tum mɛ se wɛ̀. Lu wen wɛ wɛ̀ kè yɛnen ɛ jii əbliy wɛ wɛ̀ kè gwiyen fɛn. Əb tum mɛ ge wɛ̀ kase yɛn əblik, é Keyioy Kelanene lun se wɛ̀ ɛytem. 18Kɛn dî ɛ leghɛ əbfua chemke ɛ Sool ɛshiɛ ka ngakse səəse. Əb me kase se yɛne əblik è tum è loole se ɛyyio, è ndu ɛ́ fó moo se wen ka wel əbbeemen, 19è nɛy yiɛ kefaa, è me kase kiile kediak.

Sool fekte kenəə Jesus ɛ Damaskus

Sool me chii ɛ Damaskus ghene ghon-ɛyfɛl nə Jesus se keleŋ əbliy, 20è me ndu kaŋ ɛymok ɛ ngayse ɛyjem è se fekte kenəə kɛ kum Jesus, suuye ge: Jesus lu wán ə Feyin.

21Ghel ɛjim ghɛ ɛ́ nè yion wen se ghɛynene ge, sɛ báà se lu wel vin wɛ əb ne ghanen yúyten ghel ghɛ ɛ́ koksen ɛyghel ə Jesus ɛ Jolesalem-a? Əb lɛ ne báà gwiy fɛn se koote ghene se liɛ se ndu so se əbtuu ghɛ́ ntaŋle-a?

22Dî Sool se fekte nduu kɛn ɛ mbiy dine ge Jesus lu Vi wɛ Feyine nè Yiosen. Jii yɛ əb nè fekten ɛ ten nè lô nɛɛy ghele Juus ghɛ ɛ́ nè chiin ɛ Damaskus jia se ki jii yɛ ghene nè lòó fise kenəə se wen se kan.

23Se lu ɛybam əbchii se ɛydio, ghele Juus kal əmnaŋ ge ɛ́ yúy Sool, 24dî Sool me keele ntaŋ ə ghen. Ghene nè guo wen ɛ əbchio kengɛye kɛ́ Damaskuse nɛ ntəke nɛ nchuy ge əb nɛ̂y loo chia ɛ́ yúy. 25Nɛy se lu ɛ ntək əblee, ghele ngoo nə wen me vii wen se nkaa è yakse è chiase ɛ nsane kengɛy è səkse wen ɛ bɛy əb nyiŋ.

Sool ndu ɛ Jolesalem

26Sool nɛ̂y fiile se Jolesalem, è loo kɛŋ se chintene kenone ghon-ɛyfɛl nə Jesus, ghene se fane wen bek ge ghene nè báà se beeme ge əb lu wele ngoo nə ghen. 27Balnabas me liɛ wen, ghene wen ndu è yɛn ghɛ́ ntum nə Jesuse. Əb fiɛl ka Sool nè yɛnen Báàba Jesus ɛ jii, əb suŋnen se wen. Əb gese fiɛl ka Sool nè fekten kenəə kɛ kum Jesus ɛ Damaskus fane wiy. 28Sool me gok ghene ghene è se ghane fekte kenəə kɛ kum Báàba Jesus ɛ Jolesalem fane wiy. 29Əb nè lô se beke mbek kom Jesus ghene ghele Juus ɛlee ghɛ ɛ́ nè suŋnen əblame Gleek. Ghene nɛy lòò è se kɛŋe se yuye wen. 30Ghone-nyii keele ge ɛ́ kɛŋe se yuye wen, è liɛ wen è chio so se Saesalea, è tinse əb ndu se Talsus.

31Ngɛk yɛ əbnone ghel ɛbeemene ɛjime ghɛ́ Judea, nɛ̀ Galilee gese nɛ̀ Samalia nè yɛnen me mɛy, ghene me taa è se dio gwiye, jɛle ka Feyine kɛŋen, nɛ Keyioy Kelanene foo əbtaawe se ghene.

Bita ndu ɛ ntɛk sɛ Lidda nɛ̀ Jobba

32Bita nè jɛle əblik əbjim, nɛy se lu əbliy əblee əb ndu se ghane ghele Feyine ghɛ́ Lidda. 33Ɛ́ yɛn wel əbləmen əblee fô nɛ ɛyghele lu Aeneas nɛ əb gonmen se nguk ɛyfaame, yese nyiŋ kɛn əbkun. 34Bita me suuy se wen ge: Aeneas, Jesus Christe chuk wɛ̀, loole è nɛyte əbkun ə viɛ. Əb me loole kɛn se əbliy. 35Ghel ɛjime ghɛ́ Lidda nɛ̀ Shalon yɛn wel vi è me kubsen è fo tetem ə ghen se Báàba Jesus.

36Əbvii əblee nè lu ɛ Jobba nɛ lu wel əbbeemen nɛ ɛ́ toŋte ge Tabita, dii Dolkas. #9.36 Ɛyghel yɛ Tabita əblame Gleek lu ge Dolkas, nè lu ge fechuy. Əb nè lóó əb yɛ nɛɛye əbnəə əbjuŋe əbliy əbjim, giamten ghɛ́ ketane. 37Nè lu ɛ keleŋ əbliy fo, ɛyyafe koo wen əb me kuo. Ɛ́ suu ɛygvən ə wen è kok so è lɛm ɛ ndaa yɛ̂ ɛyyio. 38Lidda nè baksen se Jobba, ghele ngoo nə ghene yio ge Bita lu ɛ Lidda è me tum ghel ɛbaa nɛ̀ ntum yin ge: Kiy wɛ̀, yaŋse gwiy è yɛn ghɛs. 39Bita me loole ghene ghene ndu è chin fo, ɛ́ liɛ wen è kok so se ndaa yɛ̂ ɛyyio fɛy. Əbkiy ə nkfə ɛjime nè toŋnene dine ndəy sɛ Dolkas nè tasen, è giate se ghene nɛ əb bɛɛy ghàà kuo. 40Bita suuy ghene ghel ɛjim fəy se bɛy, əb təm ɛləy, è jem, è lòò è benle è suuy se ɛygvən əbvii vi ge: Tabita, loole se ɛyyio. Əb yiase ɛshiɛ ə wen, è yɛn Bita è loole è diom. 41Bita ghal keghoo ə wen, əb loole se ɛyyio. Əb me jaŋte ghel ə Feyin naa ɛjim nɛ̀ əbkiy ə nkfə ghii è din wen se ghene nɛ əb shi əbtaa. 42Ghel ɛjim ɛ ntɛke Jobba yio kenəə ki, ghel se ɛydio vii ɛytem se Báàba əbghun. 43Bita nɛy me chii ɛ Jobba se əbtəm ghene Simon wɛ əb nè táàn guose.

S'ha seleccionat:

Ɛyf 9: oku

Subratllat

Copia

Compara

Comparteix

Vols que els teus subratllats es desin a tots els teus dispositius? Registra't o inicia sessió

©CABTAL, 2012

Més informació sobre Ŋwaale Feyin; Kelek Kefɛɛ

Ɛyf 9

Versets bíblics populars de
Ɛyf 9

Escolta Ɛyf 9

La Bíblia:

Oku

Versió: Ŋwaale Feyin; Kelek Kefɛɛ - oku

Ɛyf 9

Ɛyf 9

Versets bíblics populars de Ɛyf 9

Escolta Ɛyf 9

La Bíblia:

Oku

Versió: Ŋwaale Feyin; Kelek Kefɛɛ - oku

Ɛyf 9

Versets bíblics populars de
Ɛyf 9