Ɛyf 15
15
Ɛydiom yɛ ghel ɛbeemene nè ghalen ɛ Jolesalem
1Ghel ɛlee nɛy lòò ɛ Judea è chio Antiok è me se dinte se ghel ɛbeemene ge: Lòó Feyine jia náà boyse ghɛn buu ge ɛ́ nɛyte ghɛn ka ɛysak ə Moses dinen. 2Kii nɛ̂ kine nɛɛy ghene ghe Bool me se beke nɛ lu se mbek ketaan, ɛ́ me liɛ ge Bool ghene Balnabas gese nɛ̀ ghel ɛbeemene ɛlee kok ɛ Jolesalem è yɛn ghɛ́ ntum nə Jesus nɛ̀ ghele mbiye se ghel ɛbeemene kum kenəə ten.
3Ka kenchintene tumen ghene di, ghene loò è se tosen ɛ Foenisia ghene se Samalia fekte kum ka ghel əbtume béémen kenəə ə Feyin. Sakghɛ vin nɛɛy ghel ɛbeemene se saŋle naa se ŋaŋ. 4Ghene ndu è chin ɛ Jolesalem, kenchintene ghel ɛbeemene, nɛ̀ ghɛ́ ntum nə Jesus ghene ghele mbiye se ghel ɛbeemene fiisen ghene. Bool ghene Balnabas fekte se ghene əbnəə əbjim wɛ Feyine nè foon kediak ghene nɛɛy. 5Dî ghel ɛbeemene ɛlee ghɛ ɛ́ nè luun ɛ kenone Falisee teem ɛyyio è suuy ge: Ɛ́ lu se yɛ nɛyte ghel əbtum, nɛ ghene gese lɛme tesak ə Moses.
6Ghɛ́ ntum nə Jesus ghene ghele mbiye me diom se kiynen kenəə kɛ́ tene. 7Ghene gufnen se əbtəm, Bita me loole è suuy se ghene ge: Ghone-nyii, ké ghɛn ke ge nè lu ɛ kenkɛɛte, Feyine chok mɛ ɛ ghɛne məm ge mɛ fekte sakghɛ əbjuŋ se ghel əbtume é ghene yio è beeme se Báàba. 8Feyin wɛ əb keen ɛytem ə wel əbjim tinse Keyioy Kelanene se ghene kɛn ka Fe nè tinsen se ghɛsen, se din ge yi lu nɛ yi fiisen ghɛne. 9Əb nè báà din əmndun-ndun ɛ ghɛsen nɛ̀ ghene məm ɛ jii yɛ əb nè lɛyse mbeese ghen bek ka ghene nè foon ɛytem se Jesus. 10Se lu bek ghɛ wɛ ghɛne kɛŋen se momse Feyin nɛ̀ kembuŋ kɛ ghɛne kɛŋen se kokse se ghel ɛbeemene ghine ketuu, nɛ ke nè ghakmen ghɛsen nɛ̀ ɛbaa ɛbaa ə ghɛsen se bɛɛy? 11Ɛngaŋ, kɛ ghɛsen beemen se ten lu ge, lu kɛn bek njuŋ yɛ Jesus nè nɛɛyen se ghɛsen wɛ Feyine boysen ghɛsen, ghɛɛ-ghɛɛ ka əb boysen ghene.
12Bita suŋnen dì, ndaa ghusen è se yióté ka Bool ghene Balnabas fɛkten əbnəə əbchio əbyúméné, nɛ̀ əbkanene wɛ Feyine nè foon kediak ghene se nɛɛye əbtume məm. 13Ghene suŋnen è mɛyse, Jɛms suuy ge: Ghone-nyii, ghɛn yióté se mɛ. 14Simon fiɛlmen se ghɛsen ka Feyine nè kɛɛten se yɛ kwaate əbtum, è chok ghel ɛ ghene məm ge yɛ lu ghii. 15Əbnəə wɛ ghɛ́ ntum nə Feyine nè suuyen lu nɛ əb kwɛnten ghene kinee, ka ɛ́ nè nyaken ge:
16“Ɛ́ yî yɛ lu ɛ kechii kelee é mɛ kase gwiy,
è bàklè ndaa ə David yɛ ɛy nè fɛyenmen.
Mɛ nɛ̂y kase siyse kensake ten,
è nɛɛy é ɛy yɛ lu ka ɛy nè yi luun,
17Ka ghel ɛlee me yɛ mɛyse bììte Bay,
dii ghel əbtum ɛjim ghɛ mɛ choktenmen ge ghome.
18Suuy Bay wɛ əb nè nɛɛyen ghele keele əbnəə
nɛ̂ vin se əbməən.”
19Mɛ me se yɛne kome ge, ghàà ghɛsen yɛ jefse ghel əbtum ghɛ ɛ́ foon ɛytem se Feyine. 20Ghɛsen nyak nɛ lu ŋwaale se ghene ge ghàà ghene yɛ yiɛ əbfua-əbyíɛ́ne wɛ ɛ́ besenmen, bek ka ɛ́ chiysenmen əmnyin so, è maay nchiine kenjaŋ, è yɛ lɛke nyam yɛ ɛ́ kamen kamen è yúyte, è gese yɛ lɛk əmnduŋ. 21Ɛ́ nyak kɛn dì bek ge ɛ́ nè se fekte tesak ə Moses ɛ ntɛk sejim naa se nguk gese jaŋe ɛ ngayse ɛyjim sejim ɛ əbchii ɛybam əbjim.
Ŋwaale yɛ ɛ́ nè nyaken se ghel ɛbeemene ghɛ luun əbtum
22Ghɛ́ ntum nə Jesus ghene chɛɛse, gese nɛ̀ kenchintene ghel ɛbeemene, me liɛ ge ɛ́ chokte ghel ɛlee ɛ kenon è baksen se Bool ghene Balnabas è tum se Antiok. Ghene nè chok Judas wɛ ɛ́ nè toŋten sɛy ge Balsabbas, è gese chok Silas. Ghel ghɛ ɛbaa ghine nè lu ghele mbiy ɛ kenchinten. 23Ɛ́ nè tum ghene nɛ̀ ŋwaale nɛ ɛy suuy ge: Ghɛs ghɛ ghon ɛnoo ə ghɛn, ghɛ ghɛ́ ntum nə Jesuse, gese nɛ̀ chɛɛse tinse ɛychakte se ghɛn ghɛ ghel ɛbeemene ghɛ luun əbtum chii Antiok, nɛ̀ se Silia gese nɛ̀ se Silisia. 24Ghɛs nè lô yio ge ghel ɛlee lu nɛ ɛ́ fəy ɛ ghɛse məm nɛ ghɛse báà tum ghene, è ndu è se foo ngɛk se ghɛn, jefse tetof ə tɛn nɛ̀ əbnəə wɛ ghene suuyen. 25Ghɛse me ghal ɛydiom è liɛ ge ɛ́ chokte ghel ɛlee è baksen se ghel ɛyjɛl nə ghɛsen ghɛ Balnabas ghene Bool è tum se ghɛn. 26Ghel ghɛ ɛbaa ghine lu ghel ghɛ ɛ́ nè summen ɛykuo se yɛ fɛl se Báàba ə wɛsen Jesus Christ. 27Ghɛse me tum Judas ghene Silas ge ghene ndu se ghɛn è teefe naa teefen kenəə kɛ ghɛs nyaken ɛ ŋwaale. 28Keyioy Kelanene nɛɛy ghɛse yɛn ge ke báà jof ge ɛ́ kokse kediile ɛ ghɛne ketuu chia ge ghɛn yɛ lɛme tesak tin tɛ te luun ɛ shii: 29Ghàà wel yi yiɛ kefaa nɛ ɛ́ chiysemen əmnyin so. Ghɛn yɛ lɛk əmnduŋ. Ghɛn yɛ lɛke nyam yɛ ɛ́ kamen kamen è yuyte. Ghɛn maay nchiine kenjaŋ. Ghɛne báàmè əbnəə vin fene ghɛne nɛɛy ɛ titiy. Ɛ́ yɛ bɛɛse.
30Ɛ́ nyak dì è tinse ghel ghi, ghene chio se Antiok, è baate kenchintene ghel ɛbeemene, fo ŋwaale yi se ghene. 31Ghene jaŋ, è se saŋle bek ntef yɛ ɛy nè luun ɛ ten. 32Judas ghene Silas ghɛ ko nè luun sɛy ghele ntum nə Feyine me se suuye əbnəə se ɛydio, tefe ghene gese foo kediak se ghel ɛbeemene. 33Nɛy se lu ka ghene ghe ghone-nyii nè chiin se keleŋ əbliy, ɛ́ tinse ghene ge ghene jɛl kejuŋ, ghene kase fiile se ghel ghɛ ɛ́ nè tumen ghene. 34(Dî Silas liɛ ge yi gok fo.)
35Bool ghene Balnabas se lu Antiok se keleŋ əbliy, ghene ghel ɛlee se ɛydio se dinte əbnəə se ghele, fekte sakghɛ ə Báàba.
Bool ghene Balnabas giabsen
36Nɛy se lu ɛ keleŋ əbliy kelee Bool suuy se Balnabas ge: Ghɛsoo kase fiile se ntɛk sejim sɛ ghɛsoo nè fekten kenəə Báàba ɛ ten è yɛn ge ghel ɛbeemene sɛ nɛɛy lɛɛy-a? 37Balnabas me se kɛŋe ge ɛ́ liɛ Joon wɛ ɛ́ nè toŋten ge Mak. 38Bool yɛn kɛ́ wene nɛ lu ge ke báà jof ge ɛ́ liɛ wen bek ka ghene ghene nè lômen ndu è chin ɛ Bamfilia, əb fiile è jia ndu ɛ mbiy nɛ̀ ɛyfɛl yɛ ghene ghene nè fɛ́len. 39Ghene lòò è me bek kenəə ki ɛ jii ɛylee yɛ ɛ́ nè lòòn è giabsen giabsen. Balnabas liɛ Mak ghene wen diaŋ se Siblus. 40Bool chok nɛ lu Silas, ghel ɛbeemene vii ghene se Báàba keghoo ge əb yɛ toknen nɛ̀ ghene. 41Ghene me lòò è se tosen ɛ Silia nɛ̀ Silisia, lose nduu nɛ̀ əbchintene ghel ɛbeemene.
S'ha seleccionat:
Ɛyf 15: oku
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
©CABTAL, 2012