2 Kɔrɩntɩ Nɩaa 9
9
1Ʋ bɩ maga dɩ mɩ bɩra ŋmʋnsɛ teniŋ pɩma a bʋbʋl kɩalɩŋ ma sɩ kɩɛsa pɩla dɩ la kaa mʋ pɩpɩ Wɩa nɩaa sɩ hɛ Jerusalɛm lɛ wɩaa, 2bɛɛ wɩaa mɩ paala jɩŋ arɩ ma kɛŋ ma tɩtɩa nɛ dɩ ma pɛ ba lɛ. Ŋɩɩ wɩaa nɛ tɩɩ mɩ bigisi ma lɛ a pɩ Wɩa nɩalɩŋ sɩ hɛ Masidoonia tinteeŋ lɛ. Mɩ bʋla pɩba arɩ nɩalɩŋ sɩ hɛ Akaaya tinteeŋ lɛ kɛŋ ba tɩtɩa hɛ dɔŋɔ harɩŋ jɩna-la lɛ nɛ dɩ ba pɛ Wɩa nɩaa lɛ. Ma sɩ fɩɛsɛ sɩɩŋ ŋɩɩ, ma leŋe ba nɩaa jesiŋ kala nɛ cho dɩ ba pɛ a kɩɛsɛ kɩaa pɩpɩ nɩalɩŋ. 3Mɩ laa sɩpaaŋ tɩtɩŋ mɩ naambiiriŋ deemba dɩ ba kɔ ma teeŋ, dɩ ŋɩɩ mɩ sɩ bigisi ma lɛ a tɩgɛ wɩɩŋ deeŋ lɛ sɩ́ wʋnyɩɛrʋ ŋaa. Ka dɩ ma wuo chɛ kɩalɩŋ bil arɩ mɩ sɩ bʋl ŋɩɩ. 4Dɩ Masidoonia tɩŋŋaa dɔnsʋŋ nɛ to mɩ harɩŋ kɔ, a na dɩ ma ha bɩ kɩalɩŋ chɛ bil, hɩɩsɩŋ jaŋ diila, a diima ma a tɩŋ la sɩ bigisi ma lɛ ŋɩɩ wɩaa. 5Ŋɩɩ nɛ tɩɩ mɩ bɩɩnɛ dɩ ʋ maga dɩ mɩ tɩŋ mɩ naambiiriŋ deemba dɩ ba laa sɩpaaŋ kɔ mɩ lɛ, dɩ kɩalɩŋ ma sɩ bʋla arɩ ma jaŋ kɩɛsa pɛ Wɩa nɩaa lɛ, dɩ ma joŋo hɛ dɔŋɔ lɛ, ka dɩ mɩ-na kɔ. Ŋɩɩ jaŋ dagɛ arɩ ma tɩtɩa tʋɔtɔrʋŋ lɛ nɛ ma kɩɛsɛ kɩalɩŋ, mɩ bɩ ma fʋga dɩ ma ŋaa ŋɩɩ.
6Má sɩ́ wɩɩŋ deeŋ yʋ. Dɩ ŋ nɛ joŋ kʋdoho mʋa duu, kɩaa mʋa nɛ ŋ jaŋ kʋŋ, ama dɩ ŋ kʋdoho nɛ yʋga dɩ ŋ joŋo duu, ŋ jaŋ kʋŋ kɩaa yʋgɛ. 7Nʋʋkala magɛ dɩ ʋ tɩa magɛ ŋɩɩ ʋ tʋɔbɩɩnaa sɩ daga nɛ. Ʋ bɩ maga dɩ ʋ ŋaa saka saka. Ʋ bɩ maga dɩ ʋ bɩɩnɛ arɩ baa fʋgʋ nɛ dɩ ʋ pɩ kɩalɩŋ. Nʋʋkala maga dɩ ʋ tɩa kɩaa ʋ tʋɔtɔrʋŋ lɛ nɛ, bɛɛ wɩaa Wɩa cho nɩɩ-la sɩɩ pa arɩ tʋɔtɔrʋŋ nɛ. 8Wɩa kɛŋ doluŋ, ʋ jaŋ wuo pɩma kʋŋkala ma sɩɩ chɛ. Ʋ jaŋ paala faasa pɩma kʋŋkala ma sɩɩ chɛ dɩ ma kaa wasɛ ma tɩtɩa aŋ ka, a kɛŋ kʋkaanaa ma pɛ ma dɔnsʋŋ tɩŋŋaa lɛ. 9Ŋ-la nɛ ba bʋl Wɩa teniŋ tʋɔŋ. Ba sɩ,
“Ʋ yie joŋ kɩaa didii zile summoo lɛ nɛ. Ʋ zile bɩ dɛrɛ.”
10Wɩa nɛ yie joŋ kʋdoho a pɩ paara ʋ duu, ʋ nɛ yie pʋ kʋdiilee ʋ didii. Ŋɩɩ wɩaa ʋ jaŋ pɩma kɩaa a leŋ dɩ ba pʋŋa pɛ bʋa na-kala lɛ. Ʋ sɩ leŋe ma kɩaa pʋŋa pɩpɛ ŋɩɩ, ʋ jaŋ leŋ dɩ ma ma kɛŋ zile kɩŋkɛŋ a pɩpɛ nɩaa lɛ. 11Wɩa jaŋ leŋ dɩ ma nɩsɩŋ jʋjʋʋ wɩɩ na-kala ma sɩɩ ŋaa lɛ, dɩ ŋɩɩ leŋ dɩ ma faasa kɛŋ zile a pɩpɛ nɩaa lɛ woruŋ. Dɩ ba nɛ laa kɩalɩŋ ma sɩ joŋo pɩba, ba jaŋ lɔllɛ Wɩa. 12Kɩalɩŋ ma sɩ joŋo pɩ Wɩa nɩalɩŋ, ʋ bɩ naga ba kʋchɛɛlɛɛ dʋndʋŋa nɛ ma pɩba ŋɩɩ. Ama ŋɩɩ jaŋ leŋ dɩ ba faasa lɔllɛ Wɩa kɩŋkɛŋ dɩ ʋ yɩrɩŋ yɩrɛ. 13Kɩalɩŋ ma sɩ joŋo pɩba daga ŋɩɩ ma sɩ naga nɛ. Nɩaa jaŋ yʋgɛ a dɛnnɛ Wɩa, a tɩŋ ma sɩ nɩɩ Wɩa wʋzɔmɔ-la sɩ tɩgɛ Kirisito lɛ a laa dii a tutoba. Ŋɩɩ ma dʋndʋŋa dee, ba jaŋ dɛnnɛ Wɩa a tɩŋ kɩalɩŋ ma sɩ joŋo dii zile, ba dɩ nɩalɩŋ kala lɛ. 14Ba jaŋ sʋl Wɩa pɩpɩma aŋ chichel dɩ ba nama, bɛɛ wɩaa zil-bal-bal nɛ Wɩa ŋaa ma lɛ. 15Laa lɔllɛ Wɩa a tɩŋ wʋbalbal-la ʋ sɩ joŋo pɩla pɛɩ.
S'ha seleccionat:
2 Kɔrɩntɩ Nɩaa 9: SIS
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
©Ghana Institute of Linguistics Literacy and Bible Translation 1984, 2014