Filipenses 4
4
Tukuy tiempo kusikunanchikmanta
1Kuyasqay wawqe-panillaykuna, Señorninchik Jesucristopiyá allinta takyaychik. Qamkuna qawaykuytam llumpayllataña munachkani, qamkunaqa huk hatun premiom ñoqapaq kankichik.
2Evodiatawan Sintiquetam ruegakuni, Señorninchikman iñiqkuna hina huk sonqolla kanankupaq. 3Llamkaqmasilláy, qamtañataqmi valekuyki chay paninchikkunata yanapaykunaykipaq. Paykunapas yanapaykuwarqakum Cristomanta allin noticiata willakuptiy, yanapaykuwarqataqmi Clementewan wakin llam-kaqmasiykunapas. Paykunapa sutinqa wiñay kawsay libropi qellqasqañam kachkan.
4Señorninchikwan huklla kaspayá tukuy tiempo kusikuychik, huktawanraqmi nikichik: Kusikuychikyá, nispa. 5Lliw runakunawanyá reqsichikuychik kuyakuq sonqo kasqaykichikta. Señorninchikpa kutimunanqa hichpallañam kachkan.
6Amayá imamantapas afanakuychikchu, aswanqa Diosta mañakuspayá payman lliwta willakuychik hinaspa graciasta qokuychik. 7Diosninchikmi hawkayayta qosunkichik, chaytaqa manam runaqa entiendeyta atinchu, chay hawkayaymi sonqoykichiktawan yuyaymanaynikichikta Jesucristopi waqaychanqa.
Allin kaqkunapi yuyaymananamanta
8Wawqe-panillaykuna, tukuykunay-paqmi nimuykichik, kaykunapiyá yuyaymanaychik: Cheqap kaqpi, respetanapaq kaqpi, allin ruwaypi, mana huchallikuypi, allin rimaypi, imapas allin alabanapaq kaqpi.
9Imam yachachisqayta, chaskisqaykichikta, uyarisqaykichikta hinaspa ñoqapi rikusqaykichiktayá ruwaychik, hinaptinqa hawkayay qokuq Diosmi qamkunawan kanqa.
Filipo llaqtapi iñiqkunapa ofrendanmanta
10Llumpayta kusikuspaymi Señorta yupaychachkani yanapawaspaykichik huktawan yuyariwasqaykichikmanta. Kaynata nispayqa piensachkani manam qonqaruwasqaykichiktañachu, aswanqa yanapaykuwanaykichikpaq mana ima ruway atisqaykichiktam. 11Manataqmi rimachkaniqa muchusqaymantachu, ñoqaqa imapas kapuwaqllaywanmi sonqoyta tiyachini. 12Yachanim wakcha kayta chaynataq llapa imayuq kaytapas. Yachanitaqmi saksasqa kaytapas otaq yarqaymanta kaytapas chaynataq tukuy imayuq kaytapas otaq mana imayuq kaytapas. 13Kallpanchawaqniy Cristowanmi tukuy ima ruwayta atini. 14Chaywanpas qamkunaqa allintam ruwarqankichik, sasachakuyniykunapi yanapawaspaykichik.
15Yachasqaykichikpi hinapas Macedonia lawmanta lloqsispay Cristomanta allin noticiata chayraq willakuptiyqa Filipos llaqtapi yachaq iñiqmasiykunallam ofrendaykichikwan yanapaykuwarqankichik, chaytaqa ruwarqankichik willasqayman-ta graciasta qowaspaykichikmi. 16#Hch 17.1.#2~Co 11.9.Tesa-lónica llaqtapi kaptiypas iskay-kimsa kutitam imapas necesitasqaypaq ofren-daykichikta apachimuwarqankichik. 17Chaynata nispayqa manam chaskiruyllatachu munachkani, aswanqa munachkani yanapawasqaykichikmanta qamkunamanpas Diosqa chaninninpi kutichipusunaykichiktam. 18#Ex 29.18.Ñoqaqa puchu-puchutaraqmi chaskiruni. Epafroditowan apachimuwasqaykichikwanmi achkaña kapuwachkan, apachimuwasqaykichikqa karqa Diospaq miski asnaq ofrenda hinam hinaspa paypa agradonpaq kañasqa animal hinam. 19Diosniymi tukuy ima pisipususqaykichikta qosunkichik sinchi kapuqninman hina, Jesucristopi tukuy iman kapusqanman hina. 20¡Dios Taytanchikyá wiña-wiñaypaq yupaychasqa kachun! Amén.
Cartapa tukuyninmanta
21Jesucristopa sutinpiyá llapallan iñiqkunata rimaykapullawaychik. Ñoqawan kaq wawqe-paninchikkunapas rimaykamusunkichikmi. 22Kay llaqtapi llapa iñiqkunapas rimaykamusunkichikmi, aswan mastaqa rey Cesarpa wasinpi serviqkunam rimaykamusunkichik.
23Señorninchik Jesucristopa kuyapayakuyninyá qamkunawan kachun. Amén.
S'ha seleccionat:
Filipenses 4: RCQ12
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Chuya Qellqa - La Biblia en Quechua de Ayacucho - Edición Revisada © Peruvian Bible Society, 2012