Filipenses 2
2
Cristopa uchuychakusqanmantawan hatunchasqa kasqanmanta
1Sichum Cristopuni kallpanchasuptikichikqa, sichum kuyasuspaykichik sonqoykichikta tiyaykachiptinqa, sichum Espiritupas qamkunawan kachkaptinqa chaynataq qamkunapas llakipayarikuspa kuyakuqllaña kaspaykichikqa 2lliw-chaykichikyá kusichiwaychik: Huk pensa-mientoyuqlla, huk kuyakuyniyuqlla, huk sonqolla hinaspa huk sientiqlla kaspaykichik. 3Amayá cheqnikuspaqa nitaq hatun tukuspaqa imatapas ruwaychikchu, aswanqa uchuychakuspayá kikikichikmantapas aswan allinpaqraq wakinkunata hapiychik. 4Amayá kikillaykichikpa allinnikichiktachu maskaychikqa, aswanqa wakiqnikichikpa allinnintawanyá.
5Jesucristopa piensasqanman hinayá qamkunapas piensaychik. 6Payqa Dios kachkaspapas manam Diospaq hinachu hapikurqa, 7aswanqa runaman hina tikrakuykuspam sirviente hinaña kananpaq churakuykurqa. 8Runaman tikrakuruspanmi uchuychakuykurqa, uchuychakurqaqa Diosta kasukuspan penqaypaq cruzpi wañunankamam. 9Chayraykum llumpayta Dios hatuncharqa hinaspam llapallanmanta suma-sumaq sutiwan sutichaykurqa, 10#Is 45.23.chaynapi Jesuspa sutinpi hanaq pachapi kaqkunapas, kay pachapi kaqkunapas chaynataq uku pachapi kaqkunapas qonqorakunankupaq. 11Llapallan runakunapas “Jesucristoqa Señormi” nispam ninqaku, chaynataqa ninqaku Dios Tayta hatunchasqa kananpaqmi.
Jesucristoman iñiqkunaqa suti reqsiylla kasqanchikmanta
12Kuyasqay wawqe-panillaykuna, qamkunawan kaptiymi tukuy tiempo kasuwarqankichik, ichaqa manam qamkunawan kaptillaychu, chaynaqa karupi kaptiypas aswanraqyá kasuwaychik. Manchakuywan hinaspa respetowanyá salvasqa kasqaykichikta allinta waqaychaychik, 13Diosmi munasqanman hina allin munayta hinaspa allin ruwayta qamkunapi hatarichin.
14Lliwtayá ruwaychik ama kaminakuspa nitaq kutipanakuspa, 15#Dt 32.5.chaynapim mana culpayuq hinaspa mana huchayuq kaspaykichik Diospa churin chuya sonqo kankichik millakuypaq huchallikuq runakunapa chawpinpi. Qamkunaqa tutapi kanchaq chaska hinam sutilla lliwpa reqsisqan kachkankichik. 16Qamkunaqa wiñaypaq kawsay qokuq palabratam hatallichkankichik. Chaymi Cristopa kutimunan punchawpiqa qamkunamanta kusikusaq kallpanchakuspay yachachisqayqa mana yanqapaq kasqanmanta. 17Diospi iñisqaykichikwanmi ofrenda hina ofrecekurqankichik, chay ofrendaman completanaypaq wañunay kaptinpas, chaytaqa kusikuywanmi ruwasaq, hinaspam llapallaykichikwan kusikusaq. 18Chaynaqa, qamkunapas ñoqawan kuskayá kusikuychik.
Timoteomantawan Epafroditomanta
19Señorninchik Jesús munaptinqa chayllam Timoteota kachamusaq watukamusunaykichikpaq, chaynapi imayna kasqaykichikta yachaykuspa kusikunaypaq. 20Manam pipas Timoteo hinaqa kanchu, ñoqa hina qamkunamanta llumpayta preocupakuqqa, 21lliwpas paykunaqa kikillankupa allinninkuta maskaspam purinku, Jesucristopa munasqanta mana maskaspanku. 22Qamkunam ichaqa yachankichikña Timoteoqa tukuy imapi allin kasqanta, payqa imaynam huk churi taytanta yanapan, chaynam Cristomanta allin noticia willakuypi yanapawarqa. 23Chaynaqa, imapas asuntoymanta yachaykuspaymi chaypunilla kachamusqaykichik watu-kamusunaykichikpaq. 24Ñoqapas Señor-ninchikpim confiakuchkani kikiypuni qawaqnikichik chaylla hamurunaypaq.
25Wawqenchik Epafroditotam qamkunaman kachamuyta piensarqani, paytam kachamuwarqankichik tukuy imapi yanapawananpaq. Kuskaykum soldado hina yanapanakurqaniku. 26Paymi llumpayta munachkan llapallaykichikwan tupaykuyta, llakisqam kachkan onqorusqanmanta yacharusqaykichikrayku. 27Cheqaptapunim onqoruspan yaqalla wañukurqa, ichaqa Diosninchikmi paymanta llakipayarikurqa, llakipayarikurqataqmi ñoqamantapas chaynapi wañukuptin aswanraq llakiyuq kanaymanta. 28Chayllam kachamuchkani huktawan tupaykuspa kusikunaykichikpaq chaynapi ñoqapas manaña ancha llakisqa kanaypaq. 29Hatun kusikuywanyá chaskiykuychik Señorninchikman graciasta qostin, pay hina kaqkunataqa respetaychikyá. 30Cristo servisqanpim yaqalla wañukurqa, payqa wañuytapas mana manchakuspam qamkunapa rantikichikpi yanapawarqa.
S'ha seleccionat:
Filipenses 2: RCQ12
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Chuya Qellqa - La Biblia en Quechua de Ayacucho - Edición Revisada © Peruvian Bible Society, 2012