Marcos 10
10
Casadokunaqa mana rakinakunankumanta
(Mt 19.1-12; Lc 16.18)
1Jesusmi Capernaúm llaqtamanta lloqsispan Judea lawman hinaspa Jordán mayupa waklawninman rirqa. Chaymi llapa runakuna huktawan huñunakaramuptin imaynam puntakunata hina yachachirqa. 2Fariseokunañataqmi Jesusman asuykuspanku imawanpas wichichiyta munaspanku tapurqaku:
¿Allinchu pipas casado kachkaspa warminmanta rakikuruynin kanman? nispanku.
3Jesusñataqmi tapurqa:
¿Imatataq Moisés kamachisurqankichik? nispa.
4 #
Dt 24.1-4; Mt 5.31. Hinaptinmi paykunañataq nirqaku:
Moisesqa permitirqam papelta ruwaykuspa warminmanta rakikunanta, nispanku.
5Chaymi Jesús nirqa:
Moisesqa chaynata kamachikurqa rumi sonqo kasqaykichikraykum. 6#Gn 1.27; 5.2.Qallariyninpi tukuy imata unanchas-paqa, qaritawan warmitam Diosqa ruwarqa. 7#Gn 2.24.Chayraykum qariqa taytan-manta mamanmanta rakikuspan warminmanña hukllawakunqa, 8chaynapim iskayninku huk aychallaña kanqaku. Chaynaqa, manam iskayñachu kanqaku aswanqa hukllañam. 9Chaynaqa, Diospa kuskanchasqantaqa amayá runaqa rakichunchu, nispa.
10Wasipiña kachkaptinkum Jesuspa discipulonkuna chay rimasqankuna-manta huktawan tapurqaku. 11#Mt 5.32; 1~Co 7.10-11.Hinap-tinmi paykunata nirqa:
Warminmanta rakikuruspan huk warmiwan casarakuruq runaqa, chay warmiwanmi waqllikurun. 12Sichum warmipas qosanmanta rakikuruspan huk qariwan casarakuruspanqa waqllikuruntaqmi, nispa.
Wawakunata Jesús bendecisqanmanta
(Mt 19.13-15; Lc 18.15-17)
13Jesús llapchaykarinanpaqmi wawa-kunata pusamurqaku, chaymi discipulonkunañataq llapa wawakuna pusamuqkunata qaqcharqaku. 14Jesusñataqmi harkakusqankuta rikuruspan piñakuspan nirqa:
Wawakuna ñoqaman hamunanta ama harkakuychikchu, kay wawakuna hina kaqkunapaqmi Diospa munaychakuyninqa. 15#Mt 18.3.Cheqaptam nikichik, pipas wawakuna hina Diospa munaychakuyninta mana chaskispanqa, chay munaychakuymanqa manam yaykunqachu, nispa.
16Chaymantam wawakunata marqakuykuspan makinta paykunapa hawanman churaykuspan bendeciykarirqa.
Jesuswan apu joven rimasqanmanta
(Mt 19.16-30; Lc 18.18-30)
17Pasakunanpaqña Jesús kachkaptinmi, huk runa kallpaylla hamururqa, hinaspam ñawpaqninpi qonqorakuykuspan nirqa:
Allin yachachikuq, ¿imatataq ruwasaq wiñay kawsayta haypanaypaq? nispa.
18Jesusñataqmi nirqa:
¿Imanasqataq “allin yachachikuq” niwanki? Manam pipas allinqa kanchu, aswanqa chullallam, payqa Diosmi. 19#Ex 20.14; Dt 5.18.#Ex 20.13; Dt 5.17.#Ex 20.15; Dt 5.19.#Ex 20.16; Dt 5.20.#Ex 20.12; Dt 5.16.Qamqa yachankim kay kamachikuykunataqa: “Amam waqllikunkichu, amam pitapas wañuchinkichu, amam suwakunkichu, amam pimantapas llullataqa rimankichu, amam engañankichu, taytaykitawan mamaykitam respetanki”, nispa.
20Hinaptinmi chay runa nirqa:
Yachachikuq, warma kasqaymantaraqmi chaykunataqa ruwayman churarqani, nispa.
21Jesusñataqmi kuyakuywan qawarispan nirqa:
Chaywanpas kayraqmi faltasunki: Kutispaykiyá tukuy kapuqnikita rantikaramuy hinaspa wakchakunaman qoykamuy, chaynapim hanaq pachapi kapuqniyuq kanki; hinaspaykiyá cruznikita qepikuykuspa qatiway, nispa.
22Chayta uyariruspanmi chay runaqa, achka kapuqniyuq kasqanrayku ancha llakisqallaña pasakurqa.
23Jesusñataqmi muyuriqninpi runakunata qawarispan discipulonkunata nirqa:
Mayna sasatam apu runakunaqa Diospa munaychakuyninmanqa yaykunqaku, nispa.
24Chaymi discipulonkuna kayta uyariruspanku admirakurqaku. Jesusmi ichaqa paykunata nirqa:
Churillaykuna, ¡mayna sasam Diospa munaychakuyninman yaykuyqa! 25Apu runa Diospa munaychakuyninman yaykunanmantaqa huk camelloraqcha yaqapas agujapa rinrinta usturunman, nispa.
26Chayta uyariruspankum discipulokuna aswanraq hukmanyarurqaku hinaspam tapunakurqaku:
Hinaptinqa, ¿pitaq salvakuytaqa atin-man? nispanku.
27Jesusñataqmi paykunata qawarispan nirqa:
Runakunapaqqa kayqa sasallañam, Diospaqmi ichaqa tukuy imapas atinallan, nispa.
28Hinaptinmi Pedroñataq nirqa:
Ñoqaykuqa tukuy imaykutapas saqespam qatichkaykiku, nispa.
29Chaymi Jesusñataq nirqa:
Cheqaptapunim nikichik, pipas ñoqa-rayku hinaspa allin noticiarayku wasinta, wawqe-paninkunata, turi-ñañankunata, taytanta, mamanta, warminta, churin-kunata, chakrankunata saqeqqa, 30qatikachasqa kaspapas, kay tiempollapiraqmi pachak kuti masta chaskinqa wasikunata, wawqenta, paninta, turi-ñañanta, taytanta, mamanta, churinkunata hinaspa chakrankunatapas; hamuq tiempopiñataqmi wiñay kawsayta chaskinqa. 31#Mt 20.16; Lc 13.30.Ichaqa puntapi kaqkunam qepapi kanqaku, qepapi kaqkunañataqmi puntapi kanqaku, nispa.
Wañukunanta huktawan Jesús willakusqanmanta
(Mt 20.17-19; Lc 18.31-34)
32Jerusalenman qespiptinkum Jesus-ñataq discipulonkunapa ñawpaqninta rirqa. Chaymi discipulonkuna admirakurqaku, hinaspam mancharisqallaña qatirqaku. Chayraykum Jesusqa chunka iskayniyuq discipulonkunata huklawman qayaykuspan imam pasananmanta willayta qallaykurqa: 33Jerusalén llaqtamanmi qespichkanchik, chaypim runapa Churinta sacerdotekunapa kamachiqninkunaman hinaspa Diospa leynin yachachiqkunaman entreganqaku, paykunam wañunanpaq sentenciaspanku Diosta mana reqsiq runakunaman entreganqaku. 34Hinaptinmi paymanta burlakuspanku, azotespanku, toqaspanku wañuchinqaku, ichaqa kimsa punchawmanmi kawsarimunqa, nispa.
Jacobowan Juanpa mañakusqankumanta
(Mt 20.20-28)
35Zebedeopa churinkunam Jacobowan Juan, Jesusman asuykuspanku nirqaku:
Yachachikuq, huk mañakuyniykum kachkan, ama hina kaspa anri niykuwayku, nispanku.
36Chaymi Jesús tapurqa:
¿Imatataq qamkunapaq ruwanayta munankichik? nispa.
37Hinaptinmi paykunañataq nirqaku:
Mañakuykikum munaychakuynikipi hukniykuta alleq lawnikipi, hukniyku-tañataq ichoq lawnikipi tiyaykachiwanaykikupaq, nispanku.
38 #
Lc 12.50. Jesusñataqmi nirqa:
Manam yachankichikchu imam mañakusqaykichiktapas. ¿Yaqachu ñakarisqayta hina ñakariyta atiwaqchik? ¿Yaqachu ñoqapa wañusqayta hina wañuyta atiwaqchik? nispa.
39Chaymi paykunañataq nirqaku:
Arí, atisaqkum, nispanku.
Jesusñataqmi nirqa:
Arí, cheqaptapunim qamkunaqa ñoqa hina ñakarinkichik hinaspa wañunkichik. 40Chaywanpas alleq lawniypi otaq ichoq lawniypi tiyaytaqa manam ñoqachu nisaq, chayqa haykam akllasqakunallapaqmi kachkan, nispa.
41Chayta uyariruspankum chunkantin discipulokunañataq Jacobopaqwan Juanpaq piñakururqaku. 42#Lc 22.25-26.Jesusmi ichaqa paykunata qayaykuspan nirqa:
Yachasqaykichikpi hinapas kamachikuqkunaqa nacionkunapim munaychakunku, hinaspam atiyninkuman hina kamachikunku. 43#Mt 23.11; Mr 9.35; Lc 22.26.Qamkunapiqa manam chaynachu kanqa, aswanraqmi qam-kunamanta pipas kamachikuyta munaspaqa qamkunapa serviqnikichik kanan. 44Qamkunamanta pipas puntapi kayta munaspaqa llapaykichikpa servisuqnikichikyá kachun. 45Chaynam runapa Churinpas, manam servichikunanpaqchu hamurqa, aswanqa servispa achka runakunapa rantinpi wañunanpaqmi, nispa.
Ñawsa Bartimeota Jesús sanoyachisqanmanta
(Mt 20.29-34; Lc 18.35-43)
46Chaymantam Jericó llaqtaman chayarurqaku. Chay llaqtamanta disci-pulonkunawan chaynataq achka runakunawan Jesús lloqsichkaptinmi, Timeopa churin ñawsa Bartimeo ñanpa patanpi tiyachkarqa limosnata mañakuspan. 47Paymi Nazaretmanta kaq Jesuspa hamusqanta uyariruspan kaynata qayaykachakurqa:
¡Davidpa churin Jesús, llakipayariykullaway! nispa.
48Chaymi runakunañataq upallananpaq qaqcharqaku.
Paymi ichaqa aswanraq qaparispan nirqa:
¡Davidpa churin, llakipayariykullaway! nispa.
49Jesusñataqmi sayaykuspan nirqa:
Qayamuychik, nispa.
Chaymi ñawsata qayamuspanku nirqaku:
Kallpanchakuy, hatarispa asuykuy qayasuchkankim, nispanku.
50Chay ñawsañataqmi capanta wiku-tispan kallpaylla Jesusman asuykurqa. 51Asuykuruptinmi Jesusñataq tapurqa:
¿Imatataq qampaq ruwanayta munanki? nispa.
Chaymi ñawsañataq nirqa:
Yachachikuq, qawarikuytam munallani, nispa.
52Jesusñataqmi nirqa:
Pasakuyña, iñisqaykiraykum sanoyarunki, nispa.
Hinaptinmi chaylla qawarikuruspan Jesusta qatikurqa.
S'ha seleccionat:
Marcos 10: RCQ12
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Chuya Qellqa - La Biblia en Quechua de Ayacucho - Edición Revisada © Peruvian Bible Society, 2012