Ebiholwa 8
8
1Haandi Saulo yesi yeboneraho omweene ohufwa hwa Sitefaano huno.
Hu ludaalo lweene olwo, nilwo lu hwiitwa huhoongo muno ohwa abafukiiriri bali mu Yerusalemu hwachaakiraho; boosi baasalaanira mu syaalo syoosi sya Yudea neende esya Samaria, ohutusaho Abatume boong'ene nibo abadoong'a mu Yerusalemu.
Saulo asaandya abaandu bafukiirira Yesu Kristo
2Abaandu bali baheera muno efukiirira ya Yesu Kristo basiiha Sitefaano, mani baamala baamulira muno. 3#Biho 22:4,5; 26:9-11. Nae Saulo esiha syeene esyo yali naali ohusaandya muno abaandu bali bafukiirira mu Yesu Kristo, niyeengira maloondehania mu buli nyuumba, n'adiira abasaacha alala neende abahasi n'abayira ohubeekalira mu jeela.
Emboosi Ndai yiyaalwa mu Samaria
4Nae bulaanu, abaandu bali niberuuhe nibasalaanire bachaaka ohukeendanaanga nibayaala Emboosi eyo. 5Filipo yehirira yaachia mu siko sihuluundu sya Samaria, n'ayaalira abaandu bali bamenya mu bweene omwo ebidiira hu Kristo. 6Omukaanda muhoongo kw'abaandu nikuli neende omwooyo mulala, kwafukiirira ebiindu bi Filipo yali ohuboolaanga, nibatekeresa haandi nibabona eby'amayia bi yaholaanga. 7Olwohuba ebihyeeno ebiingi byatulaanga mu baandu baangi, nibiririra mu kono hoongo muno; haandi abaandu baangi balichiingi nibebokoya emibiri neende abalema bawonisibwaanga. 8Esangaalo liingi muno lyeecha lyaaba mu siko sihuluundu esyo.
9Nae yaliwo omusaacha wuundi olaangwa ati Simooni owali hale niyalakulaanga mu siko sihuluundu omwo owawukiaanga esyaalo syoosi esya Samaria, haandi yabolaanga ati omweene yali omuundu muhunuufu muno. 10Abaandu boosi bali nibamuwulira muno, ohutulira elalira hu muundu wa aasi muno, ohwoolera elalira hu muundu muhunuufu muno, babolaanga bati, “Omusaacha wuno niye amaani kala aka Nasaae akalaangwa mbwe Amahunuufu.” 11Abaandu boosi bali bamuwulira muno, olwohuba hulw'embaka endeeyi muno, omusaacha oyo yali yabatiisa muno neende amayia kae kano. 12Nae abaandu abo bafukiirira mu Filipo, koti luyayaala Emboosi Ndai chidiira hu Bwaami bwa Nasaae, haandi neende eliita lya Yesu Kristo, baabatiisibwaanga sidubaanie, abasaacha neende abahasi. 13Kata neende Simooni mweene yesi yeecha yafukiirira, mani luunyuma lw'ohubatiisibwa, yachaaka ohukeendaanga neende Filipo. Niyali niyahamala ohubona ebilolero biingi alala neende eby'amayia bihunuufu muno nibiholwa, yesi yeemao yaatya muno.
14Nae bulaanu abatume bali nibali mu Yerusalemu nibawulira bati esiko sihuluundu sya Samaria syali nisimalire ohunyoola emboosi ya Nasaae, babatumira Petero neende Yowaana, 15abeehirira mani balaamira abaandu abo eyiri Nasaae bati banyale ohunyoola Mwooyo Mwoolerefu; 16olwohuba haba siyali niyeehaho hu muundu yeesi hu abo, nae bali nibamala ohubatiisibwa sa mu liita ly'Omwaami Yesu. 17Petero neende Yowaana abo beesa hu baandu abo amahono kaabwe, banyala ohunyoola Mwooyo Mwoolerefu. 18Nae bulaanu, Simooni niyamala ohubona ati Mwooyo yali naakabibwa ohubitira mu hwisaanga amahono k'abatume hu baandu, yahengao ohubaberesa eseende, 19n'aboola ati, “Mumbeereseho syesi amaani kano, hu buli muundu yeesi syesi yi mba ninjisaho amahono kaange anyaleenge ohunyoola Mwooyo Mwoolerefu.” 20Nae Petero yamuboolera ati, “Efeesa yao eyo, yisihirire naawe omweene, olwohuba obaasire oti onyala ohwenyoolera esiyaanwa sya Nasaae sino niwehoonyera sa eseende! 21Ewe haba sooli neende kata omukabo kwoosi, oba eha yoosi mu biindu bino, olwohuba omwooyo kwao haba simuluungifu mu moni wa Nasaae. 22Weyolobye mu buhyaamu bwao buno, omale olaame eyiri Omwaami oti nisiba nisinyalihana, esichiiririrwa siri mu mwooyo kwao okwo sihoyere ohuhuleherwamo. 23Olwohuba ndi ohubona endi mbao hane oli mubuchuuni bwehali-hali haandi neende mu jeela y'ebibi.” 24Simooni yakobolamo ati, “Naamireho eyiri Omwaami oyo, oti kata esiindu silala hweebyo byoosi by'olomaloome sitanyala ohunjolaho.”
25Bulaanu, nibali nibamalire ohutusa obuloli haandi neende ohulomaloma emboosi y'Omwaami, bakobola Yerusalemu, nibayaala Emboosi Ndai mu ngoongo nyiingi muno ech'abaandu Basamaria.
Filipo neende Omuyitiopia muhoongo
26Nae malaika w'Omwaami yeecha yaboolera Filipo ati, “Siingira ochiire emwaalo w'engira yiihirira niyitula Yerusalemu niyichia Gasa.” Engira yino yomu siparara niyo. 27Filipo yaasiingira yaacha. Nae boneho, Omuitiopia mulooye, omubiihi muhoongo w'eseende ch'Omutuki muhasi Muitiopia yali niyeechere mu Yerusalemu ohwiinamira Nasaae. 28Yali hwali ohukobolayo engo; niyali huyehaale mu sigaari sihweeswa neende esuhiri, naali ohusomaanga mu sitabo sy'omunabbi Yisaaya. 29Mwooyo yaboolera Filipo ati, “Yalaalaho wakaane esigaari sino.” 30Filipo yeeruha yamwoolaho, yawulira omusaacha oyo naali ohusomaanga esitabo sya Yisaaya munabbi, yateeba ati, “Oli ohumanyirisaanga byooli ohusomaanga?” 31Nae yaboola ati, “Ndahanyala endye ohumanya, omuundu wuundi n'atanyimiriire?” Yalaanga Filipo aniine aakulu yaali, yehale nae. 32#Yis 53:7,8. Bulaanu esituundu sy'ebyandiiko byoolerefu si yali naali ohusomaanga syali sino:
“Koti ekoondi liyirwa ohusiinjwa
oba omwaana kw'ekoondi nikuli mu moni womubeki kudimbaanga,
yesi kata haba siyaasamaho omunwa kwae.
33Naali muhuswaasibwa, obwadyeeri bwamwiimwa.
Wiina onyala ohuboola ebidiira hu lwiibulo lwae?
Olwohuba obulamu bwae buli ohumalibwa hu syaalo.”
34Omulooye oyo yaboolera Filipo ati, “Wiina mweene, mubwadyeeri bweene, yi munabbi wuno ali ohulomalomaho bino, yelomalomaho omweene, oba hu omuundu wuundi?” 35Filipo mani niyaasamya omunwa n'achaaka ohulomaloma. Yachaakira hu byandiiko byeene bino; yamuboolera Emboosi Ndai cha Yesu. 36Nibali nibasikeendaanga hu ngira eyo boola eyiri amaachi; omulooyo oyo yaboola ati, “Bona, amaachi ngano! Siina syeene esinyala ohuungayira ohubatiisibwa?” 37Nae Filipo yaboola ati, “Nooba n'ofukiirira neende omwooyo kwao kwoosi, onyala ohubatiisibwa.” Nae yamukobolamo ati, “Fukiirira endi Yesu Kristo niye Omwaana wa Nasaae.” 38Yalagira esigaari syeeme, mani boombi beeha aasi baachia mu maachi, mani Filipo n'abatiisa omulade oyo. 39Boombi batula mu maachi, Mwooyo w'Omwaami yabukula Filipo; omulooye oyo haba siyamubonaho haandi, mani yeweerao niyehoya. 40Nae Filipo yabonehanirwa naali mu Asooto, n'achiiririra neende olukeendo lwae olwohuyalaanga Emboosi Ndai eyiri ebiko byoosi ohwoola lu yoolera Kaisarea.
S'ha seleccionat:
Ebiholwa 8: SAMIA
Subratllat
Comparteix
Compara
Copia
Vols que els teus subratllats es desin a tots els teus dispositius? Registra't o inicia sessió
©Bible Society of Kenya, 2019
©Bible Society of Uganda, 2019