Ebiholwa 20
20
Ohuchia Makedonia neende Akaya
1Luunyuma lw'esisi ohwaakama, Paulo yalaanga abeeki yaali, mani niyamala ohubagumya, yabatulaho yachaaka olukeendo luchia Makedonia. 2Niyamala ohukeenda mu bituundu byoosi eby'esyaalo esyo yagumia abaandu b'ebweene eyo, mani yoola mu Bugiriki. 3Yamala ebweene eyo emyoosi kidatu emilaamba, nae haandi Abayudaaya bachaaka ohumuliamo olukwe niyali n'atekehaanga ohwiingira emeeri ohuchia Siria, yaheengao ohukobola engo n'abitira Makedonia. 4Sopateeri wa Bberea, owali omwaana wa Pirusi, yaheengao ohuchia nae; haandi ohutula mu baandu Batesalonika, Arisitariko neende Sekundo bosi batyo, haandi Gaayo owali n'atula mu Deribbe, alala neende Timoteo bosi bahola batyo; neende esituundu sya Asia balaangwa mbwe, Tikiko neende Turofiimo. 5Bano boosi bataangira ohuchaayo, mani bali nibatulindiire Turaosi, 6nae yasyaabala yatula mu Filipi endaalo ch'Esidyaalo sy'Emigaati Ekitabbaahirwe, mu ndaalo chitaanu, hweecha hwabakaana Turaosi, yi hweecha hwehala hwamala endaalo chitaanu-na-chibiri.
Ohukeniya hwa Paulo Turaosi, humaliirihayo
7Hu ludaalo luchaaka ejuma, nihwali nihwebuusire alala ohulya omugaati, Paulo yalomaloma nabo, n'abaasa ati anyala ohuwaao nibuhyeere; mani yaleeyisa enomanoma yae muno ohwoola esiro akati. 8Amataara maangi kali nikali mu siseenge sy'omugoroofa yi hwali nihweebuusire. 9Omusyaani muyere wuundi olaangwa Yutiko, yali niyehaale hu dirisa. Yakuunuha muno Paulo koti lu yali n'asichiiririra ohulomalomaanga; yahirwa neende endoolo yaakuha ohutula hu goroofa yohudatu, mani n'adoolwa n'amalire ohufwa. 10Nae Paulo yeeha aasi, yachia n'amubundaalira, haandi n'amweboyaho n'aboola ati, “Mutesiinduha daawe, olwohuba asisiiri omulamu.” 11Paulo niyali n'amalire ohuniina aakulu mu goroofa haandi n'amalire ohusabira omugaati neende ohukulya, yeecha haandi yakaniaaya nabo hulw'embaka ndeeyi hooho, ohwoola lu bwahya, mani nawaawo. 12Babukula omwaana oyo bawaao nae naali omulamu abweene, mani balemesebwa emyooyo muno.
Ohutula Turaosi ohwoola Mileto
13Nihwali nihwoolere eyiri emeeri, hweengira mani hwachaaka ohusyaabala nihuchia mu Asosi, nihubaasa huti hunyala ohwakaana hwabitira Paulo ebweene eyo; olwohuba nilwo luyali niyatekeha bibe bityo, omweene n'abaasa ati achia ohubitira hu lukoongo. 14Yatwakaana nihuli mu Asosi, hwamubukula hwamukiinga hweecha nae Mitilene. 15Nihwatula ao, hwasyaabala nihuwaao, hwoola abuundu atekehaane neende Kiosi nibuhyere oludaalo luloondaho; nae haandi oludaalo lwaloondaho hwakobera Samosi; haandi hu ludaalo luloondaho hwoola Mileto. 16Olwohuba Paulo nae yali n'aheengereo ohusyaabala n'abitira mu Efeso, hwaanyale ohumala ebiha biingi naali mu Asia; olwohuba yali niyaanguya ohwoola Yerusalemu, nisiba nisinyaliha, hu ludaalo lwa Pentekosti lweene.
Enomanoma ya Paulo eyiri abahuluundu b'Abaefeso eyiseebula
17Niyali naali Mileto, yatuma emboosi mu Buwefeeso n'alaanga abahuluundu b'abafukiiriri beeche yali. 18Nibeecha yaali, yababoolera ati:
“Eng'we mwesi abeene mumanyire koti lu ndalichiingi nindamenya naang'we, ohutulira elalira hu ludaalo lu ndaseenera ohukulu endi mu Asia, 19nihalaabanira Omwaami neende obuloonga bwoosi, neende amasika neende oluteengo koti byanyoolanga ohutula hu huhoba hw'Abayudaaya; 20koti lu tatichaangaho ohubatuumbulira esiindu syoosi esyalichiingi nisiri esy'engaanga yi muli, haandi nimbasomesaanga mu lwichuule lw'abaandu haandi neende mu buli nyuumba yi ndengirangamo, 21ninjaaliraanga Abayudaaya boosi alala neende Abagiriki sidubaanie ohweyolobya eyiri Nasaae neende ohufukiirira mu Omwaami weefwe Yesu Kristo. 22Nae bulaanu bone, mbao njia mu Yerusalemu, ninyimiriirwe neende Mwooyo, nitamanyireho esichia ohungwaaho ni ndi ebweene eyo; 23ohutusaho ohumanya mbwe Mwooyo Mwoolerefu niye owunjikuliraangao mu buli siko sihuluundu ati ohuboyebwa alala neende ohusaandisibwa bibechaanga nibiniindiriire. 24#2 Tim 4:7. Nae ese haba simbaliiriraho obulamu bwaange koti obuliho neende engaanga yi ndi ese omweene, ohutusaho lwoong'ene ni mba ninyalire ohwooseresa esichiiririrwa syaange neende obuhalaabani bu mba ndaberesebwa neende Omwaami Yesu, ohuyaala emboosi ndai ey'embabaasi cha Nasaae. 25Nae bulaanu boneho, mbao manyire endi, eng'we mweesi ba mbeere ningendaangamo ninjaala obwaami bwa Nasaae, haba simuchia ohunyala ohubonaho obweeni bwaange haandi ehabi liindi daawe. 26Mani sakira ese ndi ohubeekesa ludaalo luno endi, ese mbulaho emboosi yosi yindiiraho ohutulana neende amabaanga keeng'we mweesi, 27olwohuba ese haba sindatyaaho kata nabudiidi ohubatuumbuliraanga amakerako koosi aka Nasaae akaakiire. 28Mweliinde abeene haandi muliinde omukaanda kwoosi kuno ku Mwooyo Mwoolerefu yamala ohubaholamo abaayi, ohuliinda omukaanda kw'abafukiiriri ba Nasaae, ku yenyoolera ohweema hu mabaanga k'Omwaana wae. 29Ese manyire endi luunyuma lw'ohuwaao hwaange, ebinamiindi byaalaba bicha ohwiicha bibeengiremo, nibitalehaho ebyaayo byosi; 30haandi ohutula mweeng'we abeene, muchia ohusiingiramo abaandu balomaloma ebiindu bidoondobania abaandu, hu banyale ohubatusaho abeeki nibaloonda abeene abo. 31Mani sakira muhoyere ohuba abeetekefu, nimwiichulisa muti, hulw'embaka y'emyaaka kidatu emilaamba ese haba sindalehaanga, kata esiro oba esideete syoosi, ohwekweeda buli muundu neende amasika maangi. 32Nae bulaanu ese mbalehera Nasaae mweene alala neende emboosi ya embabaasi chae, eyiri neende obunyala bw'ohuboombaha haandi neende obwohubaberesa omukabo kw'abo boosi abali mweeng'we abanyala ohulasibwa. 33Ese haba sindekoombaangaho ebibya oba efeesa y'omuundu yeesi, kata neende ebyefwaalo. 34Eng'we mwesi abeene mumanyire sa muti ni amahono kaange kano koong'ene niko akaholeraanga buli siindu syoosi si ndabechaanga nindaha omweene neende abo boosi bandabeechaanga nindamenya nabo. 35Mu biindu byoosi ese teemereengeho ohubeekesa endi nooba n'onyala ohudidiihana otyo, onyala ohuhoonyaho neende oyo oba n'atanyala ohweholera omweene, niwiichulisa emboosi ch'Omwaami Yesu koti lu yaboola ati, ‘Haandi sy'ehabi muno ohukaba ohuhira ohukabwa.’ ”
36Niyali n'amalire ohulomaloma atyo, yaasigama aasi, mani yachaaka ohusabira alala nabo boosi. 37Boosi bachaaka ohulira nibamweeboyaho haandi nibamukwa mu sirifu nibamuseebula, 38nibelalihiriire ohuhirira elalira hulw'emboosi yi yali n'aboolere ati, sibachia hubonaho obweeni bwae ehabi liindi. Bamugooba baachia nae eyiri emeeri.
S'ha seleccionat:
Ebiholwa 20: SAMIA
Subratllat
Comparteix
Compara
Copia
Vols que els teus subratllats es desin a tots els teus dispositius? Registra't o inicia sessió
©Bible Society of Kenya, 2019
©Bible Society of Uganda, 2019