Ebiholwa 17
17
Mu Tesalonika
1Bulaanu, nibali nibamalire ohuhalakania mu Afipooli neende mu Apolonio, boola mu Tesalonika, eyalimo Sinagoogi ey'Abayudaaya. 2Paulo yayingiramo, koti lu kwali omunalo kwae, hulw'ejuma chidatu enaamba, yachimala naali ohuyinganaanga nabo ohweema hu byandiiko byoolerefu, 3niyeekesera alala mu bwiichufu ati syali nisihoyera muno Kristo ohusaandisibwa yeetwa haandi yamala yasyuuha ohutula mu bafu, mani n'aboolaanga ati, “Yesu wuno, yi ndi ohubayaaliraanga, niye Kristo.” 4Abaandu baandi bafukiirisania nae, mani nibeyambaania hu Paulo alala neende Siila; koti lu Bagiriki banadiini baangi muno bahola alala neende abahasi baangi beemeresi. 5Nae Abayudaaya bachaaka ohuba neende ehali-hali, mani nibeecha baabukula abahola-mbi bohu ngira, bahung'aania esidiiyiha sihoongo, esiko esyo syoosi nisikwaamo esiisi, haandi nibaseeta enyuumba ya Yasoni, nibadaha babatuse erwaanyi eyiri abaandu. 6Nae nibyeecha byaabahaya ohubanyoola, baakwa hu Yasooni, nibamuhwehweesa alala neende abafukiiriri baandi baabayira mu moni w'abaandu bali neende obunyala mu siko sihuluundu esyo, nibalira n'ababoola bati, “Abasaacha bano abamalire ohufumaasa esyaalo syoosi bamalire ohwiicha muno mwosi, 7nihaandi Yasoni amalire ohubabukaanira; mani boosi bali ohuholaanga ebiyiingania amalako ka Kaisaari, nibaboola bati aliwo omutuki wuundi, Yesu.” 8Abaandu alala neende ab'obunyala bomu siko bosi bawuunga nibawulira esyeene sino. 9Nibamala ohutusa hu Yasoni neende abaasye omusiingo, babaleha bawaao.
Mu Bbereya
10Abweene ao, abafukiiriri baabukula Paulo neende Siila, mani nibabayira esiro Bberea; mani nibamala ohwoolayo, baachia beengira mu Sinagoogi y'Abayudaaya. 11Nae bulaanu, Abayudaaya bano bali abawulisi ohuhiraho abo abali mu Tesalonika, olwohuba bano baakaanira bulai emboosi neende ohudaha ohuhoongo muno, nibewuunja nibakeraania bulai ebyandiiko byoolerefu buli ludaalo, ohubona ebiindu bino nibyali nibiri bityo. 12Abaandu baandi banyala ohufukiirira, alala neende Abagiriki bahasi ab'oluyaali lw'aakulu, alala neende abasaacha bosi. 13Nae Abayudaaya abamenya mu Tesalonika nibamanya bati emboosi ya Nasaae yali niyiyaalwa neende Paulo mu Bberea mwosi, bosi beecha ebweene eyo, nibachaaka ohusangulusa neende ohuchuuba emikaanda ky'abaandu. 14Abweene ao, abafukiiriri haandi baabukula Paulo bamala bamutusao yawaawo yaacha hu nyaanja, nae Siila alala neende Timoteo badoong'a mu bweene omwo. 15Abo abeemirira Paulo bamuyira bamwoosa mu Ateeni; nae nibamala ohunyoola esilagiro ohutula eyiri Paulo ati bachie baleete Siila neende Timoteo yaali bwaangu, bamuleha ao bawaao.
Mu Ateeni
16Bulaanu, Paulo niyali nasibalindiire mu Ateeni, omwooyo kwae kwasererwa koti lu yabona esiko sihuluundu esyo nisyali syeechula ebiloongaloongwe. 17Yachaaka ohuyiinganira mu Sinagoogi neende Abayudaaya alala neende abaandu baandi bosi abali badaha Nasaae muno, haandi neende mu siito buli ludaalo neende abo boosi abali nibafunireho ehabi ohuba ebweene eyo. 18Abaandu baandi bosi bali abafukiiririra mu basomi balaangwa Abapikuria neende Abasitoiki bosi babukaanana nae. Nae abaandi baboola bati, “Omunanakisi wuno yesi anyala ohuboola siina?” Abaandi nabo baboola bati, “Abonehana ohuba naali omuyaali w'emisaambwa mikeni sa” olwohuba yali n'ayalaanga Yesu neende ohusyuuha mu bafu. 19Bamudiira mani bamuleeta eyiri Areopaago, nibaboola bati, “Hunyala hwamanyaho enjaala njaaha yino, yooli ohuleeta? 20Olwohuba ewe oli ohuleeta ebiindu bikeni mu matwi keefwe; hudaha ohumanya mani si biindu bino byeekesa.” 21Bulaanu abaandu bamenya mu Ateeni boosi alala neende abakeni bali bamenya mu bweene omwo bali beeboya huhulomalomaanga sa neende ohutekeeresaanga sa ebiindu biyaaha esiha syoosi.
22Paulo niyeema akatikaati wa Areopaago, yachaaka ohulomaloma n'aboola ati, “Basaacha ba Ateeni eng'we, ndi ohwomiisa endi mu buli ngeri yoosi, muli abanadiini muno. 23Olwohuba nimbeere nimbita-bita, nimbona ebiindu bimwiinamira, njichire ndakaana alutaari yiriho obwandiike buno buti, ‘Eyiri nasaae otamanyihaane.’ Oyo yi mwiinamiraanga koti otamanyihaane, niye omweene wuno yi ndi ohubayaaliraanga. 24#1 Abat 8:27; Yis 42:5; Biho 7:48.Nasaae oyo owaloonga esyaalo neende buli siri mu bweene omwo, oli Omwaami owo Muukulu neende esyaalo, haba s'amenyaanga mu biyeembeho byoombahwa neende omuundu, 25oba sa haba s'anyala ohuhalaabanirwa neende amahono k'abaandu, koti oba naali mu budahano bw'esiindu syoosi, koti ali omweene oyo oberesaanga abaandu boosi obulamu neende omuuya kuyeerwa neende buli siindu syoosi. 26Haandi oyo owahola ohutula mu muundu mulala buli syaalo sy'abaandu banyale ohumenya hu buli abuundu hu syaalo, n'amalire ohutekeha, yabula ebiha by'omwaaka neende enjaho chabyo chibirimo, 27ati banyale ohukoonya Nasaae, neende esuubi mbwe banyale ohumwoolaho neende ohumunyoola. Kata katyo haba saaliho eyale neende buli muundu hweefwe, 28olwohuba
‘Ni mu mweene oyo muhunyala ohubeera abalamu haandi neende ohukeenda haandi neende ohubaao’;
koti sa abeembi beeng'we baboolaanga bati,
‘Olwohuba efwe mubwadyeeri bweene huli abaana bae.’
29Mani koti lu huli abaana ba Nasaae, huhoyere obutabaasa huti, efwaani yae yiri koti efeesa, oba esibya simesamesana, oba koti ekina, ebiindu bitula mu mbaasa y'ohukeraania, neende embasirisa ch'abaandu sa. 30Nasaae yamala ohulekeeresa ebiha byali eby'obutamanya, nae bulaanu, alagira abaandu boosi buli abuundu woosi, ohweyolobya, 31olwohuba yamala ohuchwichwiisa oludaalo lu yahaheengereho esyaalo omusaango mu buluungifu niyehoonyera omuundu yiyamala ohutaawo, haandi sino yamala ohusyomiisa eyiri abaandu boosi niyehoonyera ohumusyuusa ohutula mu bafu.”
32Bulaanu nibawulira hu husyuuha hw'abafu, abaandi bachaaka ohumujara sa; nae abaandi baboola bati, “Efwe hudaha ohuhuwuliraho haandi by'oboola ebidiira hu byeene bino.” 33Mani sakira Paulo yabatulamo yawaawo. 34Nae abasaacha baandi bamweyambaaniaho, mani bamala bafukiirira, mu beene abo Dionisio mulala hu eb'esiina silaangwa Areopago neende omuhasi olaangwa, Damari alala neende abaandu baandi bali nabo bosi.
S'ha seleccionat:
Ebiholwa 17: SAMIA
Subratllat
Comparteix
Compara
Copia
Vols que els teus subratllats es desin a tots els teus dispositius? Registra't o inicia sessió
©Bible Society of Kenya, 2019
©Bible Society of Uganda, 2019