Ebiholwa 14
14
Mu Yikoniamu
1Bulaanu mu Yikoniamu, beengira boosi alala mu Sinagoogi y'Abayudaaya, baalomaloma ohwoola lu mukaanda muhoongo muno kweecha kwafukiirira, Abayudaaya alala neende Abagiriki. 2Nae Abayudaaya batanyala ohufukiirira badoondobania Abateende haandi babanyaasa ebibaaso byaabwe ohuhayana neende abafukiiriri baasyaabwe. 3Badoong'a eyo hulw'embaka ndeeyi muno, nibalomalomaanga hu Omwaami neende obujiing'u, abali neende obuloli bw'Emboosi y'embabaasi cha Nasaae, nibahola obulolero neende amayia neende amahono kaabwe abeene. 4Nae abaandu bali nibamenya mu siko sihuluundu esyo, bakabuhanamo; abaandi baakwa alala neende Abayudaaya, nae abaandi baakwa alala neende Abatume. 5Abateende alala neende Abayudaaya alala neende abeemeresi baabwe, ohubayaambia esoni neende ohubahubba amakina, 6basimanya mani beeruha baachia Lisitira neende Deribbe, ebiko bihuluundu bya Likaonia, haandi neende mu ngoongo chisibiraane abweene ao; 7ebweene eyo niyo yi bayaalira emboosi ndai.
Mu Lisitira neende mu Deribbe
8Bulaanu mu Lisitira, mwalimo omusaacha wuundi yali niyehaale, otanyalaanga ohwehoonyera amakulu kae; yali yalema ohutula mu budoto bwae, n'atanyala ohukeendaho daawe. 9Omusaacha oyo yatekeeresa Paulo n'alomaloma. Paulo niyamuhang'aasiraho emoni, yabona ati yali neende efukiirira ati anyala ohuwonisibwa, 10Paulo yalomalomera mu kono ly'aakulu ati, “Yema neende amakulu kao okololohe.” Mani yaaduuma yeema yachaaka ohukeenda. 11Mani esidiiyiha nisyabona esiindu si Paulo yali naaholere, baniinia amakono kaabwe aakulu nibaboola mu lulimi Kulikawonia bati, “Mbao banasaae hane batwihiire nibafwaana koti abaandu!” 12Balaanga Bbarinabba bati Sewusi, nae Paulo, olwohuba yali niye omulomalomi muhunuufu, bamulaanga bati Herime. 13Mani abalaamisi ba Sewusi, yi nyuumba yae y'ohusabiramo yali mu moni w'esiko sihuluundu esyo, alala neende abaandu boosi, baleeta ebiyaanwa by'elaawu alala neende ebimuli hu biruwa, mani nibasaba bati bayaanire Paulo. 14Nae abatume bano, Bbarinabba neende Paulo nibasiwulira, bataandula engubo chaabwe mani nibeeruha nibatula mu sidiiyiha omwo nibalira bati, 15#Hut 20:11; Sab 146:6. “Baandu eng'we, lwasiina muhola sino? Efwe fwesi huli abaandu, ab'omubiri kufwaanana koti okweeng'we, nae hubaleetera emboosi ndai, yiti eng'we muhoyere ohulehana neende ebiindu bino ebibulamo obuhoonyi muchie eyiri Nasaae mulamu owahola ekulu neende esyaalo, neende enyaanja alala neende ebiindu byoosi ebibirimo. 16Mu njibulo chabitao, yakanya ebyaalo byoosi ohukeenderaanga mu ngira chaabwe abeene; 17kata katyo omweene haba siyeleha omweene nataali neende obuloli, olwohuba yaholaanga ebiindu bilai, haandi yababeresaanga efula ohutula Muukulu, neende obwiire bulimo ebyaamo biingi muno, niyekusa emyooyo kyeeng'we neende ebyohulya neende esangaalo.” 18Emboosi chino chakera byaabahayira elalira ohukayira abaandu ohubayaanira.
19Nae Abayudaaya boolao nibatula mu Atiokia neende Yikoniamu; nibamala ohukaluuhania abaandu abo, bachaaka ohuhubba Paulo neende amakina haandi nibamuhwehweesa nibamutusa mu siko sihuluundu esyo, nibakaala bati yali n'amalire ohufwa. 20Nae abeeki nibeecha bamwebuusaho, yeecha yaasiingira mani yamala yeengira mu siko sihuluundu omwo; mani hu ludaalo luloondaho, yeecha yawaawo yemeeda ohukeenda neende Bbarinabba nibachia Deribbe.
Ohukaluha mu Atiokia sya Siria
21Nibali nibamalire ohuyaalira abaandu bomu siko sihuluundu esyo, haandi nibamalire ohunyoola abeeki baangi, bakobola Lisitira haandi neende mu Yikoniamu, haandi neende mu Atiokia, 22nibadinyia emyooyo ky'abeeki balichiingi mu biko bihuluundu ebyo, nibabagumia bati bemeede ohuhula mu fukiirira, haandi nibaboola bati huhoyere ohubitira mu husaanda ohuungi muno hu hweemeo hunyale ohwiingira mu Bwaami bwa Nasaae. 23Nibaba nibamalire ohubadoolera abahuluundu mu buli mukaanda kw'abafukiiriri, basaba Nasaae, haandi basiiba nibabadiisa Omwaami yi bali bafukiiriramo.
24Bulaanu bahalakania mu Pisidia mani boola mu Pafilia. 25Nibaba nibamalire ohuyaala emboosi ya Nasaae mu Periga, beeha baachia mu Atalia; 26batula eyo basyaabala baachia mu Atiokia, yi bali basiimibwa muno mu embabaasi cha Nasaae, hulw'omulimo kubaholayo. 27Nibali nibamalire ohwoola, babuusa abafukiiriri boosi alala, bababoolera byoosi bi Nasaae yali n'abaholeraangamo, haandi koti lu yali niyekuule omulyaango kw'efukiirira eyiri Bateende. 28Badoong'a nibali neende abeeki hulwe'siha sileeyi muno.
S'ha seleccionat:
Ebiholwa 14: SAMIA
Subratllat
Comparteix
Compara
Copia
Vols que els teus subratllats es desin a tots els teus dispositius? Registra't o inicia sessió
©Bible Society of Kenya, 2019
©Bible Society of Uganda, 2019