Ebiholwa 12
12
Ohusaandisibwa hwemeeda
1Mu siha syeene esyo, omutuki Herode yatusa obwaalaba yachaaka ohulwaania abafukiiriri baandi. 2Yeta neende olugaanga Yakobbo mwaanang'ina Yowaana; 3haandi niyabona ati esiholwa esyo syasangaasa Abayudaaya, yemeeda yadiira Petero yesi. Sino yasihola mu ndaalo ch'Esidyaalo sy'Emigaati Kitabbaahirwe. 4#Hut 12:1-27. N'amalire ohumudiira, yamuta mu jeela, yaamudiisa emikaanda kine eky'abasikaari ohumuliinda, n'achiiririra ati luunyuma lw'Esidyaalo sya Paasaka, achia ohumutusamo amuyire amuyaasire mu lwichuule lw'abaandu. 5Petero yayirwa mu jeela; nae abafukiiririri bemeeda muno ohumusabira eyiri Nasaae.
Petero alehuulwa ohutula mu jeela
6Mani esiro syeene si Herode yali niyetekeheereho ohutusiramo amuyaasire mu lwichuule lw'abaandu, Petero yali niyeyaliise akatikaati w'abasikaari babiri, naboyerwe neende eminyororo kibiri, haandi hu siruwa sy'ejeela, hwaliho abaliindi baandi nibaliindire; 7nae bone, malaika w'Omwaami yabonehana, mani obulafu bwaaduha mu siseenge sy'ejeela. Malaika oyo yakuuda Petero mu mbafu mani yaamusimusa n'aboola ati, “Siingira bwaangu.” Eminyororo ekyo kyaboololoha hu mahono kae kyaakwa aasi. 8Malaika oyo yamuboolera ati, “Wefwaale engubo neende ebiraato byao.” Petero yahola atyo. Malaika haandi yamuboolera ati, “Weboye olusibiro lwao mu sibuno mani wunonde.” 9Petero yatula erwaanyi, yaloonda malaika oyo. Petero haba siyamanya ati esiindu si malaika yali n'aholere syali esyadyeeri, nae yabaasa ati yali naali ohuboneherwasa. 10Nibali nibahamala ohubita hu baliindi bataangira neende abohubiri, boola hu siruwa sy'ebichuma esiingira mu siko sihuluundu esyo. Esiruwa esyo syabeyikulira esyeene, mani bamala batula erwaanyi babita hu ngira ndala nibawaao. Abweene-na-bweene ao ni malaika amutulaho. 11Petero yamanya ati ebyali bimweholeheho byali ebyadyeeri, mani n'aboola ati, “Bulaanu ndi omwomiifu endi Omwaami niye otumire malaika wae ohwiicha ohunjabina mu mahono ka Herode, haandi mweebyo byoosi bi Bayudaaya bali nibambaasirisira.” 12Niyamanya atyo, yachia ena nyuumba ya Maria, ng'ina Yowaana olaangwa Mariko, yi baandu baangi bali bebuusire alala nibali ohulaamaanga. 13Niyahong'oonda hu lwiiki lwohusiruwa, omuhalaabani olaangwa ati Rooda ohubona. 14Yamanyirisa ekono lya Petero, yasangaala muno mani yeeruha n'atekuule esiruwa nae yacha yaboola ati Petero niye owali yeemere erwaanyi hu siruwa. 15Nabo baboolera omuhaana oyo bati, “Mbao hane okwaaho elalu.” Nae yemeeda saohwomiisa ati syadyeeri. Nabo bamuboolera bati, “Anyala ohuba naali malaika wae.” 16Petero yemeeda ohuhong'oonda; mani nibeekulao, bamubona mani baawuka muno. 17Nae Petero yabaholera ahalolero neende omuhono ati bauleere, yabeekesa koti lu Omwaami yamutusa mu jeela. Yaboola ati, “Muboolere mutyo Yakobbo neende abafukiiriri boosi” Petero yeemao yaabaleha yabaleha yaacha abuundu waandi.
18Bulaanu obwiire nibwahya, ohusasakala hwoosi haba sihwaliwo mu basikaari hu biindu bidiira hu Petero. 19Herode niyali n'amalire ohumukoonya haandi n'atamwakaanire, yeecha yateeberesa abaliindi abo mani yamala yaalagira ati bahoyere ohwiitwa. Herode yatula mu Yudea yeecha mu Kaisarea, yaaba eyo.
Ohufwa hwa Herode
20Bulaanu, Herode yanyoolerera muno abaandu ba Tiiro neende Sidoni; nibali mu sidiiyiha ohumubona, nae nibali nibamalire ohuhola obwiicha neende Bbulasito, owali omuhuluundu w'edooho ly'omutuki, basaba bati omuleembe kubeeo, olwohuba esyaalo syaabwe syali nisinyoolaanga ebyohulya ohutula hu syaalo sy'omutuki oyo. 21Hu ludaalo lwali nilutekeheebwe, Herode yefwaala ebifwaalo byae by'obutuki, mani yehala hu sisaala sy'obutuki, yachaaka ohulomaloma neende abaandu. 22Abaandu behuuma nibaboola bati, “Ekono elyo lya nasaae, nae haba sily'omuundu sa!” 23Abweene-na-bweene ao, malaika w'Omwaami yamwiita, olwohuba haba siyali n'aberesa Nasaae oluyaali; yaafwa enyeende chamulya.
24Nae emboosi ya Nasaae yemeeda ohuhula neende ohusaalana. 25Bbarinabba neende Saulo bakobola nibatula Yerusalemu nibamalire ohwooseresa omulimo kwaabwe, nibeecha neende Yowaana owali n'alaangwa ati Mariko.
S'ha seleccionat:
Ebiholwa 12: SAMIA
Subratllat
Comparteix
Compara
Copia
Vols que els teus subratllats es desin a tots els teus dispositius? Registra't o inicia sessió
©Bible Society of Kenya, 2019
©Bible Society of Uganda, 2019