Nombres 22
22
ISIRAYEEL YAB BÍ MOOWAAB TANTAKALIN
(22–36)
Balaaki nì ubɔɔ Balaam bɔti
1Isirayeel yab yíkì niinee ní ki cūtìi kāl̀ Moowaab tantakalin, Jɔɔdan buŋgbandi lapu pu ki túĺ Jeeriikoo.
2Siipɔɔr jipɔɔn Balaaki nín gbìl̄ Isirayeel yab nín ŋá Amɔɔr yab puee, 3ní dinyoondi kɔ́ u nì u-samaau Isirayeel yab nín wīikí tikpilee pu. Bi nín ká Isirayeel yabee, tifaandi cúú-bi tikpil. 4Ní u bí Madiyan kpilib yii: «Binib nee làá ŋàfì tin kɔkɔ māntìi tú-ti nee kii inaa nín ŋmóò dinaapaal mooti pu nyíki nyikee ní.» Ŋyunti gbantee Siipɔɔr jipɔɔn Balaaki di nìn sá ubɔti Moowaab tiŋkin.
5An puee ní Balaaki dū binib ki tú Beewɔɔr jipɔɔn Balaam cee. U nìn kóò u-tiŋkin Peetɔɔr, dimɔɔl din bi yíì Eefiraatee caŋin. U nìn bí bí cùú tùkù-u yii: «Dinibul diba nyánní Eejipiti ki kpátì ki gbí kitiŋ kɔkɔ pu, ní ki kóò ki pìlīǹ man#22.5 Balaam : kpèè Ditee 23.5-6, Joos 24.9-10, Mis 6.5, 2 Peet 2.15-16, Juudi 11.. 6Míǹ puee m gbàam̄-si, dāan̄ kí tɔ̄-bi mbusu, kun puee bi pɔ̄ɔ̄ ki jítiǹ-mi. A yaa kíí ki dɔ́mińee, án yaa yíì m ŋūǹ kí já kí pɔ̄ɔkiǹ-bi ní kí jà-bi m-tiŋki pu. Di sá m nyí yii un pu ní a yaa bīiǹee kāntí dibiindi, ní un ní a yaa tɔ́ mbusuee, udaan kāntí mbusu.»
7Ní Moowaab nì Madiyan kpilib yíkìi yōoǹ tiwampɔkaal tin bi làá tin pɔ̄ Balaamee ki bàn̄ ki ká-u, ní ki dū Balaaki nín lī puee ki kàan̄. 8Ní Balaam bí-bi yii: «Ní gbíntí m-cee doo kí dòon̄, ku yaa fu wúntì ti-Dindaan yaa sòon̄ nì mi puee, m làá fu tùkù-ni an nín sá puee.»
Niinee ní Moowaab kpilibee gbíntì Balaam cee ki dōoǹ. 9Ní Unimbɔti dɔ́miń Balaam cee ní ki bí yii: «Binib bilab di bí a-cee nan ní?» 10Ní Balaam kíí Unimbɔti yii: «Siipɔɔr jipɔɔn Balaaki, Moowaab bɔtiu di túnní-bi, bí dāá tùkù-mi yii: 11<Dinibul diba nyánní Eejipiti ki kpátìi gbí kitiŋ kɔkɔ pu. An puee dāá tūtuǹ-mi kí tɔ̄-bi mbusu. Án yaa yíì m ŋūǹ kí já kí pɔ̄ɔkiǹ-bi.>» 12Ní Unimbɔti bí-u yii: «Á taa táá-bi kí cù, kí taa tɔ̄ dinibul gbanti mbusu kun puee m bīiǹ di-boon.»
13Ku wúntì Balaam fīntèe ní ki bí bikpilib bin Balaaki túnnée yii: «Ní nīn gítímaan, ti-Dindaan kaa pú-mi nsan ḿ táá-ni kí cù.»
14Ní Moowaab kpilib bin bi túee fātìi gítì ki tùkū Balaaki yii: «Balaam yíì yii waa làá táá-ti kí dāan̄.» 15Ní Balaaki gíti lēē bikpilib bin sá bikpaambi bi-wíiŋŋu mun jítiǹ bipeepeekaabee ki tú. 16Ní bi bàn̄ Balaam cee ki dū tin pu ní Balaaki túnní-bee ki bíl̀ u-nimbiin yii: «Man Balaaki, Siipɔɔr jipɔɔn, m gbàam̄-si, á taa yíí yii aa làá dāan̄ m-cee. 17M làá tīī-si tinyool tikpil, ní tin kɔkɔ a yaa bālifèe, m làá ŋá míǹ! Míǹ puee m gbàam̄-si, dāan̄ kí tɔ̄ dinibul nee mbusu.» 18Ní Balaam kíí bin Balaaki túnnée yii: «Báà Balaaki yaa dū animbil nì sindaariya bin gbí u-beediiŋŋinee kɔkɔ ki tīī-mi, maa ŋūǹ kí yìntīǹ m-Dindaan m-Nimbɔtiu marau kí ŋá tiba fiii gba kí tīī-u. 19Ama ni mun ń gbíntímaan kunyeeu nee kí dòon̄ doo, m làá fu béé tin ní ti-Dindaan làá fu tùkù-mee.» 20Ní Unimbɔti dɔ́miń Balaam cee kunyeeu ki tùkū-u yii: «Kii binib nee nín gíti dáá dɔ́miń ki yíiń-see, yīkìí táá-bi ní cù. Ama man yaa tùkū-si yii á ŋá puee, tíǹ ní á ŋá.» 21Kutaa wúntèe ní Balaam kpàl̄ u-mansaliiki ki táá bikpilibee ní bi búntì.
Balaam maŋki bɔti
22Balaam nóó-bi ki búntèe ní Unimbɔti fōō diŋuul. Ŋyunti ŋun Balaam kā u-mansaliiki pu u nì u-tɔntɔnliibi bili nóó ki cée, ní ti-Dindaan tuuŋŋu kíntì ki yú nsanni ú taa ŋmā kí jītí. 23Ní kimansalii ká ntuun yú nsan kansikin ki ŋúb́ njicál ŋu-ŋaan, ní kì gɔ́ntì ki kɔ́ bukpaan. Ní Balaam bíi gbáà-kì kí kíntí nsan. 24Ní ti-Dindaan tuuŋŋu nìkī nyɔkɔpu ki cūtìi yúl̀ nsan laakin kaa wāāyee fiinyi sufii kansikin digundi diba bí ŋŋaŋgan pú ní diba bí ŋŋaŋgiil pú. 25Kimansalii ká ntuun mimmee ní kì còom̄ ki náká nì digundi. Balaam taal dūuǹ digundee, ní u kíĺ ki bíi gbáà-kì. 26Ní ti-Dindaan tuuŋŋu nìkī nyɔkɔpu laakin nsan mɔ́ɔb́ unil kaa ŋūǹ kí fàtī ŋgiilaaa, kaa ŋūǹ kí fàtī ŋganee. 27Kimaŋ ká-ŋu mimmee ní ki dōoǹ Balaam taapu ní Balaam dàn̄ ki-pu. Balaam fōō diŋuul tiŋan pu ní ki dū ndɔ ki gbáń-kì tikpil.
28Ní ti-Dindaan pú kimansalii ŋŋmam kí sòoǹ tibɔti, ní kì bí Balaam yii: «M baasii ŋá-si ba ní a gbáń-mi mita kɔkɔ?» 29Ní Balaam kíí-kì yii: «A kpēē-mi fám ní. M yaa bàà ŋúb́ kitàataajiki m-ŋaan doo, m bàà làá làntì-si!» 30Ní kimansalii kíí-u yii: «Man di kaa sá a-maŋki kin a kàal̀ baabadaleeee? M ŋá-si míǹ dalba ki káaa?» Ní Balaam kíí-u yii: «Aayee.»
31Niinee ní ti-Dindaan ŋúbitì Balaam nimbiliŋ ní u ká ntuun yú nsan kansikin ki ŋúb́ njicál ŋu-ŋaan. Dicilpu niinee ní u tātìi dōoǹ dicincibil. 32Ní ntuun bālifì-u yii: «Ba pu ní a gbáń a-maŋki mita kɔkɔ? M nyáń kí pìin̄-si nsan á taa ŋmā kí cù laakin a cée ní, kun puee nsan ŋun a cá nee cáǹ-si mbusun ní. 33Kimaŋ ká-mi ní ki gɔ́ntì-mi ŋfunyɔm mita, kì yaa kaa bàà gɔ́ntì-mi, naŋkɔnampu m bàà kūū-si ní kí yàntī kíǹ.» 34Ní Balaam bí ti-Dindaan tuuŋŋu yii: «M yīntì, kun puee maa nyí yii an sá sii di kíntì ki yú nsanni m-nyɔkɔpu. An puee m-saŋŋu nee bɔti yaa kaa mɔ́ɔkiǹ-see, m kíí kí fàtī m-dumpu.» 35Ní ti-Dindaan tuuŋŋu bí Balaam yii: «Sii nì binib nee ń nīn cá, ama anyɔɔbun ŋin ní m làá dūú ŋá a-nyɔkɔnee, ŋíǹ ní a làá sòoǹ.» Ní Balaam nì binibee nìkī bi-saŋŋu ki búntì.
Ubɔti Balaaki túŋkì Balaam nsanni
36Ŋyunti ŋun Balaaki gbìl̄ yii Balaam dòońee ní u nyáń ki cūtì ki túŋkì-u áli Moowaab tiŋki kin bí ki pìlīǹ kikpaanyɔkɔ Arinɔn buŋŋu caŋinee. 37Ní Balaaki bí Balaam yii: «Ba pu ní m nín tú binib mpeepeekaam a-cee bí yíiń-see, a yíì kaa dɔ́miń ní? A nyí yii maa ŋūǹ kí tīī-si tinyool níii?» 38Ní Balaam bí Balaaki yii: «Nì min kɔkɔ m dɔ́miń nee, maa ŋūǹ kí gāā m-bindi kí lì tiba, see tibɔti tin Unimbɔti yaa dūu ŋá m-nyɔkɔnee, tíǹ ní m làá sòoǹ.» 39Ní Balaam nóó Balaaki ní bi nín cá Kiiriyati-Usɔti. 40Ní Balaaki dū inaa nì ipii kí ŋá saraabi, ní ki lēē tinan ki tīī Balaam nì bikpilib bin nóoń-uee, báà ŋma nì u-yati.
Balaam mēē ki bīiǹ Isirayeel yab pu mpeepeekaam
41Kù wúntèe ní Balaaki yōoǹ Balaam bi nín jɔ́ḿ Bamooti-Baal. Niin ní bi kpēē ki wálìń Isirayeel yab biba.
S'ha seleccionat:
Nombres 22: BASSARDC
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
BIBLE EN N'TCHAM (Bassar) © Alliance Biblique du Togo, 2013.