Lévitique 26
26
1«Ní taa náań awaa, kí taa mā akumpoo, kí taa cóoń ditaŋkpal kí nīn tòotī, kí taa kpítí ataŋkpee kí nántíǹ tiba ni-tiŋkin laaba ki jáaḿ-ŋi. Di sá yii man di sá ni-Dindaan ni-Nimbɔtiu.
2«Nín̄ ŋúb́maan ŋwiŋŋuŋfikaa ŋun m tīī-nee kí nīn tɔ́ m-circir kɔŋkooŋŋu tiŋan. Man di sá ni-Dindaan.»
Unimbɔti biindi
3«Ni yaa ŋúb́ m-bɔkpaaŋi nì m-marab ki ŋáań bi nín bí yii ní ŋá puee, 4m làá yàntī utaa ń nì ŋyunti ŋun an máaǹee, kitiŋ ń lòoǹ tikpaajin mmɔntiimin ní isufi mun ń lòoǹ abil tiŋan. 5Ni làá dāá nīn cēē tijimpin ní kí tin cáá sāā fiinyi biliŋ kìtitam. Ni làá dāá nīn kìtī ni-fiinyi biliŋ ní kí tin cáá sāā tijimpin bɔ̄ltam. Ni làá dāá nīn bí digbíl poon ní kí dāá nīn bí ni-tiŋkin nì ŋgbansɔŋfi#26.5 Kpèè Ditee 11.13-15.. 6M làá dāá yàntī ŋgbansɔŋfi ń nīn bí ni-tiŋkin. Ni yaa láa dɔ̄ ki gèeǹee, naa dāa fàŋkí tiba. M làá dāá jà ipeecuncuti kɔkɔ ni-tiŋkin. Ubɔ kaa dāa gíti dòoń kí jáǹ-ni. 7Ni làá dāá já kí pɔ̄ɔkiǹ ni-nannanliibi kí dāá jà-bi. 8Ni-kansikin binib biŋmoo dāa jì ni-nannanliibi dilaataal, ní binib dilaataal ń dāá jà kutukub saalaa, ní ní dāá já kí pɔ̄ɔkiǹ ni-nannanliibi. 9M làá dāá ŋá-ni tiŋan ní kí yàntī ní bùtī kí wíiǹ tikpil. M làá dāá nīn ŋúb́ m-poondi din m pōoǹ-nee. 10Ni làá dāá jī tijiŋkpikil kí núkú, áli gba kí dāá kɔ́tí tikpikil gbanti kí pɔ̄ tipɔn mpaan. 11M làá dāá nīn kóò ni-kansikin. M kpá kí fàtī m-boon kí tīī-ni. 12M làá dāá nīn còom̄ ni-kansikin. M làá nīn sá ni-Nimbɔtiu, ní nimbi ń nīn sá m-nibul#26.12 Kpèè 2 Kɔra 6.16, Dilee 21.3.. 13Man di sá ni-Dindaan ni-Nimbɔtiu un nyántìń-ni Eejipiti tiŋkin, ní taa ti nín̄ sá Eejipiti yab yumbuyee. Man di léetì ni-neen kpancikil, ní ki yāntì ni kíǹ ki còom̄ ni-yil gáań.»
Unimbɔti tafadaaldi
14«Ama ni yaa kaa tɔ́-mi, kaa ŋáań kii marab nee kɔkɔ nín bí yii ní ŋá puee, 15ki yaa dū m-bɔkpaaŋi ki fá, ki fātì ni-boon ki tīī m-koobiliŋ, kaa bíi ŋáań m-marab nee kɔkɔ nín bí yii ní ŋá puee, ní ki yaa gbáń ki kpītì m-poondee, 16m nín làá dāá ŋá ni-puee sèé:
«M làá dāá kɔ́ǹ-ni dinyoondin, kí yàntī didúntil weeŋyi nì nnaanyeem ń cúú-ni ní kí yàntī iween gbanti ń ŋmɔ́ kí bīil̀ ni-nimbiliŋ kí bàtī ni-wiiŋyi pu. Ni làá dāá kpɔ̀ kí bɔ̄l̀ ni-sati fám, kun puee ni-nannanliibi di dāa yì ni-kpaajinti gbanti kí jī. 17M làá dāá fàtī m-boon kí tīī-ni, ní ni-nannanliibi ń pɔ̄ɔkiǹ-ni. Bin bin ná-nee di làá dāá jī ni-pu dibeel kí nīn kpòotī-ni. Ubɔ kaa dāa bíi jì-ni ní ní kíĺ ki bíi sáń.
18«Míǹ gbanti kɔkɔ boonee, ni yaa kaa gbíntìi tɔ́-mee, ní ḿ dāá kūtì ni-kpitii tafadaaldi din poon ni bée miluli pu. 19M làá dāá nàan̄ kun tìì-ni mpɔn ni yòontí ni-ba yilpuee, kí dāá yàntī kutaa kun dàn̄ ni-pu nee ń pɔ̄ɔkì kii tikútee. M làá dāá yàntī utaa ń taa ti nì ni-timmu pu ní mú pɔ̄ɔkì kaŋkaŋ kii tikúbɔnee. 20Ní ní kpɔ̀ kí kpɔ̀ kí gīī púb, ama ni-timmu kaa làá lòoǹ tikpaajin ní isufi mun kaa làá lòoǹ abil.
21«Ni yaa gbíntìi bíi jáà nì mi kaa là kí nīn tɔ́-mee, m làá dāá mɔ̀tīí kūtì ni-kpitii tafadaaldi miluli pu. 22M làá dāá dū ipeecuncuti kí tɔ̄ ni-pu í kpɔ̀ ni-biyaamu, kí kpɔ̀ kí céetí ni-waŋkuti kɔkɔ, ní kí kpɔ̀ kí bàtī ni-pu ní kíń fiii. Áli gba ni-saŋyi kaa dāa gíti kāntí bin làá nīn còom̄ i-puee.
23«Nì min kɔkɔ m dáaĺ ni-tafal mimmee, ni yaa kaa kpántì ni-ba ní ki gbíntìi bíi jáà nì mee, 24ma mun làá dāá jáǹ-ni, ní kí mɔ̀tīí kūtì ni-kpitii tafadaaldi miluli pu. 25M làá dāá cáań kujaau ni-tiŋki pu kí tɔ̀ ipɔntoon ni nín dū m-poondi ki fée pu. Báà ni yaa láa sáǹ ki bál̀ ni-timmu poonaaa, m làá dāá yàntī bìlbil kúm ń jēetí ni-pu, ní ḿ dū-ni kí líiǹ ni-nannanliibi. 26M làá dāá yàntī tijin ń lóó-ni. Binimpoobi saalaa dāa ŋūǹ kí púĺ ni-kpɔnɔb dibububaantiil poon ní bí dāá cáań-ni kpɔnɔb fiiiyee ní ŋmɔ́ kaa làá díkí.
27«Nì míǹ kɔkɔee, ni yaa gbíntìi bíi jáà nì mi kaa là kí nīn tɔ́-mee, 28ma mun làá dāá jáǹ-ni nì m-ŋuul poon. Man m-ba di làá dāá dáaĺ ni-tafal ni-kpitii pu ŋfunyɔm miluli. 29Ni làá dāá ŋmɔ́ ni-jipɔmbi nì ni-bisalib nanti. 30M làá dāá gbá kí kpēelikì ni-waadiiŋŋi ŋin bí ŋgbantamu puee, nì ni-saraafaŋyi in pu ni tùutī talaalubee, kí kpɔ̀-ni kí páań awaa ŋin m kpéelikì ki bíl̀ee pu, ní kí dū-ni kí fá. 31Ni-timmu làá dāá kpántí adigbuŋkati ŋma ní. Ubɔ kaa dāa gíti gbōontí ni-saraafaŋyi laŋki, ní ḿ dāá fàtī m-boon kí tīī ni-saraabi. 32Man m-ba di làá dāá nàan̄ ni-tiŋki ní án dāá ŋá ni-nannanliibi bin làá dāá fōō-kì kí nīn kíǹ ki kóòyee bitii. 33M làá dāá cáań kujaau kí tɔ̄ ni-pu ní ní yàl̄ kí kɔ́ ntincamun. Ubɔ kaa dāa gíti kóò ni-tiŋkin ní ni-timmu ń dāá kpántí adigbuŋkati ŋma.
34«Ni yaa láa bíń ni-nannanliibi timmu poonee, ni-tiŋki làá dāá dòon̄ kí ŋùŋfì. 35Ŋyunti gbanti kɔkɔ poonee ní ni-tiŋki ń dāá dòon̄ kí ŋùŋfì kí téeǹ ni nín nìn dū iwiŋŋuŋfikaa in ki túń ki-pu ditundi ŋyunti ŋun ni nìn kóò niinee.
36«Ni-kansikin bin kíǹ kaa kpíì ki bíń bi-nannanliibi tiŋkinee, m làá dāá kɔ́ǹ-bi dinyoondi. Bi yaa láa gbìl̄ kufaau kpaŋkpam lítèe, bi làá dāá fàŋkì kí sāǹ kii ubɔ di ŋúb́ kitàataajiki ki jì-bee kí cùú lítí, ama ní ubɔ mun kaa bíi jì-bi. 37Bi dāa sáń ki gbéetí ki lítí tɔb pu kii bi ŋúb́ ntàataajimu ní ki jì-bee, ama báà ubɔ kaa pá bi-boon ki jì-bi. Baa dāa ŋūǹ kí sīĺ bi-nannanliibi nimbiin kí jáǹ-bi. 38Ntincamun ní ni làá dāá kpú kí céetí, ní bí dāá síb́-ni ni-nannanliibi timmu gbanti poon. 39Ni-kansikin bin yaa láa kíǹ kaa kpíì ki bíń ni-nannanliibi timmunee làá dāá kpúń niin ní. Bi làá dāá kpú bíǹ bi-ba nì bi-baabi kpitii pu ní.»
Unimbɔti làá dāá téetí u-poondi pu
40«Ama bi làá dāá béé yii bíǹ nì bi-baabi yīntì ní kí dāá lì yii baa síl̀ nì mi deedee, ki jáń nì mi, 41ní ma mun jáń nì bi ki cáá-bi ki cūnnì bi-nannanliibi tiŋkin. Ŋyunti gbantee, bi-pɔbiliŋ ŋin pɔ̄ɔ̄yee yaa láa sīntì ŋi-ba taapu ki fōō bi-yìntitam tafadaaldee, 42ní ḿ dāá téetí dipoondi din m nìn pōoǹ Jaakɔb nì Isaaki nì Abraamee pu. M làá dāá téetí m nín nìn pōoǹ kí ŋá tin kí tīī bi-tiŋkee pu#26.42 Kpèè Diny 12.7, 17.7-8.. 43Ama bi làá dāá yīkì bi-tiŋki pu, ní kíǹ ń dòon̄ ki-ba pu kí ŋùŋfì. Ŋyunti gbantee, bíǹ bíi fòol̄ bi-kpitii paati nì bi nín dū m-koobiliŋ nì m-bɔkpaaŋi ki fá puee tafadaaldi dee. 44Nì míǹ kɔkɔee, ŋyunti ŋun bi dāa bí bi-nannanliibi tiŋkinee, maa làá dāá dū-bi kí fá kɔkɔ, kaa làá dāá fàtī m-boon kí tīī-bi. Maa làá dāá kpɔ̀ kí céetí-bi, kaa làá dāá kpìtī m-poondi. Di sá yii man di sá bi-Dindaan bi-Nimbɔtiu. 45M làá dāá téetí dipoondi din m nìn pōoǹ bi-baabi bin m nìn nyántìń Eejipiti tiŋkin, kí nīn sá bi-Nimbɔtiu atimbun kɔkɔ ń kée pu, kí fīī-bi. Man di sá bi-Dindaan.»
46Abɔkpaa nì akoobil nì marab bin ti-Dindaan nìn yóoǹ án nīn bí u nì Isirayeel yab kansikinee dee. Siinaayi jool pu ní ti-Dindaan nìn dū-bi ki tīī Mooyiisi ú dūú nàatī Isirayeel yab.
S'ha seleccionat:
Lévitique 26: BASSARDC
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
BIBLE EN N'TCHAM (Bassar) © Alliance Biblique du Togo, 2013.