Lévitique 19
19
Unimbɔti nín là bí nóó-u puee
1Ti-Dindaan bí Mooyiisi 2ń tùkù Isirayeel yab kɔkɔ yii:
«Nín̄ bímaan circir, kun puee man, ni-Dindaan, ni-Nimbɔtiu bí circir ní#19.2 Kpèè 11.44-45, 1 Peet 1.16.!
3«Báà ŋma ń nīn tɔ́ u-baa nì u-na, kí nīn tɔ́ ŋwiŋŋuŋfikaa#19.3 ń nīn tɔ́ u-baa nì u-na: kpèè 20.9, Disa 12.17, Ditee 5.16, Eesee 22.7, Maat 15.4, Eef 6.2. - ŋwiŋŋuŋfikaa dal: kpèè 19.30, Disa 20.8-11, Ditee 5.12-15, Eesee 22.8, Maat 12.1-2. dal. Man di sá ni-Dindaan, ni-Nimbɔtiu.
4«Ní taa tòotī awaa, kí taa dū tikúti kí dùntī kí mɔ́ɔ́ awaa#19.4 awaa : kpèè 26.1, Disa 20.3, 34.14, Ilan 81.10, Maat 4.10. - kí dùntī tikúti kí dūú mɔ́ɔ́ awaa: Disa 20.4-5, Ditee 27.15, 1 Bib 12.28-30, dūú ŋmàntī nì Yees 44.16-17.. Man di sá ni-Dindaan, ni-Nimbɔtiu.
5«Ni yaa bíi ŋáań mpèé saraau kí tīī-mee, nóómaan mara nín sá puee ní ḿ fōō. 6Ní ŋmɔ́ saraa gbanti nanti yaadal wiiŋŋu nì kutaa yaa wúntèe. Ama tinan gbanti yaa kíǹ winta dalee, bí cáá wà ŋŋmi. 7Ubɔ yaa ŋmɔ́ saraa gbanti nanti winta dalee, an kɔ́ tijɔkɔndi. Maa làá fōō saraa gbanti. 8Un di yaa ŋmɔ́ tinan gbanti winta dalee, udaan ŋá ikpiti ki fōō dibɔkpil, kun puee u kpēē kun bi dūu sú-mee fám. Bí nyāntí udaan Isirayeel nibul kansikin.
9«Ni yaa láa bíi cēē ni-kpaajintee, ní taa láa cā kí tin bà ŋkpaabuku, kí taa fàtīí lūlifì ifin in pu ni súntèe. 10Ní taa fàtīí gítí ni-boon kí kìtī fiinyi subiliŋ ŋin pu ni jítèe, kí taa tòò ŋin gbátì ki dɔ̄ kitiŋee. Ní yàntī ŋíǹ bifalaadambi nì binicambi ń lūlifì. Man di sá ni-Dindaan ni-Nimbɔtiu#19.10 Kpèè 23.22, Ditee 24.1-22..
11«Ní taa yɔ̀, kí taa mɔ̄ntì, kí taa mùul̀ ni-juti. 12Ní taa pùtī m-yindi kí bìin̄ ni-nyimɔŋyi pu#19.12 Kpèè 5.24, Disa 20.7,16, Yeer 5.2, Maat 5.33, Atuun 6.13.. Ni yaa ŋá mimmee, ni kpēē man ni-Nimbɔtiu yindi fám dee. Man di sá ni-Dindaan.
13«Ní taa mùul̀ ni-juti, kí taa yɔ̀-u. Ní taa yàntī upaadaan nimbiliŋ ń dòon̄ ni-cee kutaa ń wúntí naa pàn̄-u#19.13 Kpèè 5.21-23, Disa 22.20, Ditee 24.14-15, Eesee 22.12.. 14Ní taa sìì utafakpaafu, kí taa dū tiba kí làkan̄ ujɔfu saŋŋu pu#19.14 Kpèè Ditee 27.18, Yoob 29.15., ama ní fàŋkì man ni-Nimbɔtiu. Man di sá ni-Dindaan.
15«Ní taa mùul̀ ubɔ ibɔsoon poon. Ní taa kpɔ̀ usoodaan bɔti yii u nín sá usoodaanee pu, kí taa pɔ̀ unikpaan u-ŋmam pu, ama ní dū ibaamɔn kí sòoǹ ni-juti bɔti#19.15 Kpèè Disa 23.3,6-8, Ditee 1.17, 16.19.. 16Ní taa cáá ni-nabiyaamu disambiil. Ní taa lēē nnyimɔn seerau ni-nabiki pu bí kpɔ̀-u. Man di sá ni-Dindaan.
17«Ní taa nín̄ ná ni-nabiyaamu ni-pɔbilin. Ama ní sòoǹ ibaamɔn kí tùkù ni-nabiki kin yaa yīntiǹ-nee#19.17 Kpèè Maat 18.15., án nín làá ŋá pu u-puee ní taa ŋá ikpitee. 18Ní taa tɔ̀ ipɔntoon, kí taa dū ni-nabiyaamu kí ŋá ni-poon. Ní nīn néeḿmaan ni-jutiibi kii nimbi ni-bee#19.18 Kpèè 19.34, Maat 5.43, 19.19, 22.39, Maar 12.31, Luuki 10.27, Room 13.9, Gala 5.14, Yaku 2.8.. Man di sá ni-Dindaan.
19«Nín̄ ŋúb́maan m-bɔkpaaŋi nee. Ní taa dū tiwaŋkuti tin buluku kaa pēēyee uja nì usal kí kpāfì tí jɔ̄m̀ tɔb, kí taa bɔ̄l̀ ni-kpaabun iwambool ili in kaa pēēyee, kí taa pèen̄ sata un bi dū gulfab bin bí bi-ba bi-ba ki lùn̄ee#19.19 Kpèè Ditee 22.9-11..
20«Usapɔɔn yaa sá uyumbu ní ki cáá bɔɔn ní baa láá fātìi dá-u ki líì àá ki nyántì-u kuyuŋun ní uninja ubɔ dōoǹ nì uee, bí gíí udaan dipɔndi ú pà. Ama bí taa kpɔ̀-bi, di sá yii usapɔɔnee dáá gbíntìi sá uyumbu. 21Uninjee ń cáań upìja circir kɔŋkooŋŋu punyɔkɔki nyɔkɔpu kí ŋá u-bɔkpil saraau m-nimbiin. 22Usaraaŋal ń dū upìjee kí ŋá dikoobil nín bālifì puee dibɔkpil daan pu m-nimbiin, ikpiti in ní u ŋée pu ní ú ká u-kpitii pɔ̄tam.
23«Ni yaa láa kɔ́ Kanaan tiŋkin ní ki yaa cóoǹ isufi in lòoǹ abil ŋin bi ŋmóòyee kɔkɔ nì i-bulukuee, asubil gbanti ń nīn sá ni-cee kii ŋin kɔ́ tijɔkɔndee abin ata, ní taa ŋmɔ́-ŋi. 24Dibinnanaatiil poonee, ní dū isufee biliŋ kí sú man ni-Dindaan nì ifaal poon. 25Dibiŋŋmooŋmootiil poonee, ni dāa ŋūǹ kí ŋmɔ́ isufee biliŋ. Ni yaa ŋá mimmee, ni-sufii gbanti làá dāá nīn lòoǹ ní ki kútí. Man di sá ni-Dindaan ni-Nimbɔtiu.
26«Ní taa ŋmɔ́ kuwaŋkuluu kubɔ nanti laakin bi lāntì-kùee. Ní taa bàlifì dibalifil kí taa bɔ̄ tibɔɔl mun. 27Ní taa kòol̀ kí cùkū ni-yil, kí taa kòol̀ ni-nyimpul kpaanceetiŋu ŋmaniŋma. 28Ní taa cāfì ni-wunti kí dàkà yii ni ká dikpool#19.28 Kpèè 21.5, Ditee 14.1, Yeer 41.5., kí taa ŋmà tiba naŋku ni-wunti pu. Man di sá ni-Dindaan.
29«Ní taa yàntī ni-bisalib ń kpántí iwaatooti laakpaamu kí fá bi-jilimau#19.29 Iwaatooti laakpaamu: Bi nìn kāntí-bi Kanaan yab waatootipaaŋyi pu ní binib nìn dàkafī yii bi yaa dōoǹ nì bee, bi-kpaajinti làá lòoǹ tiŋan ní bi-waŋkuti ń màal̀ kí bùtī ní bí ká mmaal. Kpèè Ditee 23.18, Yeer 2.20.. An yaa ŋá mimmee, kitiŋ nee kɔkɔ nib làá dū bi-ba kí líí nì tilaakpaal ní tijɔkɔndi ń kɔ́-kì. 30Ní nīn tɔ́ ŋwiŋŋuŋfikaa, kí nīn tɔ́ m-circir kɔŋkooŋŋu. Man di sá ni-Dindaan.
31«Ní taa cù bibɔɔbi cee, kí taa cù bin sòoǹ nì bitaŋkpiibee cee#19.31 Kpèè 20.6, 27, Ditee 18.10-11, 1 Sami 28.3, 2 Bib 23.24, Yees 8.19.. Ní taa cù bi-cee, kun puee bi làá kɔ́ǹ-ni tijɔkɔndi. Man di sá ni-Dindaan ni-Nimbɔtiu.
32«Yīkì kí tīī utikpil disíndi kí nīn tɔ́ un yikpiti pīiǹee. Ni yaa ŋá mimmee, ni lafun fàŋkí man ni-Nimbɔtiu dee. Man di sá ni-Dindaan.
33«Unicaan yaa dɔ́miń ki kɔ́-nee, ní taa mùul̀-u. 34Ní ŋúb́ unicaan un kɔ́-nee kii kitindambikee, kí nīn néeń-u kii nimbi ni-bee. Kun puee ni-mun kāl̀ kunicaŋu Eejipiti tiŋkin#19.34 Kpèè Disa 22.20, Ditee 24.17-18, 27.19.. Man di sá ni-Dindaan ni-Nimbɔtiu.
35«Nín̄ bímaan deedee kí taa nín̄ mùul̄ ibɔsoon poon nì bi nín ŋmàntī tiwan fɔkɔŋŋu nì tiwan nyiŋfiŋu nì tiwan púuŋŋu puee poon. 36Ni-saniyab nì ni-waŋŋmantikaati, an dàkà yii tiwan tin bi cáa ŋmàntī nnyiŋfee nì tin bi cáa ŋmàntī nnyimee nì ni-sambiŋmantikaaŋi kɔkɔ ń nīn sá deedee wanti#19.36 Kpèè Ditee 25.13-16, Alaŋ 11.1, 20.10, Eesee 45.10-12, Amoo 8.5, Miika 6.11.. Man di sá ni-Dindaan, ni-Nimbɔtiu un di nyántìń-ni Eejipiti tiŋkinee.
37«Nín̄ ŋúb́maan m-bɔkpaaŋi kɔkɔ nì m-koobiliŋ kɔkɔ kí ŋá ŋi nín lī puee. Man di sá ni-Dindaan.»
S'ha seleccionat:
Lévitique 19: BASSARDC
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
BIBLE EN N'TCHAM (Bassar) © Alliance Biblique du Togo, 2013.