Lévitique 14
14
Unyaŋgbanti jɔkɔnti fíntitam marab
1Ti-Dindaan sòon̄ nì Mooyiisi ki bí yii:
2«Unyaŋgbanti yaa pɔ́ɔkèe, saraabi bin u máaǹ kí ŋá ní kí nyā u-weeŋyi jɔkɔntinee sɔ̀. Bi yaa cáań-u usaraaŋal ceeyee#14.2 Kpèè Maat 8.4, Maar 1.44, Luuki 5.14, 17.14., 3ní úǹ ń nyā dinaapaal kpaanceetiŋu kí kpèè-u. Unyaŋgbantee yaa lafun pɔ́ɔkèe, 4ní usaraaŋal ń yàntī bí cáań ubunlee yil pu nnɔmbiyaamu mun ŋān̄ bí dūú ŋá saraayee muli nì mu-nimbiliŋ nì busubu bun bi yíì yii seediree dɔŋu nì gulfaman nì kifaapibiki kin bi yíì isɔpee#14.4 kifaapibiki kin bi yíì isɔpee náań nì kinunuui ní bi cáa sèetī nnyimin ki yàantí binib pu kí nyāntí-bi tijɔkɔndin.. 5Usaraaŋal ń yàntī bí làntì nnɔmbiyaamuee kiba kí dū ki-fatikuu kí ŋá ditansambil din poon nnyimbul nnyim kēe. 6Ní ú yòon̄ kinɔmbiki kin kíǹee nì seedir dɔŋuee nì gulfamanee nì isɔpi faapibikee kí dūú bɔ̄ kinɔmbiki kin bi lāntèe fatikuun. 7Niinee ní ú dū fatikuee kí yàaǹ un bi bíi ŋáań saraa kí fíntí u-jɔkɔntee pu ŋfunyɔm miluli. Míǹ boonee ní ú sòoǹ báà ŋma ń gbìl̄ yii udaan nyáń tijɔkɔndin ní kí gíiǹ kinɔmbiki kin baa kūūyee kí líí tisati watil pú. 8Un bi ŋá saraa ki fíntì u-jɔkɔntee máaǹ kí fíntí u-wampeeŋkaati, kí kòol̀ u-wunti kɔkɔ pu kuti, kí fàl̀ ní kí nín nyā tijɔkɔndin. Míǹ boonee, u ŋūǹ kí gítí dinaapaal pu, ama waa nín máaǹ kí kɔ́ u-tantiu poon kí cáá sāā iwiin iluli ní. 9Iwiin iluli dalee ní ú kòol̀ u-wunti kɔkɔ pu kuti, an dàkà yii u-yikpiti nì u-nyimpul nì u-niŋgbuŋkooŋyi nì tikuti tin pée bí u-wunti puee, ní kí fíntí u-wampeeŋkaati, kí fàl̀ ní kí nín nyā tijɔkɔndin.
10«Iwiin inii dalee, ú cáań apibil ŋin laaba kaa wɔ̀b̄ee ali nì dibindi diba pisaliu un laaba kaa wɔ̀b̄ee, nì ŋyim min bi dū ŋkpam ki búuńee kiiloobi biwa nì ŋkpam liitiri dijandi. 11Usaraaŋal un bíi ŋáań saraa gbantee ń dū un jɔkɔnti bi bíi fíntée nì saraabi bin u cáańee kɔkɔ kí síiń circir kɔŋkooŋŋu punyɔkɔki nyɔkɔpu. 12Ú yòon̄ apibilee kansikin din bi làá dūú ŋá dibɔkpil saraauee nì ŋkpam liitiri dijandee yilpu kí fíiǹ fíiǹ ti-Dindaan nimbiin. 13U yaa ŋá míǹ ki dóòyee ní ú làntì dipibilee laakin bi làntī ikpiti pɔ̄tam saraau nì saraawɔkaa waŋkutee, circir paaŋŋu laŋki gbanti. Di sá yii dibɔkpil saraau nì ikpiti pɔ̄tam saraau nanti sá ki tīī usaraaŋal ní. An sá circir páaa wanti ní. 14Usaraaŋal ń dū dipibilee fatikuu kí jōō un jɔkɔnti bi bíi fíntée tafalam ŋgiil yal pu nì u-ŋambijal ŋgiil yal pu nì u-taŋambijal ŋgiil yal pu. 15Míǹ boonee ní ú bàtī ŋkpam kí ŋá u-ŋantilin ŋgan yal. 16Ú dū u-ŋaŋgiiŋambiki kí sēē ŋkpam min kā u-ŋantil ŋgan yal poonee kí yàaǹ ŋfunyɔm miluli ti-Dindaan nimbiin. 17Ú tí sēē ŋkpam min kíǹ ki kā u-ŋantilinee kí dūú jōō kijapaayee tafalam ŋgiil yal pu nì u-ŋambijal ŋgiil yal pu nì u-taŋambijal ŋgiil yal pu, laakin u bàà dū dibɔkpil saraau fatikuu ki jōōyee táb. 18Míǹ boonee ní ú dū ŋkpam min kíǹ ki kā u-ŋantilinee kí sìtī un saraau bi bíi ŋáańee yil pu ní kí ŋá dikoobil nín bālifì puee ti-Dindaan nimbiin kí fíntí udaan kpitii. 19Usaraaŋal ń ŋá ikpiti pɔ̄tam saraau ní kí ŋá dikoobil nín sá puee kí fíntí kijapaayee ú nyā u-jɔkɔntin. U yaa ŋá míǹ ki dóòyee ní kí làntì saraawɔkaa waŋkuluku. 20Ú yòon̄ saraawɔkaayee kɔkɔ nì tijimpin saraau kí cáá wà ŋŋmi nsaraafan pu. Niinee ní ú gíti ŋá dikoobil nín sá puee kí fíntí udaan kpitii ú nyā tijɔkɔndin.»
Unyaŋgbanti un kaa cáá ŋŋmamee saraabi
21«Ama udaan yaa sá usoodaan ní kaa cáá ŋŋmam kí ŋmā kí ká tin kɔkɔ bi bālifèe, ú cáań dipibil dibaba kí ŋá dibɔkpil saraau ní bí ŋá dikoobil nín sá puee kí fíntí u-jɔkɔnti. Ú cáań ŋyim min bi dū ŋkpam ki búuńee kiiloobi bita kí ŋá tijimpin saraau, nì ŋkpam liitiri dijandi. 22Ú cáań ananjil ali àá abeenanjil ali kí nóó nì tin u ŋūǹ kí kée. Bí dū diba kí ŋá ikpiti pɔ̄tam saraau ní kí dū din kíǹee kí ŋá saraawɔkaa. 23Iwiin inii dalee, ú cáań saraabi gbanti kɔkɔ kí tīī usaraaŋal, circir kɔŋkooŋŋu punyɔkɔki nyɔkɔpu, ti-Dindaan nimbiin, bí dūú ŋá saraa kí fíntí u-jɔkɔnti. 24Usaraaŋal ń yòon̄ dibɔkpil saraau pibil nì ŋkpamee yilpu kí fíiǹ fíiǹ ti-Dindaan nimbiin. 25U yaa ŋá míǹ ki dóòyee ní ú làntì dipibilee ní kí dū di-fatikuu kí jōō un bi bíi fíntí u-jɔkɔntee tafalam ŋgiil yal pu nì u-ŋambijal ŋgiil yal pu nì u-taŋambijal ŋgiil yal pu. 26Ú bàtī ŋkpam kí ŋá u-ŋantil ŋgan yal poon. 27Ú dū u-ŋambidakakaai ŋgiil yal kí sēē ŋkpam min kā u-ŋantil ŋgan yal poonee kí yàaǹ ti-Dindaan nimbiin ŋfunyɔm miluli. 28Míǹ boonee ní ú dū ŋkpam min kā u-ŋantilinee kí jōō un jɔkɔnti u bíi fíntée tafalam ŋgiil yal pu nì u-ŋambijal ŋgiil yal pu nì u-taŋambijal ŋgiil yal pu laakin u bàà dū dibɔkpil saraau fatikuu ki jōōyee táb. 29Ŋkpam min kíǹ ki kā u-ŋantilinee, ú dūú sìtī kijapaayee yil pu kí ŋá kii mara nín bālifì puee ti-Dindaan nimbiin kí fíntí udaan jɔkɔnti. 30U yaa ŋá míǹ ki dóòyee ní ú lēē ananjilee àá abeenanjilee diba, kí nóó nì tin udaan ŋúń ki cáańee. 31Ú dū-dì kí ŋá ikpiti pɔ̄tam saraau ní kí dū din kíǹee kí ŋá saraawɔkaa, ní kí dū tijimpin saraau kí kūtì. Niinee ní usaraaŋal ń ŋá dikoobil nín bālifì puee ti-Dindaan nimbiin kí fíntí udaan jɔkɔnti.»
32Unyaŋgbanti un kaa cáá ŋŋmam kí cáań tin u máaǹ kí cáańee nín ŋáań saraabi bin kí nyā u-jɔkɔntinee marab dee.
Dinyaŋgbandi din tòó adiin puee marab
33Ti-Dindaan sòon̄ nì Mooyiisi nì Aarɔn yii:
34«Ni yaa láa kɔ́ Kanaan tiŋki kin m làá dūú tīī-ni ní nīn kíǹ ki yèe poon, ní m yaa láa yāntì dinyaŋgbandi daaŋku nyáń kitiŋ kin poon ni kóòyee diiku kubɔ puee, 35un yì kudii gbantee ń dāá cùú ká usaraaŋal kí tùkù-u yii: <An bí-mi kii dinyaŋgbandi daaŋku bí m-diiku puee.> 36Usaraaŋal ń yàntī bí kóoǹ tin kɔkɔ pée bí kudii gbanti poonee kí nyāntí ní ú nín cù kí kpèè kudaaŋŋuee. Mimmee tin kɔkɔ bí ku-nee kaa kóò tijɔkɔndi. Míǹ boonee ní usaraaŋal ń kɔ́ kí kpèè kudiiyee. 37U yaa kɔ́ ki kpēē kudaaŋŋuee ní ki ká yii apɔkɔ sɔ̀m̀ gùŋgum, àá an máǹ gàaa ki ŋmɔ́ ki kɔ́ kudii guŋŋi poonee, 38ní ú nyā kí yūĺ kudiiyee punyɔkɔpu kí dū-ku kí pìin̄ áli iwiin iluli. 39Iwiin iluli dalee ní usaraaŋal ń fàtīí gítí kí kpèè kudiiyee. U yaa ká yii kudaaŋŋuee lālim̀ kudiiyee guŋŋi puee, 40ú yàntī bí lēē ataŋkpee ŋin pu ní kudaaŋŋuee kēe kí cáá fá kitiŋ kpaanceetiŋu, laakin bi féeń tin pée kɔ́ tijɔkɔndee. 41Ú yàntī bí kɔ́tí kudiiyee guŋŋi kɔkɔ poon kí cáá ntam min bi kɔ́tèe kí fá kitiŋ kpaanceetiŋu, tijɔkɔndi paaŋŋuee pu. 42Míǹ boonee bí nyàab̀ ataŋkpapɔɔn kí téeǹ ŋin bi lēēyee paaŋŋu ní kí fàtīí nyàab̀ ntampɔm kí póoń kudiiyee.
43«Bi yaa lēē ataŋkpee kudii pu míǹ ki kɔ́tì agun ki fātìi póoń ní míǹ boonee kudaaŋŋuee fātìi nyáńee, 44usaraaŋal ń fàtīí gítí kí kpèè. Kudaaŋŋuee yaa lālim̀ ki gbí kudii kɔkɔ poonee, an dàkà yii baa ti ŋūǹ kí nyāntí kudaaŋŋuee kudii gbanti pu dee. Kudiiyee kɔ́ tijɔkɔndi. 45Bí gbá kí wīī kudiiyee, ní kí kóoǹ ku-taŋkpeeŋi nì ku-dɔi nì ku-tampóoŋkaam kɔkɔ kí cáá fá kitiŋ kpaanceetiŋu tijɔkɔndi paaŋŋuee pu.
46«Ŋyunti ŋun bi pīiǹ kudiiyee, un yaa kɔ́ ku-nee kɔ́ tijɔkɔndi kí cáá sāā kujoou. 47Un di yaa dōoǹ kudiiyee poon àá ki jíń ku-poon tijinee ń fíntí u-wampeeŋkaati.
48«Ama ŋyunti ŋun bi fātìi póoń kudiiyee, usaraaŋal yaa gítì ki kpēē ní ki ká yii kudaaŋŋuee kaa fātìi nyáńee, ú sòoǹ báà ŋma ń gbìl̄ yii kudiiyee nyáń tijɔkɔndin, kun puee kudaaŋŋuee wáŋkì.
49«Usaraaŋal yaa làá ŋá saraabi kí nyāntí kudiiyee tijɔkɔndinee, ú yòon̄ nnɔmbiyaamu muli nì busubu bun bi yíì yii seediree dɔŋu nì gulfaman nì kifaapibiki kin bi yíì isɔpee. 50Ú yàntī bí làntì nnɔmbiyaamuee kiba kí dū ki-fatikuu kí ŋá ditansambil din poon nnyimbul nyim kēe. 51Míǹ boonee ní ú yòon̄ kinɔmbiki kin kíǹee nì seedir dɔŋuee nì gulfamanee nì isɔpi faapibikee kí dūú bɔ̄ kinɔmbiki kin bi lāntèe fatikuu nì nnyimbul nyimee ni, kí yàaǹ kudiiyee pu ŋfunyɔm miluli. 52Míǹ ní usaraaŋal máaǹ kí ŋá ní kí dū kinɔmbikee fatikuu nì nnyimbul nyimee nì kinɔmbiki kin kíǹee nì seedir dɔŋuee nì isɔpi faapibikee nì gulfaman cínciŋee kí fíntí kudiiyee kí nyāntí-ku ku-jɔkɔntin. 53Ú dāá gíiǹ kinɔmbiki kin kíǹ baa kūūyee kí líí tisati watil pú. Míǹ boonee ní ú ŋá akoobil nín sá puee kí fíntí kudiiyee kí nyāntí ku-jɔkɔntin ní kú lafun nyā tijɔkɔndin.»
54Marab bin bi síiǹ dinyaŋgbandi nì kideeŋŋi, 55nì kudaaŋŋu kun tòó tiwampeeŋkaal nì adiin ki náań nì dinyaŋgbandee, 56nì ndulim nì tikalindi nì unil wunti laaba yaa líkitì ki máǹee puee dee. 57Marab gbanti di nìn yàntī bi béetí yii unil, àá tiwan kɔ́ tijɔkɔndi àá tàa kɔ́. Marab bin bi nìn síiǹ dinyaŋgbandi puee dee.
S'ha seleccionat:
Lévitique 14: BASSARDC
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
BIBLE EN N'TCHAM (Bassar) © Alliance Biblique du Togo, 2013.