Exode 36
36
1«Beesaleel nì Ooliyaab nì bininjab bin kɔkɔ ti-Dindaan pú dinyil nì iciinee làá tɔ̄ circir kɔŋkooŋŋu tuuŋŋi mmɔntiim án kàl̄ deedee, kii ti-Dindaan nín tīī mara yii bí ŋá puee.»
2Mooyiisi nìn yíiń Beesaleel nì Ooliyaab nì bininjab bin kɔkɔ ti-Dindaan nìn tīī dinyil bi dū bi-ba ki tīī kí tɔ̄ ditundi nì dipɔbil dibee. 3Ní Mooyiisi dū tiwan tin kɔkɔ Isirayeel yab nìn cáań ki ŋá saraa bí dūú tɔ̄ circir kɔŋkooŋŋu tuuŋŋee ki tīī-bi. Kutaafaau kamaayee, binib nìn gbíntìi cāabìń tiwan nì dipɔbil diba. 4Niinee bitɔntɔnliibi bin Unimbɔti tīī iciin bi bíi tūǹ circir kɔŋkooŋŋu tuuŋŋee gbēeǹ bi-tuuŋŋi pu, 5ki cūtìi ká Mooyiisi ki bí-u yii: <Binib bíi cāabìń tiwan an wīikí tikpil ki jítiǹ min ti-Dindaan bālifì bí dūú tɔ̄ ditundee pu kpataaa.> 6Ní Mooyiisi tīī mara bi dūu nāatì binib kɔkɔ dinaapaal poon yii: <Bininjab nì binimpoobi kɔkɔ ń gbèen̄ kí taa ti cáań tiwan tin bi làá dūú tɔ̄ circir kɔŋkooŋŋu tuuŋŋee.> Niinee ní báà ŋma gbēeǹ kaa ti bíi cāabìń. 7Di sá yii tiwan tin bi nìn cáań bí dūú tɔ̄ atuun kɔkɔ nín sá puee nìn wīikí tikpil. An nìn wīikí ki lákatì.
Circir kɔŋkooŋŋu bɔ́ntitam
8Bitɔntɔnliibi bin nìn cáá iciin tikpilee nìn bɔ́ntì circir kɔŋkooŋŋu ŋaabui. Bi nìn dū gulfab bin máǹ gùŋgumee nì bin máǹ wèeeeyee nì bin máǹ cínciŋee ki lùn̄ aŋaajan saalaa, ní ki lùn̄ keerubimbi ki nákáǹ ŋi-pu. 9Aŋaajanee fɔkɔŋŋu nìn sá meetab ubɔ kpá saalku ní ŋi-waaŋŋu sá meetab bili. Ŋi-kɔkɔ nìn ŋmà ní. 10Bi nìn dū aŋaajan aŋmoo ki ŋáĺ ki kpáfì, ní ki dū aŋmoo ŋin kíǹee mun ki ŋáĺ ki kpáfì. 11Bi nìn dū ŋŋaacalimu mun máǹ gùŋgumee ki kpákám̀ aŋaajan aŋmoo ŋin bi ŋáĺ ki kpáfì mpeekaamee diŋaajandi din lúŋkèe nyɔɔgbandi, nì ŋin bi ŋáĺ ki kpáfì nliliitiimee din pééyee nyɔɔgbandi. 12Bi nín ŋáĺ aŋaajan aŋmoo aŋmoo ki kpáfì puee kamaa nyɔɔgbandi nìn cáá ŋŋaacalimuee imuŋku ili nì saalaa, ní ajanliitilee ŋaacalimmu nìn ŋmà. 13Bi nìn dū sindaariya ki mɔ́ɔ́ titábikaal imuŋku ili nì saalaa ki cúú ajanliitil ki kpáfì, ní tanti kɔkɔ dūu ŋá tiwambaantiil.
14Boonee bi nìn dū tiŋɔkuti ki lùn̄ aŋaajan saalaa nì diba ki dūu ŋá tantililiiti un làá nīn bìintí circir kɔŋkooŋŋu puee. 15Diŋaajandi kamaa fɔkɔŋŋu nìn sá meetab saalku, ní ŋwaan sá meetab bili. 16Bi nìn dū ajan aŋmoo ki ŋáĺ ki kpáfì ubaanti, ní ki dū aluu mun ki ŋáĺ ki kpáfì ubaanti. 17Bi nìn dū ŋŋaacalimu imuŋku ili nì saalaa ki kpákám̀ aŋaajan aŋmoo ŋin bi ŋáĺ ki kpáfèe diŋaajandi din lúŋkèe nyɔɔgbandi, nì aluu ŋin bi ŋáĺ ki kpáfèe din pééyee nyɔɔgbandi. 18Bi nìn dū tasa kúti ki mɔ́ɔ́ titábikaal ki dūu nákáǹ ŋŋaacalimu pu ki dūu cúú diŋaajandi din kíǹee ki táb́, ní an dūu ŋá tiwambaantiil. 19Boonee ní bi mántì tipigban ki dūu bīiǹ tanti un bīī circir kɔŋkooŋŋu puee, ní ki dū ŋgban ŋun dàfèe ki páaǹ.
20Ní bi dū akasiya dɔŋu ki kpáá idɔjaati ki cóoǹ án nīn ŋúb́ circir kɔŋkooŋŋu. 21Idɔjaatee fɔkɔŋŋu nìn sá meetab biŋmoo, ní i-waaŋŋu sá santimeetab biŋmoo kpá imuŋku inaa. 22Bi nìn cáká idɔ ili in cāatèe taapui ní i kɔ́ĺ tɔb ili ili. Bi nìn ŋá idɔjaatee kɔkɔ pu míǹ ní. 23Bi nìn kpáá idɔjaati mmuŋku circir kɔŋkooŋŋu ŋgiil pú, 24ní ki dū animbil kúti ki mɔ́ɔ́ titílkaal imuŋku ili. Tíǹ pu ní bi nín kpáá idɔjaati puee làá nīn tɔ́kɔ́. Bi nín kpáá idɔjaati puee kamaa nìn cáá titílkaal tili tin poon ní laakin bi cákée làá kɔ́ee. 25Bi nìn gíti kpáá idɔjaati mmuŋku circir kɔŋkooŋŋu ŋgan pú. 26Bi nìn dū animbil kúti ki mɔ́ɔ́ titílkaal imuŋku ili, ndɔjaati kamaa titílkaal tili. 27Bi nìn kpáá idɔjaati iluu ki cóoǹ circir kɔŋkooŋŋu boon pú jandi din bí ŋwìiń jeetilaŋki púee. 28Bi nìn kpáá idɔjaati ili ki cóoǹ akpin pu poon pú án nīn tíkí circir kɔŋkooŋŋu. 29Idɔjaati gbanti taapui nìn dátiǹ tɔb, ama ní ki tin dūu kpáfì yilpu dibɔɔbaantiil dibɔmbipeepeekaalin. Míǹ ní idɔjaatiliitilee nìn sá tiwambaantiil ní ki nìn sá titíkiŋkaal. 30Mimmee idɔjaatee nìn sá inii dee, ní i-taapu tílkaati nìn sá animbil kúti ní ki nìn sá saalku nì ubɔ, an dàkà yii ndɔjaati ŋubɔ, titílkaal tili.
31Bi nìn dū akasiya dɔŋu ki kpítì ikalim iŋmoo ki cúú idɔjaati in bi kpááyee circir kɔŋkooŋŋu jandi diba. 32Bi nìn kpítì ikalim iŋmoo mun ki cúú dijandi din kíǹee, ní ki kpítì iŋmoo mun ki cúú boon ŋwìiń jeetilaŋki pú. 33Ŋkalim ŋun nìn bí kansikinee nìn jítì idɔjaati in bi kpááyee kansikin nì kansikin ní, kí yòon̄ circir kɔŋkooŋŋu kílilaŋki kí tin cáá kátí. 34Bi nìn dū sindaariya ki nyūntì idɔjaati in bi kpááyee nì ikalimee pu, ní ki dū sindaariya ki mɔ́ɔ́ mbɔmbiyaamu mun poon ní bi dū ikalimee ki bɔ́ee.
35Bi nìn dū gulfab bin máǹ gùŋgumee nì bi máǹ wèeee nì bi máǹ cínciŋee nì gulfab bin bí fálfal ki dàfèe ki lùn̄ ŋŋaasakaŋkaa, ki lùn̄ keerubimbi ki nákáǹ ŋŋaabuee pu. 36Bi nìn dū-ŋu ki sākaǹ akasiya dɔjaai inaa in bi dū sindaariya ki nyūntì sindaariya babikaati túuńee. Bi nìn dū animbil kúti ki mɔ́ɔ́ titílkaal tinaa ki dūu tíĺ taapu.
37Bi nìn dū gulfab bin bí fálfal ki dàfèe, nì bin máǹ gùŋgumee nì bin máǹ cínciŋee nì bin máǹ wèeeeyee ki lùn̄ ŋŋaasakaŋkaa ŋubɔ mun, usatalul nyáantì-ŋu ní bi dūu sākaǹ circir kɔŋkooŋŋu punyɔkɔki nyɔkɔpu. 38Bi nìn kpítì akasiya dɔjaatii iŋmoo, ki dū sindaariya ki nyūntì-i ki dūu cóoǹ, ní ki dū titábikaal tin bi dū sindaariya ki mɔ́ɔ́yee ki bá, ní ki dū tasa kúti ki mɔ́ɔ́ titílkaal tiŋmoo ki tíĺ idɔjaatee taapu. Idɔjaati gbanti pu ní bi nìn dū ŋŋaasakaŋkaayee ki sākaǹ.
S'ha seleccionat:
Exode 36: BASSARDC
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
BIBLE EN N'TCHAM (Bassar) © Alliance Biblique du Togo, 2013.