Exode 33
33
Ti-Dindaan tīī Mooyiisi mara bí nìkī nsan
1Ti-Dindaan bí Mooyiisi yii: «Yīkì doo, sii nì dinibul din a nyántìń Eejipiti tiŋkinee, kí nīn cá kitiŋ kin m pūtì ki pōoǹ Abraam nì Isaaki nì Jaakɔb yii m làá dūú tīī bi-maaliŋun yabee#33.1 Kpèè Diny 12.7, 26.3, 28.13.. 2M làá tɔ̄ń m-tuuŋŋu ŋú lìntī ni-nyɔkɔpu kí jà Kanaan yab nì Amɔɔr yab nì Eeti yab nì Peeriisi yab nì Eefi yab nì Jeebusi yab. 3Ní cùú kɔ́ kitiŋ kin poon nnaabiim nì tisiil còol̀ee. Ama man kaa làá nóó-ni kí cù, kun puee ni sá dinibul din pɔbil gbìfèe ní. Án làá yàntī ḿ kpɔ̀ kí céetí-ni nsanni.»
4Samaa nín gbìl̄ mbusu bɔti gbantee ní bi kāl̀ kii bi ká dikpoolee, ní báà ubɔ kaa dū tiwannyaandi ki ŋá u-ba pu. 5Di sá ti-Dindaan bí Mooyiisi ń tùkù Isirayeel yab yii: «Ni sá dinibul din pɔbil gbìfèe ní. M yaa bí yii m làá nīn còom̄ ni-kansikin, án kaa làá gāā dikàakil ní ḿ kpɔ̀ kí céetí-ni. Míǹ puee lēēmaan tiwannyaandi ni-wunti pu ḿ kpèè min ní m làá ŋá-nee.» 6Kí yòon̄ Ooreeb jool caŋin niin ní Isirayeel yab kíĺ kaa ti dū tiwannyaandi ki ŋá bi-wunti pu.
Dikpafindi tantiu
7Isirayeel yab yaa nìn bàn̄ laakin ki gāā dinaapaalee, Mooyiisi nìn yòontí tanti ní kí cùnnì kí cóoń dinaapaal boon ndandati. Bi nìn yíì-u yii <circir kɔŋkooŋŋu>. Un yaa nìn là kí bàlifì ti-Dindaan cee tibee nìn nyēē dinaapaalin ní kí cù circir kɔŋkooŋŋun. 8Ŋyunti kamaa Mooyiisi yaa nìn yíkìi cá circir kɔŋkooŋŋunee, samaa nìn yíkí ní báà ŋma yú u-tantiu nyɔkɔpu, ní bi-nimbiliŋ cɔ́ u-pu áli ú tin kɔ́ circir kɔŋkooŋŋun. 9Ŋyunti ŋun u yaa kɔ́ee ní ditagbancancaal ń sìntīń kí dāá yūĺ circir kɔŋkooŋŋu punyɔkɔki nyɔkɔpu, ní ti-Dindaan ń nīn bíi sòoǹ nì Mooyiisi. 10Isirayeel yab yaa nìn ká ditagbancancaalee sīntìń ki yúl̀ circir kɔŋkooŋŋu punyɔkɔki nyɔkɔpuee, ní bi-kɔkɔ ń tàtīí dòon̄ dicincibil bi-tantib nyɔkɔpui. 11Ti-Dindaan nìn sòoǹ nì Mooyiisi bi-nimbiiŋyi túĺ tɔb kii unil nì u-juti nín sòoǹ nì tɔb puee ní. Boonee ní Mooyiisi ń fàtīí nīn gítí dinaapaal pu, ní Nuuni jipɔɔn Joosuwa un nìn bí ki tútúǹ-uee ń gbíntí circir kɔŋkooŋŋun.
Ti-Dindaan nì Mooyiisi bíi sòoǹ
12Mooyiisi bí ti-Dindaan yii: «Kpèè, sii di bí-mi yii ḿ kpòotī dinibul nee, ama ní kaa yāntì m béè un ní a làá tɔ̄ń ú céeǹ-mee. Ama si mun di bí-mi yii: <M nyí-si tiŋan>, ní ki gíti lī yii: <A ká diyimɔɔl m-cee.> 13Míǹ puee m yaa lafun ká diyimɔɔl a-cee, á yàntī ḿ béé a-landɔkɔi nín sá puee. Mimmee m làá béé-si tiŋan ní kí páatí diyimɔɔl gbanti pu. Á nīn nyí yii ditimbundi nee sá a-nibul ní.» 14Ní Unimbɔti kíí Mooyiisi yii: «Mama m-ba di làá céeǹ-ni ní kí tīī-si diŋuŋfil.»
15Ní Mooyiisi bí-u yii: «Sii a-ba yaa kaa bí ti-cee kí céeǹ-ti, á taa lì yii tí yīkì doo kí nīn cá. 16Ba di làá dàkà yii man nì a-nibul ká diyimɔɔl a-cee? See a yaa céeǹ-ti baba di làá gàntì man nì a-nibul nì anibul ŋin kɔkɔ bí kitiŋ puee nib kansikin.» 17Ní ti-Dindaan kíí Mooyiisi yii: «M làá ŋá min a dáá bālifì-mi nee kí tīī-si, di sá a ká m-cee diyimɔɔl, ní man di baasii lēē-si.»
18Ní Mooyiisi bí yii: «M gbàam̄-si, yàntī ḿ ká a-nyooti.» 19Ní Unimbɔti bí-u yii: «M làá yàntī m-ŋanti nín sá puee kɔkɔ ń jītí a-nimbiin á ká, ní kí yíiń man ni-Dindaan yindi a-nimbiin. M sūǹ un saai m là kí sɔ̄ee saai, ní ki ŋáań tiŋan un m là kí ŋá tiŋanee#33.19 Kpèè Room 9.15.. 20Ama aa ŋūǹ kí wāl̀-mi nì a-nimbiliŋ yéè kpìrrr, di sá unil kaa ŋūǹ kí wāl̀-mi ki gbíntìi bí dimaŋfalin.» 21Ti-Dindaan gíti bí yii: «Kpèè mpaan ŋubɔ bí doo ki pìl̄-mi. Tɔ́kɔń ditaŋkpakpaandi nee pu kí nīn yú. 22Ŋyunti ŋun m-nyooti yaa láa bíi jītée, ḿ dāá dū-si kí báĺ ntaŋkpalɔkɔn ní kí dū m-ŋal kí bìin̄ a-nimbiin ní kí jītí. 23Boonee ní ḿ dāá cúú m-ŋal kí bìitī ní á wāl̀ m-boon, an yaa kíǹ m-nimbiinee, ubɔ kpá kí ká-ŋu.»
S'ha seleccionat:
Exode 33: BASSARDC
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
BIBLE EN N'TCHAM (Bassar) © Alliance Biblique du Togo, 2013.