Exode 31
31
Circir kɔŋkooŋŋu tɔntɔnliibi
1Ti-Dindaan bí Mooyiisi yii: 2«Kpèè, m lēē Uurii jipɔɔn Beesaleel, Uur un sá Juuda naakookunee naantiiu. 3M dū m-Fam ki ŋá u-ni tikpil ki yāntì ú nīn cáá iciin, ki yáb̀ ditundi poon, kí nīn cáá dinyil ní kí nīn cáá ilandɔkɔ kí ŋmā kí tɔ̄ atuun nín bí pu aba abee kɔkɔ. 4Ú nīn cáá ilandɔkɔ kí ŋmā kí dū sindaariya nì animbil kúti nì tasa kúti kí tɔ̄ atuun. 5Ú ŋmā kí kpítí ataŋkpanyaan bí nīn cáa nākantí tiwan pu, ní kí kpítí idɔ. U làá nīn sá unil un ŋūǹ ki ŋáań tikɔkɔ mmɔntiiminee ní. 6M dū Ayiisamaaki un sá Daani naakookunee jipɔɔn Ooliyaab ki ŋàl̄-u ú nīn tútúǹ-u. Míǹ mbaantiim ní m tīī bitɔntɔnliibi biba mun ŋŋmam bí ŋmā kí ŋá tin kɔkɔ m làá tùkù-ni ní ŋée, an dàkà yii: 7Dikpafindi tantiu nì Dipoondi dakaau nì u-bìil nì circir kɔŋkooŋŋu wanti kɔkɔ, 8nì teebil nì u-wanti nì fitilab tɔ́kɔŋkaati tin sá sindaariyamɔntee nì ti-wanti kɔkɔ, nì nsaraafan ŋun pu bi tùutī talaaluee, 9nì nsaraafan ŋun pu bi ŋáań saraawɔkaayee nì ŋu-tɔntɔŋwanti kɔkɔ, nì kusampeeu nì tin pu ku tɔ́kɔ́ee, 10nì bisaraaŋaliibi wampeeŋkaati nì usaraaŋakpil Aarɔn circir wampeeŋkaati nì u-jipɔmbi mun yati tin bi làá nīn pèentí ki ŋáań disaraaŋal tundee, 11nì ŋkpam min bi cáa sìtī binib yiliŋ pu kí dū-bi kí sú Unimbɔtee, nì talaalutuukaa un bi tùutī circir kɔŋkooŋŋunee. Bitɔntɔnliibi ń ŋá kii m nín tīī-si mara yii bí ŋá puee ní deedee.»
Ŋwiŋŋuŋfikaa bɔti
12Ti-Dindaan bí Mooyiisi 13ń tùkù Isirayeel yab yii: «Ní nīn tɔ́ ŋwiŋŋuŋfikaa tiŋan. Di sá yii ŋwiŋŋuŋfikaa sá kudaaŋŋu kubɔ ní man nì ni kansikin kí nīn pée cáa cá jaanjaan. Ŋu dàkà yii man ni-Dindaan di yāntì ni bí circir. 14An puee ní nīn tɔ́ ŋwiŋŋuŋfikaa, ŋú nīn sá circir wiiŋŋu ki tīī-ni. Un di yaa kpēē-ŋu fám ki túń ditundi ŋwiin gbantee, bí kpɔ̀-u. Tiŋman un di yaa túń ditundi ŋwiin gbantee, bí nyāntí-u m-nibul kansikin. 15Ní dū iwiin iluu kí tɔ̄ atuun, winluli dalee, ní dūú ŋùŋfì. Ŋúǹ sá ŋwiin ŋun ni dūu sú man ni-Dindaanee ní. Un kamaa di yaa túń ditundi ŋwiŋŋuŋfikaa dalee, bí kpɔ̀-u. 16Isirayeel yab ń nīn ŋúb́ ŋwiin gbanti kí nīn pée cáa cá jaanjaan. Di sá yii an sá tibɔti tin bóob́ ki yóoǹ án nīn bí ki cá jaanjaanee ní. 17Ŋwiŋŋuŋfikaa làá nīn sá kudaaŋŋu ní man nì Isirayeel yab kansikin kí nīn pée cáa cá jaanjaan. Di sá yii m dū iwiin iluu ní ki náań yilpu nì taapu, ní ŋwinluluútee, m kāl̀ ki ŋūŋfì#31.17 B. 12-17: kpèè 20.8-11, 23.12, 34.21, 35.2, Diny 2.1-3, Akoo 23.3, Ditee 5.13-14..»
18Unimbɔti sòon̄ nì Mooyiisi míǹ Siinaayi jool pu ki dóòyee, ní ki dū titaŋkpapilindi tili tin pu u dū u-ŋambiki ki ŋmàn̄ dipoondi marab ki nákáǹee ki tīī-u.
S'ha seleccionat:
Exode 31: BASSARDC
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
BIBLE EN N'TCHAM (Bassar) © Alliance Biblique du Togo, 2013.