Exode 15
15
Mooyiisi nì Isirayeel yab gāā dijajil laŋŋu
1Niinee ní Mooyiisi nì Isirayeel yab gāā nlan nee ki pàkā ti-Dindaan yii#15.1 Kpèè Dilee 15.3.:
«M làá gāā nlan kí pàkà ti-Dindaan,
kun puee u dàkā u nín sá ukpaan puee.
U téé itaamu nì bitanjakaliibi ki tɔ́ dimɔɔlin.
2Ti-Dindaan di sá man pɔŋŋu,
úǹ ní m làá nīn gà ilan ki nyɔ́ŋkí.
Úǹ di fīī-mi#15.2 Kpèè Yees 12.2, Ilan 118.14., úǹ di sá m-Nimbɔtiu,
m làá nīn nyɔ́ŋkí-u.
Úǹ di sá m-baa Nimbɔtiu,
m làá yòon̄ u-yindi yilpu.
3Ti-Dindaan di sá ubaatandaan,
u-yindi di sá ti-Dindaan.»
4«U dū Faaroo janjatɔrɔkub nì u-janjaliibi
ki tɔ́ dimɔɔlin.
U-janjaliibi bimɔmmɔntiibi
gbíntì Tikati mɔɔlin.
5Nnyim bīiǹ bi-pu,
bi sīntì nnyim taapu kii ditaŋkpalee.»
6«Ti-Dindaan, a-ŋaŋgiil cáá mpɔŋkpaan,
ŋúǹ di nàantí a-nannanliibi.
7A lafun sá ukpaaneeee!
A lábitì a-nannanliibi ki cìb̄.
A yaa gíí diŋuulee, a náań nì ŋŋmi ní,
ní ki wù a-nannanliibi kii timoolee.
8Kubuŋu kun nyēeń a-maŋfataabuŋyinee
yāntì nnyim kóoǹ ki kpáfì.
Nnyinjil yáatì ki yúl̀ kii digundee,
nnyim min bí taapuee fōō ki pɔ́ɔkì dimɔɔl kansikin.
9Binannanliibi nìn lī yii:
<Ti làá jà bi-boon kí tin cúú-bi,
kí yàkatī ti nín jáń ki fōō tin bi-ceeyee,
ní kí nīn kíǹ ki cáá tikpil an lákatí.
Ti làá fúutí ti-tàataajimmu ní kí pɔ̄ɔkiǹ-bi.>
10Ama ní sii ti-Dindaan púfì
ní mmɔɔnyim bīiǹ bi-pu.
An cáá-bi ki sīntì taapu
nnyim poon poon kii tikúbɔnee.
11Óo ti-Dindaan, inimbɔti kansikinee, ŋma di bí kii sii?
Ŋma di bí kii sii ki bí circir ki jìl̀ yéè?
A sá un tūǹ atuŋkpaanee ki máaǹ inyɔŋki,
a ŋáań maamaacib!
12A tāntì a-ŋaŋgiil
ní kitiŋ dū-bi ki náĺ.
13A dū a-neendi
ki fōō a-nibul ki líì.
A dū a-pɔŋŋu ki kpōotì-bi
ki cáa cáǹ circir tiŋki kin a cúú ki síiǹ-bee.
14Anibul gbìl̄ an bɔti ní tifaandi cúú-bi,
ní Fiiliistii yab pɔbiliŋ bíil̀.
15Ijawaan kɔ́ Eedoom tiŋki bɔtiibi,
Moowaab janjaliibi fāŋkì yɔ́kɔ́ yɔkɔ,
ní Kanaan yab wunti kpíì.
16Dinyoondi nì tifaandi cúú-bi!
Bi nín ká a-ŋampɔŋŋu ŋun a dūu jòoń-tee
ní bi ŋmíl̀ fɔ́ŋfɔŋ kii ditaŋkpalee,
áli a-nibul dāa jítì ki dóò, ti-Dindaan,
dinibul din ní a dée.
17A cáǹ-bi a-jool din sá a-fakalee pu
kí dū-bi kí kàan̄ niin.
A bɔ́ntì mpaan kí nīn kóò niin, ti-Dindaan,
Circir kɔŋkooŋŋu ŋun sii ti-Dindaan dū a-ŋalii ki máńee.
18Ti-Dindaan, sii di sá ubɔti kí nīn pée cáa cá jaanjaan!»
19Faaroo taamui nì u-janjatɔrɔkub nì u-tanjakaliibi nín kɔ́ dimɔɔlinee, ti-Dindaan nìn yāntì mmɔɔnyim bīiǹ bi-pu. Ama ní Isirayeel yab bíǹ dūtì dimɔɔl ŋkulimmi.
20Niinee Aarɔn niisal Miiriyam un sá Unimbɔti bɔnaatiliuee yōoǹ kigaŋgaŋ, ní binimpoobi kɔkɔ mun dɔ́miń ki kútì u-pu nì bi-gaŋgammu ki bɔ̀ɔ́ ki ŋōō. 21Binimpoobee yaa bíi gà ilanee ní Miiriyam ń kíí-bi yii:
«Gāāmaan ilan kí nyɔ̄ŋkì ti-Dindaan,
kun puee u dàkā u nín sá ukpaan puee.
U téé itaamu nì bitanjakaliibi ki múĺ dimɔɔlin.»
ISIRAYEEL YAB SAŊKINDI KUTEEUN (15.22–18.27)
Maara nyim bɔti
22Mooyiisi yōoǹ Isirayeel yab bi yíkì Tikati mɔɔl ki túĺ Suur teeku watil. Bi cōom̀ iwiin ita kuteeun kaa ká nnyim kí nyɔ̀. 23Bi nìn bàn̄ Maara ki ká nnyim, ama kaa ŋúń ki nyùn̄-mì, kun puee mi nìn tū. An pu ní bi kíǹ ki yíì niin yii Maara, taapu di sá yii <ntuntun>. 24Ní samaa kɔkɔ kíĺ ki bíi wòoǹ Mooyiisi ki lì yii: «Ba ní ti làá nyɔ̀?» 25Ní Mooyiisi kúuǹ ki yíiń ti-Dindaan ní úǹ dàkā-u ndɔ ŋubɔ u dūu tɔ́ nnyimin ní mi mɔ́ɔkì.
Niin ní ti-Dindaan nìn tīī Isirayeel yab marab nì akoobil, niin mun ní u nìn tí cɔ́ŋkì-bi. 26U nìn bí-bi yii: «Ni yaa pílifí man ni-Dindaan ni-Nimbɔtiu nín sòoǹ puee mmɔntiim, ki ŋáań tin bí deedee m-nimbiinee, ki yaa gbìl̄ m-marab ki ŋúb́ akoobil kɔkɔee, maa làá yàntī iween in m nìn dūu tɔ́ Eejipiti yab puee ń gbēē-ni. Di sá yii man di sá ni-Dindaan un cāantí-nee.»
27Isirayeel yab dūu bàn̄ Eeliim tiŋkin. Inyimbul saalaa nì ili nì ibafi imuŋku ita nì saalaa nìn bí niin. Ní bi kàl̄ ki kɔ́ĺ inyimbulee.
S'ha seleccionat:
Exode 15: BASSARDC
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
BIBLE EN N'TCHAM (Bassar) © Alliance Biblique du Togo, 2013.