Zechariah 4
4
Nan Miyaleman Paddungnay Nipa'enap hi Aat nan Ipattu'an di Hilaw ya nan Ayiw an Olibo
1Din anghel an gun ni'hapit ay ha"in ya immali an namangon ay ha"in an paddungnay unna' nonollo'. 2Ya inalinan ha"in di, “Ngadan di mattigmu?”
Ya tembal'un inali' di, “Hay tinnig'u ya nan namahmah an balitu' an ipattu'an di hilaw, ya wadaday malukung an duyun nipattu' an ittuwan di lanah punhilaw,#4:2 Hay ipa"el nan lanan punhilaw ya nan abalinan nan Na'abuniyanan an Lennawa. ya an amindan hinohha ya waday himpiptu an ipattu'an di kandila. 3Ya daden pangipattu'an hi hilaw ya nibattan hinan duwan ayiw an olibo.”#4:3 Hay ipa"el nan ohan ayiw ya nan muntamuh gubelnud Judah an hi Zerubbabel an gobelnadol, ya hay ipa"el nan ibbanan ayiw ya nan muntamuh nan lelehyonda an hi Joshua an Nabagtun Padi (verse 14). Ya hay alpuwan di abalinandan duwa ya nan Na'abuniyanan an Lennawa.
4Ya hinanhana' hidin anghel an din ni'hapit ay ha"in an inali' di, “Hay pohdon nin hana an ipa'innila, Apu?”
5Ya tembalnan inalinay, “Undan mi'id inilam hi aat hana?”
Ya tembal'un inali' di, “Mi'id inila', Apu.”
6At inalinan ha"in di, “Umat hituy hinapit Apo Dios ay Zerubbabel an inalinay,#4:6 Hi Zerubbabel ya gobelnadol ad Judah (Hag. 1:1). Hay umabakan ya bo'on hay bi'ah unu abalinan di taguy dumalat, mu dumalat hinan abalinan nan Lennawa', 7at ta"on un nan nidugah an humewol an umat hi a'ongol di duntug ya ma'ubah ay he"a. Ya ha"adom goh nan Timplu'. Ya heden pangiyammam hinan angunuh an Batu ya it'u' nan tataguy, Wagahan ni' Apo Dios! Wagahan ni' Apo Dios!”
8At himmapit goh hi Apo Dios ay ha"in an inalinay, 9“Hi Zerubbabel di nangiyammah nipabunan di tu'ud ten Timplu,#4:9 Na'at hidin 537-536 B.C. (Ezra 3:8-11). ya hiya goh di munlopah.#4:9 Hay nalpahana ya na'at hidin 516 B.C. (Ezra 6:14-16). At hiyay panginnilaanyu mahkay an Ha"in an Dios an nidugah di abalinanay nannag ay he"a. 10Ya immannung an munlungdaya nan tatagu ti un itang di natamuan, mu ma"am'amlongdah unda tigon nan naga'dan an lukud an o'ognan Zerubbabel ti itudunay ituluyan nan a'ammaan nan Timplu.”
(Ya ma'innila ta'wa an henen pitun hilaw ya hay ipa'innilada ya nan matan Apo Dios an pannignan amin hinan ato'aton nan tataguh nan abablubabluy hitun luta.)
11Inali' goh hinan anghel di, “Hay pohdonan ipa'innila nan ayiw an olibo an wah nan appit hi agwan ya iggid di ipattu'an di hilaw?”
12Mu mid nambalna. At impidwa' an inaliy, “Hay pohdonan ipa'innila nan duwan hapang di ayiw an olibo an wah nan pangngel di balitu' an galipu an muntidtid hi lanan di olibo?”
13Ya inalin nan anghel di, “Dan agguymu inilay aat date?”
Ya tembal'un inali' di, “Mi'id inila', Apu.”
14At inalina goh ay ha"in di, “Dida hana din duwan pento' Apo Dios ta itamuanda Hiyah tun luta.”
S'ha seleccionat:
Zechariah 4: NHAD
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
© 2018, Wycliffe Bible Translators, Inc. All rights reserved.