Matayo 28
28
Cerino pa Yesu
(Mar 16:1-10; Luk 24:1-12; Yoh 20:1-10)
1Munyo Sabato orumo, kareno ceŋ nyaka gulo i ndelo marapena ma tic, Maria Magadalina kodi Maria man jokidho neno kaliel. 2Gikenyo yengirok pa piny madwoŋ obedo; aka malaika pa Rwoth oloro piny wok i polo, oŋilo woko kidi ma dhok kaliel, to bedo i wiye. 3Go oyido cale lithkoth aka nangin pere oyido tar pa pe. 4Lworo omako jokur swa m'omiyo jokirin, to jolokere pa jom'otho.
5To malaika no owaco ri mon no ni, “Wikiri wilwor. Aŋeyo ni wirango Yesu ma ceŋino ogur kwoŋ musalaba. 6Go ongoye ka, otieko cerino paka owaco won. Biye winen kam'oyido oketh'iye go. 7Onyo kidhi win mayot, wiwaci ri jofonjirok pere ni, ‘Go otieko cerino kwoŋ jom'otho aka onyo telo kidho riwin Galili; kenyo ama wibino nen'iye go. Eno atieko waco riwin.’ ”
8Gikenyo munyo fodi lworo opoŋ kwoŋ jo aka josangala, mon no joredo wok i kaliel to joringo kidho waco gino ri jofonjirok.
9Gikenyo jopoyo ka Yesu oromo gi jo to m'otho jo ni, “Siem wobedi gi win.” Jodhire bonge, jomako tiende, to jolamo go. 10Yesu owaco rijo ni, “Wikiri wilwor. Kidhi wiwaci ri jom'oyeyo jowokidhi Galili, aka jobino nenan yukoro.”
Wac ma jokur kaliel jocwogo
11Munyo mon no fodi jowotho jokadho, jolweny megi kwoŋ jokur kaliel jogik i tindi to jowaco ri jotel pa jocway ri Were i wi migam gimoro je m'otimere. 12Jotel pa jocway ri Were i wi migam no joromo kodi jotel pa ji to jotimo can pajo. Jomiyo jolweny no pesa kweth, 13ka jowaco ni, “Wiripo waco ni jofonjirok pere jobino wor to jokwalo delkwoŋe munyo wagalo nindo. 14Aka ka Gavana owinji gime wabino ridho rigo ni wingoye gi raco, aka wikibino podho i teko moro je.”
15Jokur jokwanyo pesa no to jotimo paka owaci rijo. Aka meno wac m'ocwogi ma Joyuda jonyayo kiri konon me.
Yesu menyere ri jofonjirok pere
(Mar 16:14-18; Luk 24:36-49; Yoh 20:19-23; Tim 1:6-8)
16 #
Mat 26:32; Mar 14:28 Jofonjirok apar g'acel jokidho wi tendere i Galili kama Yesu ocano rom'iye gi jo. 17Munyo joneno go, jolamo go, kada nende joman kwoŋ jo oyido fodi joganagana. 18Yesu ocore cegin to waco rijo ni, “Otiek miyan meni i polo kodi i piny. 19#Tim 1:8Am'omiyo kidhi win wiloki nonin je jofonjirok paran; wibatisa jo i nyingi Baba gi Wode gi Cuny Maleŋ. 20Aka wifonji jo mako or je m'amiyo win. Aka ŋey win nike abino bedo gi win ndir je, tundo i gik piny.”
S'ha seleccionat:
Matayo 28: DHOPE
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Dhopadhola DC Bible © Bible Society of Uganda, 2018.