Matayo 21
21
Jaboth donjo Yerusalem gi dwoŋ
(Mar 11:1-11; Luk 19:28-40; Yoh 12:12-19)
1Munyo joriko Yerusalem, jobino Bethfage, wi got Oliv, to Yesu oro jofonjirok pere ario yuwiye gi wac me: 2“Kidhi win loka ma yuwiy win kama wibino nwaŋ'iye ma piyo, punda m'otwey i loc gi nyathi mere. Gony win jo wikel ran. 3Aka ka ŋatimoro owaco riwin gimoro, waci win rigo ni, ‘Jadwoŋ ama yenyo.’ Go bino weyo wokadhi mayot.” 4Gime otimere ma miyo gima jatuci wac Were owaco wotundi i kare ni,
5 #
Zek 9:9
“Waci ri tindi Zayon ni,
Neni kere perin bino bongin.
Go mwol aka obedo wi punda,
wi nyathi punda, wi punda mathin.”
6Gikenyo jofonjirok jokadho yuwiye to jotimo paka Yesu ooro jo; 7jokelo punda gi nyathi mere, joketho kwoŋ jo nangin pajo, to jomiyo Yesu bedo wiye. 8Lwak ji madwoŋ jopedho nangin pajo i royo, kareno joman jotoŋo jangi yen aka jopedho i royo. 9#Zab 118:25-26Lwak ji m'oyido wotho yuwiy Yesu kodi m'oyido luwo go cen jocako koko ni, “Ozana! Pak wobedi ri Nyakwar Daudi! Were womiy ŋata bino i nyingi Rwoth silwany! Ozana! Pak wobedi malo swa i polo!”
10Munyo Yesu odonjo Yerusalem, ji ma tindi gibe jocako woy, kareno jopenjo ni, “Me ŋa?” 11Lwak ji odwoko ni, “Me Yesu jatuci wac Were, ma wok Nazareth ma Galili.”
Yesu donjo i Ot pa Were
(Mar 11:15-19; Luk 19:45-48; Yoh 2:13-22)
12Yesu odonjo i Ot pa Were aka oriemo woko jom'oyido jonyewere kosa jotana gigipiny i Ot pa Were; oŋilo woko mezin pa joma wilo pesa kodi kombere pa jom'oyido jotana akurin. 13#Isa 56:7; Yer 7:11To waco rijo ni, “Ondiki i Ndiko Maleŋ ni Were owaco ni, ‘Ot paran ibino lwoŋo ni ot ma kwayo.’ T'onyo pama wiloko ŋungu pa jokwo ayino!”
14Joma waŋ jo otho kodi jom'oŋol jobino bonge i Ot pa Were to botho jo. 15Jotel pa jocway ri Were i wi migam kodi jondiko nge omako jo munyo joneno gir'aura ma go otimo, kareno nyithindho jokoko i Ot pa Were ni, “Wopak Nyakwar Daudi!” 16#Zab 8:3Gikenyo jopenjo Yesu ni, “Iwinjo gima jowaco?” Yesu odwoko ni, “Awinjo maber. Fodi wikisoma ndiko ma waco ni, ‘I dhok nyithindho kodi nyithindho ma dhoth am'owok'iye pak maber ma kakare?’ ”
17Yesu oweyo jo to wok i tindi no kareno como yu Bethania, to nindo korago.
Yesu kwoŋo makuyu
(Mar 11:12-14,20-24)
18Munyo Yesu ogik i tindi odikin yawere mere, go oyido winjo kec. 19Go oneno kiti makuyu moro m'icamo i thengi royo to kidho i tiende, to k'onwaŋo kwoŋe gim'onyak kwanyo woko boke kende. Gikenyo go owaco ri makuyu ni, “Ik'odoko inyak gimoro!” Piyo piyo to makuyu no thwo. 20Jofonjirok joneno gime to jodhier. Jopenjo ni, “Othwo mayot nedi ama?” 21#Mat 17:20; 1 Kor 13:2Yesu odwoko ni, “Adieri awaco riwin, ka wibedo gi yeyo, aka wikiganagana, wibino nyalo timo gim'atimo ri makuyu me; ki meno kende, wibino nyalo waco ri got me ni, ‘Ay ka ibolere i nam.’ To bende timo ameno. 22Ka winigi yeyo, wibino limo gimoro je ma wikwayo Were.”
Penji kwoŋ meni pa Yesu
(Mar 11:27-33; Luk 20:1-8)
23Yesu odonjo i Ot pa Were aka munyo go fonjo, jotel pa jocway ri Were i wi migam kodi jotel pa Joyuda jobino bonge to jopenjo go ni, “Meni aŋo m'initie gine ma timo gigipiny me? Ŋa m'omiyin meni no?” 24Yesu odwoko jo ni, “Abende abino penjo win gimoro, ka winodwokan aka abende anowaci riwin kam'anwaŋ'iye meni m'atimo gine gigipiny me. 25Meni pa Yohana ma kibatisa owok kune; owok bongi Were kosa bongi dhano?” Wegi jocako piem kendi gin ni, “Wawaci aŋo? Ka wanodwoki ni, owok bongi Were, go bino penjo wan ni to raŋo ma wikiyeyo Yohana? 26To ka wadwoko ni owok bongi dhano, walworo gima ji jonyalo timo, kwoŋbedo ji je joridho ni Yohana oyido obedo jatuci wac Were.” 27Riameno jodwoko Yesu ni, “Wakuya.” Gikenyo go bende owaco rijo ni, “Abende ak'owaci riwin kam'anwaŋ'iye meni m'atimo gine gigipiny me.”
Ageca kwoŋ yac ario
28Onyo wiparo nedi? Jal moro oyido nigi wote ario. Go okidho bongi wode madwoŋ to waco ni, “Wodan, kidhi itiy reye i ndelo konon.” 29Wode odwoko ni, “Ak'otim ameno.” To rumacen odoko owiro paro to kidho tic i ndelo vini. 30Gikenyo bajo okidho bongi wode man, to kwayo go bende ameno. Wode no odwoko ni, “Alakidho, jadwoŋ.” To go k'okidho. 31Mene kwoŋ jario no m'otimo gima bamere oyenyo? To jodwoko ni, “Wode madwoŋ.” Yesu owaco rijo ni, “Adieri awaco riwin, jocoki misolo kodi mon ma jotana delkwoŋ jo i timo giwickwot ama jolakidho i Ker pa Were to widoŋ. 32#Luk 3:12; 7:29-30Kole Yohana obino i dier win kareno nyutho win royo m'otire ma wiluw, to wikwero yeyo go; to jocoki misolo kodi mon ma jotana delkwoŋ jo i timo giwickwot ama joyeyo go. Odoko kada munyo wicowo neno ameno je fodi wikiwiro paro mewin wiyey go.”
Ageca kwoŋ jotic i ndelo vini
(Mar 12:1-12; Luk 20:9-19)
33 #
Isa 5:1-2
Yesu owaco ni, “Winji win ageca man: Obedo won lowo moro m'opidho vini pere i ndelo, ogoyo cel othoko gine, okunyo bur ma biyo medho ma vini, to gero ot acurcur ma kur. Gikenyo go oketho ndelo vini no i cingi jotic to eye peco kidho woth. 34Munyo ndir otundo ma fono vini, go ooro ŋecin pere bongi jotic nike jowomiy go vini pere. 35Jotic jomako ŋecin pere no, jogoyo acel, joneko man, to jogoyo man gi telin. 36Go odoko ooro ŋecin man mathoth loyo jomarapena, to jotic jotimo jo ameno bende. 37Macowe, go ooro rijo wode won ka waco ni, ‘Waŋin jobino woro wodan.’ 38To munyo jotic joneno wode, jowaco i dier gin wegi ni, ‘Me won a wode ma bino lunjo gigipiny pere. Waneki go win eno, aka wakwanyi lim pere!’ 39Riameno jomako go, jobolo go woko ma ndelo vini, to joneko go.”
40“Onyo ka won ndelo vini obin, otim aŋo ri jotic no?” 41Jodwoko Yesu ni, “Go adieri bino neko ji mareco no to ketho ndelo vini i cingi jotic man ma jobino miyo go vini pere m'ofon i ndir m'otire.” 42#Zab 118:22-23Yesu openjo jo ni, fodi wikisoma i Ndiko Maleŋ ni,
Kole tele won ma jogeto jocayo ni bukony
am'olokere tele ma thielo kindi ot.
Me obedo tic pa Rwoth;
aka neno maber swa riwan!
43Am'omiyo awaco riwin, Ker pa Were ibino kwanyo woko kwoŋ win t'imiyo ji ma jobino nyak gim'otire. 44[Ŋat'opodhi wi tele me bino ŋadere wolokere mathindho thindho; aka ŋata tele me opodhi kwoŋe tele me opodhi kwoŋe, tele bino ŋinyo go loko go pa fukefuke].
45Jotel pa jocway ri Were i wi migam kodi Jofarisayo jowinjo agecin pa Yesu to joŋico nike go oyido luwo kwoŋ jo. 46Riameno jotemo mako go, to jolworo lwak ji ma joyeyo ni Yesu obedo jatuci wac Were.
S'ha seleccionat:
Matayo 21: DHOPE
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Dhopadhola DC Bible © Bible Society of Uganda, 2018.