Khuurakikha 39
39
Yusufu n'umukyelama wa Potifari
1Ari ba Ishimaeli nga baamalile khukhwoolesa Yusufu mu Misiri, baamukulisa wa Potifari, umusaani umu Misiri, uwaba mutweela khu bakhulu ba Faraawo, nga niye uraangilila baaliindi be mu lubili.
2 #
Bur 7.9
Umukasya waayeeta naabi Yusufu, musaambo iyo, waaba nga akhola buulayi mu buli shiindu shoosi sheesi aakholatsaka. Aryo waamenyatsaka muungo mw'omukoosi weewe umu Misiri uyo. 3Potifari wemenielesa, waashifumbula nga ilala Umukasya aaba ali ni Yusufu, naluundi waashibona nga Umukasya aamuyeetatsaka naabi mu buli shiindu shoosi sheesi aakholatsaka. 4Musaambo iyo Yusufu wekhoyesa naabi Potifari, waamwikyelisa umuloleleli weewe uwa buraawa. Isho shaakila waamwikyelisa umukhulu we muungo mweewe mwoosi, waamuwaambisa buli shiindu shoosi sheesi aaba nasho. 5Khukhwaamila abweene awo, nga baaweele Yusufu buukhulu ubwo, Umukasya waarakikha khuuwa muungo mwa Potifari tsikhabi tsingali khulwa Yusufu. Tsikhabi ts'Omukasya itso tsaaba khu biindu bya Potifari byoosi, bibyaba mu ntsu mukari ni mu mikuunda kyeewe. 6Musaambo iyo, Potifari waalekhuulila Yusufu buunyala bwoosi bwe khuulolelela buli shiindu. Aryo waalekha khubakho ni sheesi eyembelela shoosi ta, khuurusakho khuukhalawo bilyo shiina byeesi aba alya.
Yusufu aaba umusaani umushishifu buulayi, luundi aaba abonekha buulayi naabi. 7Lwanyuma nga imbuka yaabirirewo, umukyelama wa Potifari waarakikha khukhwikoomba naabi Yusufu, nga akana ari atsye akone ni naye.
8Ne Yusufu niye wekaana nga amulomela ari, “Umukoosi wase waayikhola ise khuuba umuloleleli we bibiindu byeewe byoosi mu ntsu yeewe. Buli shiindu shoosi sheesi ali nasho shili mu makhono kaase. 9Ise ndi ni buunyala mu ntsu muno bubulekhaana ni bubweewe. Naluundi niye mbaawo shishiindu shoosi sheesi akhamaambisa ise ta, khuurusakho iwe wenyene, lwekhuuba iwe uli umukyelama weewe. Nashiryo, ise inyala ndyeena khuukhola shiibi shishifwaana shiryo mu moni tsa Wele?” 10Ne abe yakhaba nga umukhasi uyo aamuŋuunyilisa aryo buli shifukhu, nga akana ari atsye akone ni naye, Yusufu ekaanila ilala.
11Ne yabawo shifukhu shitweela, Yusufu wenjila mu ntsu khuukhola kimilimo kyeewe, nga mbaamwo na mutweela khu baraambi babaandi ta. 12Kila umukhasi amuloondakho, waamukumila ingubo yeewe, nga amulomela ari, “Yiitsa khukone.” Ne Yusufu weyabulamwo ingubo, waatitukha waarura ibulafu, waamulekha ni nayo mukhono.
13Ne umukhasi n'ashibona ari Yusufu waatitukhile waarurire ibulafu, waamulekhile ni ngubo yeewe, 14waarakikha khuukhupa liyoombo, nga alaanga baraambi basheewe, waabalomela ari, “Bonakho! Umusaani umu Heburaniya isi umuseetsa wase aareera ali khuukhureerera bye kamaŋaanyu! Abe etsile mu shiseenge shase bari akana khuukona ni nase, ne ise naakhupa liyoombo liikali lilyeene. 15Naye nga n'abone aryo, waatitukha waarura ibulafu, waandekha ni ngubo yeewe.”
16Aryo waabiikha ingubo iyo khukhwoolesa umukoosi wa Yusufu n'akobola ingo. 17Lwanyuma umukhasi waamuboolela byoosi nga ni byaba, nga aloma ari, “Umusaani umu Heburaniya isi waareera uyo abe etsile mu shiseenge shase khukhufwakhila ise. 18Ne ni khupile liyoombo luukali lulweene, atitukhile waarura ibulafu, waandekha ni ngubo yeewe yino.”
19Aryo Potifari n'awulila biilomo by'omukyelama weewe bino, lirima lyaamuniina! 20Kila atsya wawaamba Yusufu, baamubowa mu mapuusu, mweesi baabowatsakila baabowe b'omuyiinga babaandi, naye waamenya mu bweene umwo. 21#Bur 7.9Ne Umukasya waabatsaka ni Yusufu ibweene iyo nayo, waamwokyesanisa bye shiisa sheewe shiikali, shaakila wekhoyesatsaka naabi umuliindi we kamapuusu. 22Shikila umuliindi uwe kamapuusu yuno awa Yusufu buunyala bwe khuulolelela baabowe babaaramile boosi, ni khuulolelela buli shiindu shoosi shishakholekhatsaka mwipuusu ilyo. 23Umuliindi yuno s'elolelesatsaka khu shiindu shoosi sheesi Yusufu aaba nga akhola mwipuusu ta, lwekhuuba Umukasya aaba ali ni Yusufu, na buli shiindu shoosi abe sheesi akhola, shamutsiilatsakila buulayi.
S'ha seleccionat:
Khuurakikha 39: LPE
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
The Bible in Lumasaaba © Bible Society of Uganda, 2016.