Rm 12
12
Bə̂d mbe nɨ ben ə Kristo bɨrɨ jɨg ɨ̀tènɨ̀ fi
1Mbɨ bɔŋgɔb, mə wɨə buʼ ɨbɔ ɨ nən ni ɨchî nɨ Ŋwìə̀ ə dììrɨ̀ əwa, mbə̀ naʼ ə ɨnyod əmbɨ ə Ŋwiə̀ ɨghabɨ əghɨ ə̀fà ze nɨ yeʼ ɨkǎ, nɨ zeŋɨ, nɨ Ŋwìə̀ bə̀ ghaʼ. Əzɔ̂ yɨ ɨchî nɨ kuʼnɨ nɨ tɨ̀ mbə wumnɨ ə Ŋwiə̀. 2Tɨ mbə̀ beenɨ ə əbɔʼ ɨnû mbe nɨ bə̂d ɨŋga ɨsɨg wɔ̂ ə ghɨ̀ə̀, àyɨə mbə̀ saŋə ni Ŋwìə̀ beŋ əwən ɨchî nɨ wɨə nàʼ rɨkɔndɨ fi ɨ nən, ɨmbə̀ʼ mbə kyerɨ ənû ze nɨ wɨ̀ kə̀bɨ. Əne yɨ ni mbə̀ kyerɨ ɨnû mbe nɨ yeʼ mbɨ chɔ̀m, kyerɨ mbe nɨ wɨ̀ ghaʼi bə̀ kyerɨ mbe nɨ kuʼnɨ.
3Ɨchî nɨ Ŋwìə̀ fə ghɨ ɨ̀chɔ̀m ənɨ ə num, mə wɨə ghà əmbɨ wə̀d jìm əkaʼ nən ni tɨ wɨ̀ kɔndɨ i ni tə chè ɨchî nɨ tə yeʼ ə, àyɨə wə̀d jìm kɔndɨ ənû ɨmbə̀ʼ i ɨnyod ɨchî nɨ kuʼnɨ. Wə̀d mɔʼ mɔʼ kɔndɨ beenɨ əbɔʼ ɨchî nɨ Ŋwìə̀ naʼ ɨbenɨ ɨ bɔ. 4Mbə̀ kyerɨ ə ni nyamnyod ə berɨ ɨsɨ ɨnyod nɔnɔʼ, àyɨə chəi ɨsɨ ɨnyod jìm berɨ ɨkwɨ ə̀fàʼì mɔʼ. 5Əne mba mbɔ̂ nɨ nɔʼɔ, tɨ̀ yɨə nyamnyod mɔʼ ɨchî nɨ tɨ̀ yeʼ ənɨ ɨfɔtɨ mbɨ Kristo. Wə̀d mɔʼ mɔʼ fə sɨ ɨba rɨ ənɨ ə nyamnyod wə̀d jìm. 6Tɨ̀ berɨ mɨneʼe nɨ kwepə beenɨ əbɔʼ ɨchî nɨ Ŋwìə̀ ghɨ ɨ̀chɔ̀m ənɨ ə na. Ɨneʼe wə̀d mɔʼɔ mɨ yeʼ ni wɨ̀ zu ɨkə̂n Ŋwiə̀ ghà, wɨ̀ gha ɨchî nɨ ɨbenɨ məd chwiə. 7Ɨneʼe wə̀d mɔʼɔ mɨ yeʼ ni wɨ̀ faʼa, wɨ̀ bə fàʼ. Ɨneʼe wə̀d mɔʼɔ mɨ yeʼ ni wɨ̀ chwi ənû, wɨ̀ bə chwiə. 8Ɨneʼe wə̀d mɔʼɔ mɨ yeʼ ni wɨ̀ timbɨ bə̂d, wɨ̀ bə tìmbɨ̀. Ɨneʼe wə̀d mɔʼɔ mɨ yeʼ ni wɨ̀ naʼ ɨghɨ əmbɨ ə bə̂d, wɨ̀ saŋnɨ. Ɨneʼe wə̀d mɔʼɔ mɨ yeʼ ni wɨ̀ tumbɨ bə̂d, wɨ̀ tumbɨ ənɨ i fîŋ jìm. Ɨneʼe wə̀d mɔʼɔ mɨ yeʼ ni wɨ̀ ghɨ ɨ̀chɔ̀m ənɨ ə bə̂d ŋgəʼ, wɨ̀ ghɨ̀ əne mbɨ ɨghaʼi.
9Mbə̀ ghaʼ bə̂d ənɨ tə fîŋ rɨ̀jìm. Mbə̀ ban ɨnû rɨbɔ̀ŋ, yim ɨnû nɨ ghɨ ɨ̀chɔ̀m kwɨ ɨgun. 10Mbə̀ ghaʼ mbə bɔŋgɔb ɨchî nɨ bɔŋgɔb berɨ ghaʼrɨ ə ɨnyod. Mbə̀ bə wumnɨ mbə bɔŋgɔb chè ɨchî nɨ mbə̀ə wumnɨ ə ɨnyod. 11Tɨ mbə̀ tɔ ghɨ̀ ə ɨgwed ənɨ mbə̀ə fàʼ əmbɨ ə Ŋwiə̀. Mbə̀ saŋ Əzwî ə nyɨ ɨŋga tə fîŋ ghɨ̀ ni mbə̀ faʼ rɨkǎ. Mbə̀ faʼ əmbɨ Ə̀nùŋɨ̀sɨg ənɨ tə fîŋ rɨ̀jìm. 12Mbə̀ ghaʼrɨ əwən ɨmbə̀ʼ ɨghɨ mbe nɨ mbə̀ nuŋ rɨkɔndɨ ɨ wòm, yim fîŋ ənɨ mɨ̀nyùmə̀ jìm mbe nɨ mbə̀ə zəə ŋgəʼ bə̀ kɔŋgɨ ə Ŋwiə̀ ənɨ mɨ̀nyùmə̀ jìm. 13Bə̂d Ŋwiə̀ mɔʼɔ mɨ kwaŋ ɨghɨ, mbə̀ naʼ ɨghɨ mbe əmbɨ mɨ̀mə̌d. Mbə̀ nɨŋ bə̂d rɨ̀sɔ̀ʼɔ̀ ɨŋga tə nəb.
14Mbə̀ zɨ əbɔrəbɔd ɨgun ə bə̂d mbe nɨə nwèndɨ̀ tə rɨkyerɨ-ɨwu. Mbə̀ zɨ yeʼ əbɔrəbɔd, kaʼi ndɔ̀n. 15Mbə̀ ghaʼrɨ mbɨ ə bə̂d mbe nɨə ghaʼə, bə̀ zə̀ʼ mbɨ mbe nɨə zə̀ʼə̀. 16Mbə̀ chub ənɨ ənû ə mɔʼ mbɨ mbə bɔŋgɔb. Tɨ mbə̀ nɔ ə ɨnyod, àyɨə mbə̀ jɨgnɨ mbɨ ə bə̂d kwa kwa. Tɨ mbə̀ kɔndɨ ə ni mbə berɨ ɨwe chè bə̂d mɨ̀jìm.
17Tɨ̀ mbə̀ wi ə ɨbə ənɨ ɨbə, àyɨə mbə̀ kywɨ ənywɨ ghɨ̀ yeʼ ɨnû mbe nɨ wə̀d jìm kyerɨ ni à yɨ ɨnû chɔ̀m. 18Ɨchî mɨ chwiə, mbə̀ ghɨ ɨnû jìm ənɨ əzən əbà ɨ zə ni mbə̀ chub ənɨ əbɔrəbɔd mbɨ ə wə̀d jìm. 19Mbɨ bɔŋgɔb nɨ mə̀ ghaʼi kwàʼ rɨŋgəʼ, tɨ mbə̀ wi ə pə̀n, àyɨə mbə saŋ ənû nɨ wi pə̀n əmbɨ ə Ŋwiə̀, ɨmbə̀ʼ ɨghəm nɨ ə zɨ ɨŋga Ə̀ŋwàʼnɨ̀ ə Ŋwiə̀ ni, Ə̀nùŋɨ̀sɨg ə ghà ni, “À yɨ mɔ̌ ə wìə̀ pə̀n. Mə bɨrɨ wì.” 20Àyɨə “Njì rɨ mɨ yeʼə zaŋ e wə̀d pə̀n, à naʼ ɨghɨjɨg ɨ bɔ; ədɔʼ ə mɨ yeʼə ne əməd, à nàʼ əghɨ ə mɔʼɔ ɨ bɔ ni wɨ̀ nɔ. À mɨ ghɨ̀ əne, ətu əməd ə bɨrɨ nìd.” 21Tɨrə̀ ben e ni ɨnû rɨbɔ̀ŋ baŋ əwe, àyɨə baŋ ɨnû rɨbɔ̀ŋ mbɨ ɨ̀chɔ̀m.
S'ha seleccionat:
Rm 12: mgo
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
© 2013, Cameroon Association for Bible Translation and Literacy