Ibrani 10
10
Yesus nala tenan a fasa watan ma neluk korban verin Ubu, ma ntevut tamata rira salasilan ra
1Terang a valing averi! Musa ni inukun ra reluk faneak watan naꞌa afa lolin ovi Ubu veka nala verin ita. Ita wol tatuan afa lolin avyai tevek tot-orang inukun avyai. Naꞌa Yahudi rira inukun avyai, na varat nkati varat a, tamata ra rti ma rala rira korban ra verin Ubu, naꞌuk rira korban ra wol rfamerat nal ralarira ra. 2Wean i inukun avyai rfamerat nala tamata ovi rala fasa watan rira korban ra verin Ubu, na veka wol rala roak rira korban ra verin Ia, tevek wol rfikir roak rira salasilan ra. 3Naꞌuk lyawan roak ne, korban ovi tamata rala lokat varat yai rfangnanang ira lalawatan ne, tamata salasilan ira. 4Kena urun, tevek sapi brana te bibi brana laran wol bisma naꞌi vatuk tamata rira salasilan ra.
5Wean inyai bi, naꞌut i Yesus Kristus nma lanit ivavan ini, na nfalak verin Ubu ne,
“Ubu, Oa wol inam lahir afwatan ovi tamata rala ma reluk rira korban, ovu afa liak ovi tamata ra rala ma reluk rira persembahan verin Oa.
Naꞌuk Oa mususan tenang a ma neluk korban verin Oa.
6Oa wol inam ma tamata ra rala rira afwatan ra verin mela falurut ra ma rasnuri, ma reluk rira korban,
te afa liak ovi tamata rala ma reluk rira korban verin Ubu, ma al rkati rira salasilan ra.
7Nata ufalak ne,
‘Ubu, ini Yaꞌa! Uma boma ot-orang afa ovi ralam a nfalak a,
wean i rfamalik roak Yaꞌa naꞌa buku lalulung a.’ ”#10:7 Tafsiran rivun rfalak ne, buku lalulung yai ihin a ne, Musa ni kitab ilima; Kejadian ti naran Ulangan. Msyiꞌik vali Mazmur 40:7-9
8Kristus nfalak lan roak verin Ubu ne, “Oa wol inam lahir afwatan ovi tamata rala ma reluk rira korban, ovu afa liak ovi tamata ra rala ma reluk rira persembahan ra. Oa wol inam vali ma tamata ra rala rira afwatan ra verin mela falurut ra ma rasnuri, ma reluk rira korban, ovu afa liak ovi tamata rala ma reluk rira korban verin Ubu ma al rkati rira salasilan ra.” Kristus nfalak wean inyai, velik ne rfadoku roak afa avyai naꞌa Musa ni inukun ra. 9Nata Ia nfalak ne, “Ubu, ini Yaꞌa! Uma boma ot-orang afa ovi ralam a nfalak a.” Ba Ubu naꞌi vatuk korban ovi rfadoku roak naꞌa Musa ni inukun ra, ma nkati ovu Yesus Kristus Ni matmatan a ma neluk korban ngorvaꞌan. 10Yesus Kristus not-orang roak afa i Ubu ralan a nfalak a, ma nala tenan a ma nmata fasa watan ma neluk korban. Tali Ni matmatan a, na nfamerat ita tali dida salasilan ra, nata ti wol ni wahan.
11Lokat amar, na Yahudi rira mela falurut ra munuk rdiri ma rfabana rira karya ra, ma rala lalawatan tamata ra rira afwatan ovu afa liak ovi rala ma reluk korban. Naꞌuk rira korban avyai munuk wol rot-nala ma Ubu naꞌi vatuk rira salasilan ra.#10:11 Keluaran 29:38 12Naꞌuk Yesus Kristus kaꞌi nala tenan a ma nmata fasa watan ma neluk korban verin Ubu, boma naꞌi vatuk tamata rira salasilan ra. Notu munuk wean inyai, beti ndoku Ubu Ni lihir mela ma nfareta vali. 13Ba tali naꞌut inyai, na Yesus nanaban watan amar ma Ubu veka nfaleka munuk tamata ovi rira sian Ia ma rsoak verin Ia.#10:13 Mazmur 110:1 14Ba Yesus nmata fasa watan ma neluk korban verin Ubu, ma ntevut roak tamata ra tali rira salasilan ra, ovu notu ma rira vavaꞌat ra rmalola, nata ti wol ni wahan.
15Ubu Ni Roh nfalyawang roak afa yai verin ita ne, kena urun, 16tevek nfalak ne,
“Ini Yaꞌa Ning tnorung i veka otu verin Ning tamata ra naꞌa amar ovi veka rma ini:
Yaꞌa veka ufadoku Ning inukun ra naꞌa ralarira ra, ovu utulis inukun avyai naꞌa rira fikiran ra.”
Duilaꞌa nfalak wean inyai.
Ia nfalak roak wean inyai, beti nfalak vali ne,
17“Yaꞌa wol ungnanang roak rira salasilan ra ovu rira afa sala ovi rotu ra.”#10:17 Yeremia 31:33-34
18Ba wean i Ubu naꞌi vatuk munuk roak dida salasilan ra, na wol tala roak afwatan ovu afa liak ra ma reluk dida korban ma al rkati dida salasilan ra.
Mya ma tfaseri aꞌuk Ubu
19Terang a valing averi, Yesus laran nvoat ma nmata, ba wol tbobar roak ma tfaseri Ubu, ma ti tnaꞌa wan i nmerat rahi lia munuk.#10:19 Ita, tamata ovi torang Yesus, tfaseri Ubu nahu dida falurut ra, ma wean tnaꞌa ruang i nmerat rahi lia munuk naꞌa lanit ratan ovu Ubu. 20Yesus nasusan roak lingaꞌan ngorvaꞌan verin ita. Lingaꞌan i nala vavaꞌat verin ita ma tati wan i nmerat rahi lia munuk yai, nahu Ni matmatan a. Yesus kaꞌi ntorung ma nala tenan a ma nmata verin ita. Inyai wean lahir maloli dawan amafal i nanaꞌa Yahudi rira Rahan Dawan Falurut ralan a, ma kaꞌi namadir lahir naꞌut irua. Ba lingaꞌan ma tati wan i nmerat rahi lia munuk a, natvelar roak.#10:20 Naꞌut i Yesus nmata, na maloli dawan amafal i nteri ruang i nmerat rahi lia munuk yai, tali ruang liak naꞌa Yahudi rira Rahan Dawan Falurut ralan naꞌa Yerusalem, namadir lahir naꞌut irua. Msiꞌik Matius 27:50-51. Ihin ne, wol akataka roak ma nteri ita tali Ubu, ovu Ni Roh nleal roak raladida ra. 21Ba fiang ini, ita dida roak Mela Falurut Ilaꞌa isa ma nfareta naꞌa Ubu Ni rahan a.#10:21 Tafsiran rivun rfalak ne, Ubu Ni rahan naꞌa ayat ini, ihin a ne, Ubu Ni tamata ra. Ibrani 3:2, 3, 5, 6; 1 Timotius 3:15. 22Ba wean inyai, na mya ma tfaseri Ubu ovu raladida urun, ovu torang urun Ia. Tevek Yesus nfamerat roak raladida ra ovu laran a, boma wol tvua roak afa sian naꞌa raladida ilaꞌa ra. Ia nfamerat roak tenadida ra ovu wear i nmerat urun a.#10:22 Yehezkiel 36:25 23Dida dardirin a musti nangrebat naꞌa dida inorang a verin Yesus. Ita tfakloꞌi aꞌuk dida vavaꞌat ra verin Ia, tevek not-orang lalawatan afa ovi nfalak ra, ovu wol nablufang Ni tnorung a verin ita. 24Ita musti tsifangnanang ita, boma bisma tsifangrebat raladida ra ma isa nlobang isa, ovu vali totu afa ovi lolin ra. 25Fara deka fyaroa tenabira ra tali tamata ovi rorang Ia rira sidovung ra, wean lahir tamata boku baꞌi rotu. Naꞌuk ivaꞌudida ma tsisurak ovu tsilobang ita, tevek tkaꞌa roak ne, wol mnanat, na Duilaꞌa veka nma ewal.
Deka tatalik dida inorang a
26Wean i trenar roak Ubu Ni ivar mngaꞌun a, naꞌuk wol tkamlabir ivar yai ma kaꞌi totu watan salasilan, na wol korban liak roak ma Ubu naꞌi vatuk dida salasilan ra.#10:26 Salasilan ihin a ne, tamata ra rafena ma rorang Yesus. Msiꞌik vali ayat 29, ovu Ibrani 2:3, 3:12, 6:4-6. 27Ba wean i totu salasilan wean inyai, na musti tbobar urun ovu tnaban watan ma Ubu veka nukun lokat tamata ovu yafu i ongan a dawan urun a. Yafu yai veka narang tamata ovi rangal Ia.#10:27 Yesaya 26:11 28Wean i tamata isa baꞌi nangal Musa ni inukun ra, ovu tamata irua te itelu rsiꞌik afa i notu a ma rfamalik ni sala a, na tamata ra veka wol rlobang ia, ba tamata i baꞌi nukun tamata ra veka nfaleka inukun matmatan verin ia.#10:28 Ulangan 17:6, 19:15 29Naꞌuk nlia tali inyai verin tamata i nfalak sian Ubu Yanan a ovu wol nalang lahir Ia. Tamata yai nanovak ne, Yesus laran i nvoat al ntevut ia wol fyawan akataka, ovu vali nfalak sian Ubu Ni Roh i nfaturu Ni rala lolin a verin tamata ra. Ubu veka nukun tamata yai ovu inukun i aleman urun a. Inukun yai aleman lia inukun i Ubu nala verin tamata ovi rangal Musa ni inukun ra.#10:29 Tamata i nfalak sian Ubu Yanan ovu wol nalang lahir Ia: teks asli naꞌa vai Yunani (secara harfiah naꞌa Vaidida) nfalak ne, nta sorat Yesus. Keluaran 24:8. 30Ubu nfalak roak ne,
“Yaꞌa veka ubalas rira afa sian ovi rotu ra ma ukun ira.”
Ia nfalak vali ne,
“Duilaꞌa veka nfaleka inukun verin Ni tamata ra ma inovan ovu afa ovi rotu ra.”#10:30 Ulangan 32:35-36
31Ita veka tbobar ma raruru lalean ita, wean i Ubu i nvaꞌat a nukun ita. #10:31 Wean i tafena ma torang lahir Ubu (ayat 26-30), na veka tbobar lahir Ia.
32Ba terang a valing averi, mingnanang amar ovi rti roak veli, naꞌut i beti myorang Ubu Ni Ivar Lolin. Amar yai, na mtyuan susa dawan urun, naꞌuk bira dardirin nangrebat ovu wol mifla talik bira inorang a. 33Amar boku, na tamata ra rfalak sian mia, ovu vali rwi-rwa mia naꞌa tamata rivun waharira ralan ra. Amar boku, na mlyobang tamata liak ovi rtuan vali susa wean mia. 34Mia fyarnuang vali tamata ovi rnaꞌa buꞌi ralan rira susa ra, ma mlyobang ira.#10:34 Raꞌabuꞌi tamata avyai, tevek rira inorang verin Yesus. Wean i tamata boku rkiwal ma rala bira metan ra, na ralabira lolin watan, tevek mkyaꞌa roak ne, bira metan mngaꞌun ra rnaꞌa obin, ovu metan avyai veka rnaꞌa lalawatan, nata ti wol ni wahan.
35Ba wean inyai, na deka mifla talik bira inorang a, tevek wean i bira dardirin nangrebat urun naꞌa bira inorang a, na Ubu veka naval ma dawan mia. 36Mia musti mtyahang nal ralabira naꞌa bira inorang a, boma wean i myotu lalawatan afa ovi Ubu ralan nfalak a, na bira munuk afa ovi Ubu ntorung roak ma nala verin mia. 37Rtulis roak naꞌa Surat Ralan ne,
“Wol mnanat, na Ia veka nma.
Ia wol nanaban ma mnanat, na veka nma lahir.
38Ning tamata ovi rira vavaꞌat ra rmalola, tevek rorang Yaꞌa,
ira veka rira vavaꞌat kakiwal ovu Yaꞌa.
Naꞌuk wean i rafla talik Yaꞌa, na veka wol inak ira.”#10:38 Habakuk 2:3-4
39Ita wol weadida tamata ovi rafla talik rira inorang a, ma Ubu veka nukun ma dawan ira. Naꞌuk ita torang watan Ubu, ba Ia veka nsikat ita tali dida salasilan ra, ma dida vavaꞌat kakiwal.
S'ha seleccionat:
Ibrani 10: frd
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
© 2016, Yayasan Pemberdayaan Masyarakat Desa in cooperation with Wycliffe Bible Translators, Inc.