Ezekiel 40
40
1Ba le yik tama a ta cheŋ la bena pisiye ale ŋanuwa po, benni piilim ka po, chiika daa pi dai, tɛŋka ale jam lo la ŋaaŋnyiŋ bena pi ale ŋanaansiwa po dai dila danni dek Naawen nisa yaa jam bo mi zuk ate wa ta mi cheŋ dula. 2Naawen wie gɔdaasima po wa yaa ta mi cheŋ Izirali tɛŋka a pa mi zaani gu woŋ zuk. Guuku yeseok geŋka yie ale a nye nna ase tɛŋ kpieŋ la. 3Wa ta mi a cheŋ dula, ate mi nya nuru ate wa a nye nna ase kutuk mɔnuŋ la. Wa za ka nansuiŋku nɔi ale garuk miik naluŋ ale magsika diok wa nisa po. 4Nuruwa yaa weeni mi ayen, <<Saalɔ biiga, nya ale fi ninaŋa abe fi wom ale fi tueŋa abe fi kpesi a pa fi popola basi dii meena ate mi a sak fu la, diila dila nyiŋ ate m ta fu a jam dela. Weeni Izirali yenni dii meena ate fi nya la.
5Mi nya parik ale ka gilim Naawen Yenni jigini meena. Magsika duoku ale jam bo nuruwa nisa po la woglimmu jam anamagib pi ale naaniŋ. Wa magsi parika ate ka biglimu a soa se ka duoku meena la ate ka woglimmu mɛ a nye ase duoku meena la.
6Wa yaa ŋman cheŋ nansuiŋku ale tuk konni geŋka la. Wa jueli ku tiilaŋa a magsi nansuiŋku tɛŋka ate ku limisa ase diokku meena la. 7Diin fisaŋa ate limisidɔma a boro la woglimmu jam ka diokku meena woglimmu, ŋa labsimu a nye ase diokku meena la. Parik sii ale jam yik diin fiisaŋa la biglimu jam ka anamagib pi. Ate nansuiŋku tɛŋka ale pa a saŋ vataamka vuuku ale tuk Naawen Yenni la a limisa ase ka diokku meena la.
8Ate wa yaa magsi nansuiŋka vataamka vuuku. 9Ku jam limisa ase ka anamagib pi ale naaniŋ la ate ku nakpaasaŋa daataŋa bigla ase anamagib bunaansi. Nansuiŋku vataamka vuuku jam tuk ka Naawen Yenni.
10Nansuiŋ kuui ale tuk kori geŋ ka la jam ta ka diin fiisa ŋata kauk meena ate ŋantawa magsika a chim bunyi. Diin fiisaŋa parisaŋa ale tuk chaab la, ale yik chaab la magsika jam ka bunyi. 11Wa yaa magsi va jo ka jigini a ta cheŋ nansuiŋku labsimu ate ku chim anamagib pisita ate woglimmu a chim anamagib pisita ale neok. 12Parik ale jam bo dɔk fiik meena niŋ, ka jam wɔŋŋa ase ka anamagib buta la. Dii fiisaŋa parisa sinaansiwa meena jam ka anamagib pi ale naaniŋ. 13Ate wa magsi nansuiŋku a zaani dɔk fiika parika kanyi a ta ga paari m kala, ate woglimmu a chim anamagib pisiyopɔi ale bunu a zaani ŋmazukku lakka a ga paari m kala. 14Wa magsi parisaŋa ale ji chaab la a gilim nansuiŋku ponni po ate ku chim anamagib kook ale pinaanuŋ. Magsika a paari vataamka vuuku ale a tuk dabiaka la kama. 15Nansuiŋku va jo ka a ga paari ku diin fiisaŋa woglimmu jam ka anamagib kook ale pisinu. 16Diin fiisaŋa ale parik sii ale ji chaab nansuiŋku ponni po a jam bo ka parik gelisa ŋmai ate parik a yaa boro a gilim ase dɔk fiika la, paaŋa meena ale gilim la a tuk ka chaab ponni po. Parisaŋa ale ji chaab ale tuk chaab la ba jam ŋmirisi ale ka kpinkpatta tiisa.
17Ate wa yaa ta mi a jam peelim dabiaka po. Dula mi yaa nya diina ale piisika a gilim dabiaka meena. Diina pisita ale gani piisika zuk. 18Ku jam yik ka nansuiŋ ku kabtaŋa meena ale labsa ase ŋa le woŋŋa diila, kude jam ka tɛŋka piisika le la. 19Ate wa yaa magsi nansuiŋku tɛŋka a ga paari ponni po dabiaka peelimmu ate woglimmu kori geŋka a chim anamagib kobsita ate wiiluk geŋka mɛ a chim dila.
20Ate wa magsi nansuiŋku ale tuk wiiluk geŋka a jo peelim dabiaka po la woglimmu ale labsimu. 21Ku diin fiisaŋa ŋata ale bo kauk meena la, ŋa parisaŋa ale ji chaab ale ŋa vataamka vuutaŋa magsika ka bunyi ase piilimka nansuiŋku la. Ku woglimmu jam ka anamagib kook ale pisinu, ku labsimu anamagib pisiyopɔi ale bunu. 22Ku lakka, ku vataamka vuutaŋa ale kpinkpattaŋa tiisaŋa ŋmirisika magsika ka bunyi ase nansuiŋku ŋan baai ale tuk konni la. Laari tabika buyopɔi ale a jueli kauk kula a tuk ku. 23Nansuiŋ ale jam bo wiiluk geŋka a jo ponni dabiaka po ase ku le bo kori geŋka diila. Wa magsi nansuiŋ kunyi a ta cheŋ kuui ale a tuk la, ate ku magsika a chim anamagib kobsita.
24Ate wa dɛ mi niŋ a ta mi cheŋ yeseok geŋka ate mi nya nansuiŋ a tuk yeseoku. Wa magsi nakpiaka daataŋa ale vataamka vuuku, ate ŋa magsika a chim bunyi ase m ŋala la. 25Nansuiŋku ale ku diin fiisaŋa lagrika a migla kama a gilim, ase ŋan bala lakka la. Ku woglimmu jam ka anamagib kook ale pisinu ate ku labsimu a chim anamagib pisiyopɔi ale bunu. 26Laari tabika buyopɔi ale a jueli kauk kula a tuk ku. Ku ŋmirisi ale kpinkpatta tiisa parik sii ale ji chaab ale tu chaab la nyiŋ. 27Ponni po dabiaka a ta ka nansuiŋ ate ku tuk yeseoku. Ate wa magsi tuok de a ga paari peelim nansuiŋ yeseok geŋka ate ku chim anamagib kobsita.
28Ate wa yaa ta mi va yeseok geŋka nansuiŋku a jo ponni dabiaka po. Ku magsika ka bunyi ale m ŋala. 29Ku diin fiisaŋa ale ku parik sii ale ji chaab la ale vataamka vuuku magsika ka bunyi ale ŋala. Nansuiŋku ale ku vataamka vuuku a lagri kama a gilim. Ku woglimmu jam ka anamagib kook ale pisinu ate ku labsimu a chim anamagib pisiyopɔi ale bunu. 30Nansuiŋtaŋa vataamka vuutaŋa ale gilim ponni po dabiaka la labsimu jam ka anamagib pisiyopɔi ale bunu ate ka le limsa diila a chim anamagib pi ale bunu. 31Ku vataamka vuuku a tuk ka peelim dabiaka, nakpiaka daataŋa kpinkpatta ale ba ŋmirisi. Laari tabika naaniŋ ale a jueli a paari ku.
32Ate wa ta mi va kori geŋka a jo ponni dabiaka po, a magsi nansuiŋku, ate ku magsika a chim bunyi ale m ŋala. 33Ku diin fiisaŋa ale ku parik sii ale a ji chaab la ale ku vataamka vuuku magsika ka bunyi ale m ŋala. Nansuiŋku ale ku vataamka vuuku a lagri kama a gilim. Ku woglimmu jam ka anamagib kook ale pisinu ate ku labsimu a chim anamagib pisiyopɔi ale bunu. 34Ku vataamka vuutaŋa a tuk ka peelim dabiaka, kpinkpatta ale ba pa ŋmirisi nakpiaka daataŋa kauk meena. Laari tabika naaniŋ ale a jueli a paari ku.
35Ate wa ta mi a jam wiiluk geŋka nansuiŋku a magsi ku. Ku magsika jam ka bunyi ale m ŋala, 36ale ku diin fiisaŋa ale ku parisaŋa ale ji chaab la ale ku vataamka vuuku, ale lagri a gilim. Ku woglimmu jam ka anamagib pisinu ate labsimu a chim anamagib pisiye ale bunu. 37Ku vataamka vuuku a tuk ka peelim dabiaka, kpinkpatta ate ba pa ŋmirisi nakpiaka daataŋa kauk meena ate laarika naaniŋ a paari ku jigini.
38Dɔk ale ku nansuiŋ ale maŋ vataamka vuuku ponni po nansuiŋ meena, juijui ate juka tiiritaŋa ba a sugri la. 39Nansuiŋku dɔk fiika po ŋanzaanita tiye ale za kauk meena. Tila zuk ate juka tiiritaŋa ale biem tiiritaŋa ale nyemagsika tiiritaŋa ba a tɔgri. 40Nansuiŋku dɔk fiika peelim parika kiri, a moata tiilaŋa ale tabi va wiiluk geŋka nansuiŋku a jo la, ŋanzaanita tiye ale za, kauk kunkula mɛ ŋanzaanita tiye ale za. 41Dula ŋanzaanita tinaansi ale za nansuiŋku kauk yeoŋ ate tinaansi mɛ a za kauk kunkula jazaanim meena jam ka naaniŋ ate ba a tɔgri kaabka ŋantaŋa ti zuk. 42Tintana ate ba nye ŋa a magsi juka tiirita, dinyi meena woglim anamagib bunaansi ale geli, labsimu anamagib bunaansi ale geli, juelika anamagib buta. Tanaŋa zuk ba pa ka ŋan baai ate ba pa a tɔgri juka tiiritaŋa la ale kaabka tiirin yonta la a dueni du. 43Gɔtik maga, kunyi meena woŋŋa ase nitali labsim la, ate ba pa yik siaka a gilim. Ŋanzaanitaŋa jam magsi ka tiiritaŋa lantaŋa.
44Ponni po nansuiŋ ku peelimmu ale bo ponni po dabiaka po la, ka diina ŋaye, kunyi a bo wiiluk geŋka nansuiŋku, ku choa a bo yeseok geŋka a tuk wiiluk. 45Wa weeni mi ayen, <<Dɔk kuui ale a tuk yeseoku la ka kaabteerɔma ale soa, baai ale a nya Wen yenni zuk la. 46Kuui ale tuk wiilukku la ka kaabteerɔ baai ale a nya kaabka kuŋkuŋku zuk la ale soa. Bade ale Zadok nidoabilisaŋa, baai nyiini ale Livaiba ate ba le baga a forisi moata Naawen a tom wa niŋ.>>
47Ate wa yaa magsi dabiaka. Ka kabtaŋa meena a soa ase ka chaab la. Ka woglimmu anamagib kobsita, ka labsimu anamagib kobsita. Ate kaab ka kuŋkuŋku a bo Wen Yenni niŋ.
48Wa ta mi jam Wen yenni vataamka vuuku a magsi vuuku nakpiaka daataŋa. Ku jam ka anamagib pi ale bunu kabtaŋa meena. Va joka jigini labsimu jam ka anamagib pisinaansi ale buye ate ku parik sii ale ji chaab la labsimu a chim anamagib neok kabtaŋa meena. 49Vataamka vuuku labsimu jam ka anamagib pisiyuebi, ate niŋka a ta cheŋ ŋaaŋka a chim anamagib pisita ale buyuebi. Ku jaa tabi ka tiila a jueli, ate zaŋŋa a bo nakpaasaŋa ganaŋa.
S'ha seleccionat:
Ezekiel 40: BWU
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
© 2023, Ghana Institute of Linguistics, Literacy and Bible Translation