Ezekiel 38
38
1Naawen wanni yaa jam mi jigi ayen, 2<<Saalɔ biiga, pa fi nina tuk Gɔg nyiŋ, ate ka bo Megɔg tɛŋka la, Mesek nabi kpioŋku ale Tubal. Mooli a ta chaab ale wa, 3a weeni ayen, Nyɔnɔwa Naawen ale biisi diila ale nna, Mi ta ka chaab ale fu, Gɔg ale Mesek ale Tubal nabi kpioŋku. 4Mi le yik a viriŋ, a pa gɔtisa a yik fi chikpeeŋa a ta fu a nyini ale fi tugurik tɔŋdɔma meena, ale wusumaŋa ale wusum duerisaŋa ale bobi kpaliŋ kɔlimaŋa la, ale nuru boari a ta piema ŋanchɔgsin kpienta ale ŋan fiisa, ba meena a yuk ba gebisaŋa a basi. 5Persia ale Kus ale Put ale bo ale ba, ba meena ta peema ŋanchɔgsinta ale kuta zuk china. 6Gomer mɛ ale wa tugurik tɔŋdɔba, ale Bet Togarma ale nyini niŋ wiiluk geŋ la ale wa tugurik tɔŋdɔba tɛŋ boanni yega ale fu.
7Gomsi, gomsi magsi, fi ale nuru boanni ale tigsi a gilim fu la a nya ba zuk. 8Bena yega a dan taam ba le wi fu ate fi pa kpaliŋ kɔlima. Bena ale cheen chum po la fi le tuesi tɛŋ kaai ale diem nyini kpaliŋ po a nyini, kaai nuruba ale jam tigsi nyini tɛŋsa yega a cheŋ Izirali guutaŋa zuk tii ale jam dua kinla ate ku beni. Ba jam ta ba nyini ka tɛŋsaŋa po a nyini ate yɔgyɔgla de ba meena boro sɔŋsɔŋŋoa, 9Nama ale ni tugurik tɔŋdɔma ale tɛŋsaŋa yekka ale bo ale ni la ale jueli, a duŋ niŋ ase viok la, ni le nye ase ka chiŋmari ale lik tɛŋka la.
10Nyɔnɔwa Naawen ale biisi diila ale nna. Da dila danni popola ale jam ni zuimaŋa po ate ni yaali popoli baata yam. 11Ni le weeni ayen, <<M le tuesi tɛŋ kaai ate ka tɛŋ kpaŋsaŋa an sɛ parisa. Mi le siti ka suiyɔgni ale baai ale kaa poli ayen wari ale nye la nyam, baai ale boro alege ka parisa ale nansuiŋta ale kutuk biga. 12M le vari ba abe m zu ba abe m cheem ta chaab ale ŋanluemaŋa ate ba ŋman sɛ la ale nuruma ale tigsi a nyini tɛŋsaŋa po la, a jigsi ale duŋsa ale kɔlima a bo tɛŋka suŋsuŋka la. 13Siiba ale Dedan ale Tarsis geruŋdɔma ale ka tɛŋ kpaŋsaŋa meena ale weeni fu ayen, << Fi jam ayen fi vari kama? Fi tigsi nuru boanni ayen fi zu, abe fi ji kpana ale ligmɔniŋka fi ji duŋsa ale kɔlima a ta cheŋ abe fi tuesi ŋan baai fi vari yega la?
14Dila la, saalɔ biiga, mooli a weeni Gɔg ayen, Nyɔnɔwa Naawen ale biisi diila ale nna. Da dila danni, mi nuruma Izirali a dan boro ate wari kan daani ba, fi kan miŋi? 15Fi le nyini fi jigini niŋniŋ wiiluk geŋ a jam, fi ale tɛŋsa yegayega ale va fu, ba meena a do wusuma, nuru boari, tugurik tɔŋdɔba boari. 16Ni le cheŋ a duŋ mi nuruma Izirali nyiŋ a ta chaab ale ba ase chiŋmari ale lik tɛŋka la. Daa a cheena, Gɔg, m le ta fi jam ate fi ta chaab ale mi tɛŋka, ate tɛŋsaŋa a seba mu ase m nin va fi nyiŋ a sak m dek tuilummu ba nimbie po.
17Nyɔnɔwa Naawen ale biisi diila ale nna. Daa fi ate mi va m yɔmawa Izirali biisiteerɔma a biisi fi wie dipo daaŋa la. Dila po ba mooli kama ate ku paari bena ayen mi ale ta fu jam ta chaab ale ba. 18Dii ale di nye da dila danni la ale nna. Gɔg a dan siti Izirali tɛŋka, mi sui ale yiti ale wa, Nyɔnɔwa Naawen ale weeni. 19Mi nyiŋka ale a zeenti ate m suinni a dɛ la mi weeni kama ayen dila po tɛŋ choaka yegayega ale bo Izirali tɛŋka po. 20Nyakpiemu jumaŋa, ale wenzuk nuinsaŋa, ale duŋsaŋa ale bo tɛŋka po la, ale jaab meena ale cheŋ tɛŋka zuk la, ale nuruma ale bo tɛŋka zuk la, mi dan jam ba nyiŋsa ale gɔk. Guutaŋa ale tulim a kpib ate pinaŋa a kabri ate parik meena a lo tɛŋ. 21Mi le wi gebik ate ka jam ta chaab ale Gɔg mi guutaŋa meena zuk. Nyɔnɔwa Naawen ale weeni. Nidoa meena gebik ale ta ka chaab ale wa suok. 22M le ta buusa jam wa zuk ale nyiŋtuila ale ziim nyinika. Mi le basi ate ŋmoruk pagrik a siŋ, ale ŋmoruk tana ale tintain tuila a siŋ wa zuk ale wa tugurik tɔŋdɔma ale tɛŋ sii meena ale bo ale wa la. 23Dila nyiŋ m le sak m zuaka ale m weleŋsaŋa, abe m nye m dek ate ba seba mu tɛŋsa yega nimbie po. Ate ba yaa seba ayen Mi ale Naawen.
S'ha seleccionat:
Ezekiel 38: BWU
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
© 2023, Ghana Institute of Linguistics, Literacy and Bible Translation