Ezekiel 36
36
1<<Saalɔ biiga, mooli a te Izirali guutaŋa a weeni ayen, <Izirali guuta, wom Naawen wanni. 2Nyɔnɔwa Naawen ale biisi diila ale nna, Dachiaka daa weeni ni wie ayen, <<Ŋiak ŋanwoŋtaŋa meena ka tama ale soa.>> > 3Dila nyiŋ mooli a weeni ayen, <Nyɔnɔwa Naawen ale biisi diila ale nna. Ba le vi ni ale kaasi kabtaŋa meena ate tɛŋ sinsila a soa ni ate ni yaa chim jabuui ate nuruba biisi a la ale biisi a kaasi la nyiŋ, 4Izirali guuta, wom Nyɔnɔwa Naawen wanni. Nyɔnɔwa Naawen ale a biisi a te guuta ale guwoŋtaŋa ale Vooliŋsaŋa ale vaasaŋa ale kab tii ale chim guura a dua kinla ale tɛŋ sii ate ba zɛri si a basi tɛŋ yonsaŋa a vari ni ale nye ni a la, 5Nyɔnɔwa Naawen ale biisi diila ale nna. Mi biisi kama ale nyiŋ zeentika a ta chaab ale tɛŋ yonsaŋa ale Edom meena, diila biem nyeka masim ale naŋka ale bo ba suiniimaŋa po ate ba yaa nye mi tɛŋka kaai ate ba soa ate ba vari ka wumaŋka tɛŋka.> 6Dila nyiŋ mooli a magsi ale Izirali tɛŋka a weeni guutaŋa ale guwoŋtaŋa, ale vooliŋsaŋa ale vaasaŋa: <Nyɔnɔwa Naawen ale biisi diila ale nna, Mi a biisi kama ale nyuri suipuurum dii nyiŋla ni nam ale tɛŋsaŋa nye laka kama. 7Dila la Nyɔnɔwa Naawen ale biisi diila ale nna. Mi zak ka nisa wen a pɛ ayen tɛŋ sii ale gilim ni la mɛ ale nam ale nye laka.
8<< <Alege nama, Izirali guutaŋa, ni le tom naŋsa a yɔni yɔna a te mi nuruma Izirali demma, diila ku kan beni ba le jam yeri. 9Mi niŋ a bo ni po kama m le nya ni zuk ale ŋmanteka, ba le kpa ni abe ba bori ni. 10M le basi ate nuruba dii ale boro la a piisi, poom ka Izirali yenni meena tɛŋsaŋa ba le bo si po ate ŋanluemaŋa a ŋman sɛ. 11M le basi ate nidoama ale duŋsa a piisi ni zuk, abe ba a biak a chim ŋanbɔri, M le basi ate nuruba a kali ni zuk ase nyiem wala ate m basi ate ni jigsi a gaam ni nyiem ale ka diila. Ate ni yaa seba ayen ka Mi ale Naawen. 12M le basi ate nuruba, mi nuruma Izirali demma, a cheŋ ni zuk. Ba le soa ni, ate ni chim be nitalim, ni kan ŋman kasi ba bisa taka diipo diipo. 13<< <Nyɔnɔwa Naawen ale biisi diila ale nna. Nuruba a biisi a te ni kama ayen, <<Ni ŋɔbi nidoaba ale a kasi ni tɛŋka ale bisa taka,>> 14dila nyiŋ ni kan ŋman gob nidoaba yaase ni basi ate ni tɛŋka kan ta bisa. Nyɔnɔwa Naawen ale weeni. 15Ni kan ŋman wom tɛŋsaŋa nye laka diipo diipo, ni be kan ŋman nam ale nuruma nye laka yaase ba nye ate ni tɛŋka a lo. Nyɔnɔwa Naawen ale weeni.> >>
16Naawen wanni yaa ŋman jam mi jigi ayen, 17<<Saalɔ biiga, Izirali demma ale jam bo badek tɛŋka po la ba jam taŋ ka kama ale ba nyeelaŋa. Ba nyeelaŋa a jam a nye ase ka nipok chiik po chiak loka daŋta la mi nina po. 18Mi yaa basi ate mi suipuurumu jam ba zuk dii nyiŋla ba basi ate ka ziim a nyini tɛŋka zuk diila ba taŋ ka kama ale ba bɔgtaŋa. 19Mi yaa waaŋ ba tɛŋsaŋa po, ate ba waaŋ cheŋ tɛŋsaŋa. Mi yaa bo ba buusa a magsi chaab ale ba nyeelaŋa. 20<Juijui meena ate ba cheŋ tɛŋsaŋa po la ba kaasi mi tuilum yuenni kama, diila ba jam biisi ba wie kama ayen, Naawen nuruba ale nna alege ate ba basi wa tɛŋka.> 21Mi niŋ a bo mi tuilum yuenni po kama, dii ate Izirali yenni a kaasi di tɛŋsaŋa po juijui ate ba jam cheŋ.
22<<Dila nyiŋ weeni Izirali yenni ayen, <Nyɔnɔwa Naawen ale biisi diila ale nna, Daa nama nyiŋŋa, Izirali yeri ya, ate mi a za ayen m nye wieŋa de, alege ka mi tuilum yuenni ate ni kaasi tɛŋsa po juijui ate ni cheŋ la. 23Mi ale sak mi tuilum yuei kpienni, ate ni kaasi di tɛŋsaŋa po la, yuei dii ate ni kaasi ba suŋsuŋ. Ate tɛŋsaŋa yaa seba ayen, Mi ale Nyɔnɔwa Naawen ale weeni, ase m nin va nama nyiŋ a sak m dek weleŋsaŋa ba nina po.
24Mi ale ta ni nyini tɛŋsaŋa po a nyini. M le tigsi ni a ta nyini tɛŋsaŋa meena a ta ni ŋman jam nidek tɛŋka. 25M le pa nya naliŋ a misi ni ate ni nala. M le sugri ni a ta nyini ni daŋtaŋa po ale ni bɔgtaŋa meena po. 26M le te ni suinum paalik abe m pa chi paalik a nyo ni po. M le yeeri suinum pagrika ase tain la abe m te ni suinum baasuŋ. 27M le pa m Chiika a nyo ni po abe m basi ate ni va m ŋmarisika abe ni kpesi a ta m buusaŋa. 28Ni le bo tɛŋ kaai po ate mi a te ni kokpieŋsaŋa la. Ni le chim mi nuruba ate mi ale chim ni Wen. 29M le vari ni ni daŋtaŋa meena po a basi. M le wi ŋandiinta, ŋan bie ate ba jam a basi ate ŋa piisi abe m kan ta kɔm a jam ni zuwa. 30M le basi ate tiisaŋa yɔnaŋa ale laŋsaŋa ŋandiintaŋa a zuak ate ni kan ŋman dɛ chivie tɛŋsaŋa po kɔm nyiŋŋa. 31Ate ni yaa teeri ni biem suitaŋa ale ni gaasa nyeelaŋa, ate ni kisi nidek ni wabaataŋa ale nyeela ŋaai ate mi kisa la nyiŋ. 32Mi a yaali kama ayen ni seba ayen mi a nye kude ka mi yuenni nyiŋ, Nyɔnɔwa Naawen ale weeni. Ni chali chivie ni nyeelaŋa nyiŋ, Izirali yeri demma.
33Nyɔnɔwa Naawen ale biisi diila ale nna. Dai dii dai ate mi a sugri ni wabaataŋa la, m le basi ate ni ŋman kali ni tɛŋsaŋa, ate ŋanluemaŋa ni ŋman sɛ. 34Tɛŋ kaai ale dua kinla la ni le kpa ka ate ka kan dua kinla ate baai meena ale va ka po a taam la a nya. 35Ba le weeni ayen, <<Tɛŋka de ale jam dua kinla la a yaa nye ase ka Eden tiisaŋa la, tɛŋ sii ale jam lo a chim guura la, a kaasi a dua kinla la a yaa sɛ ka yie pagrisa ate nuruba a boro. 36Ate tɛŋ sii ale tali gilim ni la ale seba ayen ka mi Naawen ale sɛ ŋan baai ale jam kaasi la ale ŋman bori ŋan baai ale jam dua kinla la. Mi Naawen ale biisi, m be le nye.
37Nyɔnɔwa Naawen ale biisi diila ale nna. Mi le pilim siak Izirali yenni saalimka a nye ku a te ba. M le basi ate ba nuruma a piisi ase piisa la. 38Ba le piisi ase piisa ale magsi tiirita Jerusalem tɛŋka po tiga daa po la. Dila tɛŋ sii ale lo la ale sueri ale nuruba ase piisa. Ate ba yaa seba ayen Mi ale Naawen.
S'ha seleccionat:
Ezekiel 36: BWU
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
© 2023, Ghana Institute of Linguistics, Literacy and Bible Translation