Ezekiel 28
28
1Naawen yaa weeni mi ayen, 2<<Saalɔ biiga, weeni Taaya niŋdeerɔwa ayen, <Nyɔnɔwa Naawen ale biisi diila ale nna. Ayen fi kanjantaŋa nyiŋ fi a weeni ayen fi ka wen. Mi kali kan wen naam zuk nyakpientaŋa suŋsuŋ. Fi a poli ayen fi ta ka yam ase wen la, alege fi ka saalɔbiik, daa wen ya. 3Fi a poli ayen fi ta ka yam a gaam Daniel. Fi a poli ayen fi ga be a miŋ wa susuga meena. 4Fi va fi yammu ale fi wie miŋka nyiŋ a jigsi kama. A nya ligmɔniŋ ale kpana a yaa pai dueni fi ŋanta diinaŋa po. 5Fi le seba geruŋ la nyiŋ fi jigsi ka nna yegayega. Fi ta ka kanjanta fi jigsika nyiŋ.
6<< <Dila la Nyɔnɔwa Naawen ale biisi diila ale nna, Fi a poli ayen fi ta ka yam ase wen la, 7alege m le ta nicham jam ate ba siti fu. Tɛŋ kaai nyeka ale tua. Ba le dari ba gebisaŋa a yeeri a kaasi ŋan baai meena ate fi pai fi yammu a se la. Fi le fi zuaka meena, ba le kaasi fi yuei. 8Ba le ko fu. Fi kummu ale nye ase ka baai ate ba ko a nyakpiem po la. 9Ba dan boro a ko fu, fi kan ŋman baga a weeni ayen fi ka wen ya. Fi ya le chim ka nurubiik daa wen ya ase ba nin boro a ko fu. 10Fi le kpi ase ka daŋta nyɔnɔ la. Nicham ale ba ko fu. Mi Nyɔnɔwa Naawen ale biisi.
11Naawen a biisi ale mi ayen, 12<<Saalɔ biiga, yi kuun yiili a te Taaya naawa. Weeni ayen Nyɔnɔwa Naawen ale biisi diila ale nna, Fi ale jam a sak wa nalimu meena ate nuruba a nya. Fi jam ta ka yam ale nalim maŋ. 13Fi boka jam nala kama chekki ase fi bo Eden, Naawen tiisaŋa po la. Tintain naliŋsa meena a jam bo ka fi nyiŋ, tintain munta ale tintain ŋaai ale a nye ase dubuulim la ale tintain ŋaai ale a nye ase gunungoona la ale tintain salima ale tintain ŋaai ale gamisi ale tintain mɔnta ale tintain sobta ale tintain ŋmiŋmirita ale tintain paata. Fi ŋansuintaŋa ka ligmɔniŋ ate ba jam pai nye. Ba jam nye ba magsi ka fi nyeka danni. 14Mi yaa lueri javuk ayen wa a limisi fu. A pai fu basi Naawen tuilum guuku zuk. Ate fi a cheŋ tintanaŋa ŋaai ale a nyaksi ase bolim la po. 15Fi boka a jam nala kama ale yɔrisi fi nyeka danni ate biem a yaa jo fu ŋaaŋnyiŋ. 16Fi le a gerim ale niŋniŋ tɛŋsa la nyiŋ fi yaa zamsi ba nyeka tuemu a tom kaasi. Mi yaa pai fu Naawen guuku zuk a yuk basi ate fi nya chivie. Ate javuk kuui ale a nya fu zuk la a yaa fɛ yeeri fu tintana ŋaai ale a nyaksi la po. 17Fi ta ka kanjanta nna yegayega fi nalimu nyiŋ. Fi kaasi fi yammu kama fi zulaŋa nyiŋ. Mi yaa pai fu yuk basi tɛŋ, ate ku sak nalim yonta yam. 18Fi an zuli fi puusaŋa jigini fi wabaataŋa yegayega ale fi venta geruŋku nyiŋ. Ate mi yaa ju juijui ate fi boro la ate bolimu a dɛ meena. Ate mi basi ate fi chim buntuem tɛŋka ate waai meena a nya. 19Tɛŋ sii meena ale sebi fu la, ku cha ba. Fi namsika a bie ka yega, ate fi cheŋ nna feritete.> >>
20Naawen yaa biisi ale mi ayen, 21<<Saalɔ biiga, zak nya Saidon tɛŋka a mooli te ka. 22Weeni ayen, <Nyɔnɔwa Naawen ale biisi diila ale nna, Ayen, mi ta ka chaab ale Saidon, m be le sak m zulaŋa ni suŋsuŋ. M dan namsi Saidon, nuruba le seba ayen Mi ale Naawen. M le namisi ba abe m sak ba ayen mi welema kama. 23M le te nyiŋtuila a jam Saidon, ate ziim a chali ka suitaŋa niŋ. Baai ale nya tueta Saidon po la ale kpi abe ba siti ba jiŋŋa meena. Ate ba yaa seba ayen Mi ale Naawen.
24<< <Tɛŋ sii ale moata la a kan ŋman chim munsa yaase ŋan baai ale kpari a maŋŋa ate ba namsi Izirali. Ate ba seba ayen Mi ale Nyɔnɔwa Naawen.
25<< <Nyɔnɔwa Naawen ale biisi diila ale nna. Izirali demma ale waaŋ bo tɛŋsaŋa la, m le tigsi ba. M le sak m tuilummu ase tɛŋsaŋa a nin nya mi ale nye dii a te m nuruma la. Ate ba yaa bo badek tɛŋka po, tɛŋ kaai ate mi a pai te m tomteerɔwa Jekob la. 26Ba le boro ale nyiŋyɔgsa abe ba sɛ yie abe ba vuk tiisa. Ba le boro ale nyiŋyɔgsa tɛŋsaŋa namsika ŋaaŋnyiŋ. Tɛŋ sii meena ale kisi ba a gilim ba la. Ate ba seba ayen Mi ale Naawen ba Wen.> >>
S'ha seleccionat:
Ezekiel 28: BWU
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
© 2023, Ghana Institute of Linguistics, Literacy and Bible Translation