Ezekiel 25
25
1Naawen yaa biisi ale mi ayen, 2<<Saalɔ biiga, nya Ammon demma geŋ a mooli a te ba. 3Weeni ba ayen, ba wom Nyɔnɔwa Naawen wanni. Nyɔnɔwa Naawen ale biisi diila ale nna. Ni sue jam peenti kama ba le kan zuli mi yenni la, ale Izirali ale kaasi la, ale Juda ba le yik ba ta cheŋ la. 4Dila nyiŋ, mi za m pai ni te ka kori geŋ ka nuruma ate ba soa ni. Ba le ti ba viitaŋa ni suŋsuŋ a goa ale ni. Ba le dɛ ni yɔnaŋa abe ba nyu ni biisimu. 5M le basi ate Arabba tɛŋka a chim laalaakomiba dɛ ka jigi. Ammon tɛŋka ale chim piisa vuusum jigi. Ate ni yaa seba ayen Mi ale Naawen. 6Dila la Nyɔnɔwa Naawen ale biisi diila ale nna. Ni nak ka nichaala ale pai naŋsa tabi tɛŋ. Ni a la le tii meena ate ni le Izirali la kama. 7M le pai m pagrimu a nye ale ni. M le pai ni a te tɛŋsaŋa ase tuilum ŋanta ate ba kɔlim kpaliŋ po la. Mi le duisi ni basi ate ni kan ŋman chim tɛŋŋa. M le kaasi ni ate ni seba ayen Mi ale Naawen.>>
8<<Nyɔnɔwa Naawen ale biisi diila ale nna, ayen Moab ale Edom a weeni kama ayen Juda demma a nye ase ka tɛŋ sinsila la. 9Dila nyiŋ mi a yaali m yeeri ka tɛŋ sii ale a lik Moab banaŋa la, tɛŋ maŋsaŋa ale bo ka po la. Si le Bet Jesimot ale Baal Meon ale Kiriataim. 10Ate si yaa pai Moab ale Ammon demma meena a te kori geŋka nuruma ate ba soa ba. Moab a kan ŋman chim tɛŋŋa ale Ammon demma meena. 11Dila nyiŋ m le namsi Moab demma ate ba seba ayen Mi ale Naawen.>>
12Nyɔnɔwa Naawen ale biisi diila ale nna. <Edom a tuni Juda nuruma. Edom nye kama kaasi dila nyiŋ. 13Dila la, Nyɔnɔwa Naawen ale biisi diila ale nna, M le pai m pagrimu a nye ale Edom. M le ko nurubiik meena ale duŋsaŋa ale boro la. M le kaasi Edom a zaani Teman a ga paari Dedan. Ba le kpi kpaliŋka po. 14Mi le pai m nuruma Izirali a tuni Edom. Izirali demma ale nye Edom demma dii ate mi suinni a yaali la. Ate Edom demma a seba m le a tuni ba le diila. Nyɔnɔwa Naawen ale weeni.> >>
15<<Nyɔnɔwa Naawen ale biisi diila ale nna, <Filistia demma a pai ka kisika a tuni Juda. Ba kisika nyiŋ ba nye ka nyiŋbiiri ayen ba kaasi Juda. 16Dila la Nyɔnɔwa Naawen ale biisi diila ale nna. M le pai m pagrimu a nye ale Filistia demma. M le ko Keret demma abe m ko baai ale bo nyakpiemu nɔi la. 17M le namsi ba ale m suipuurumu abe m nye wie kpiema a tuni ba. Ate ba seba ayen Mi ale Naawen a nye ba dila.>>
S'ha seleccionat:
Ezekiel 25: BWU
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
© 2023, Ghana Institute of Linguistics, Literacy and Bible Translation