Ezekiel 11
11
1Wen Chiika yaa zak mi wen a ta mi jam Naawen Yenni niŋ geŋ nɔnni ale tuk kori la. Mi yaa nya nidoaba pisiye ale banu tuoku ale lak juijui la. Ba po Azzur nidoabinni Jaazania ale Benaya nidoabinni Pelatia ale jam chim nuruma niŋdeerɔba. 2Wen Chiika yaa weeni mi ayen, <<Saalɔ biiga, nuruma de ale a zɔk biem wie ale a te sinsak baata Jerusalem tɛŋka po. 3Ba a weeni kama ayen, <Ku paari ka diipo ate ku magsi ti a se yie. Tɛŋka de a nye ase ka samɔniŋ ate ba ta a dik la, ate tama dek a nye ase lam maŋsa la.> 4Dila nyiŋ mooli a te ba, mooli, Saalɔ biiga.>>
5Naawen Chiika yaa ŋman jo mi a weeni mi ayen weeni ba ayen, <<Naawen ale weeni diila ale nna; Nama Izirali demma ale weeni wieŋa de m be sebi ni ale a poli diila kama. 6Ni ko ka nuruba yega tɛŋka po ate kpieba sueri suitaŋa niŋ meena. 7Nyɔnɔwa Naawen ale biisi diila ale nna, Nuru baai ate ni ko a basi tɛŋka suŋsuŋ la a nye ase ka lam maŋsa la ate tɛŋka a nye ase samɔniŋ ate ba pai dik la. Alege m le fɛ ate ni nyini tɛŋka po. 8Ni a chali gebik kama, alege m le ta gebik a jam ni po. Nyɔnɔwa Naawen ale weeni.
9<<Mi le fɛ ate ni nyini tɛŋka po nyini abe m pai ni te nicham ate ba namsi ni. 10Ba le ko ni ale ka gebik. M le namsi ni Izirali tɛŋka banni jigini ate ni seba ayen ka Mi ale Naawen. 11Tɛŋka de kan chim ni samɔniŋ kaai le a digi. Nama be kan chim lam maŋsa ka po. M le namsi ni Izirali tɛŋka banni jigini. 12Ate ni yaa seba ayen ka Mi ale Naawen. Ni an va mi ŋmarisika ni boka po, ni be an va m buusaŋa. Ni a nye a magsi chaab ale ka tɛŋ sii ale gilim ni la buusaŋa.>>
13Mi ale mooli la Benaya biika Pelatia a deri kpi. Mi yaa koori tɛŋ a kaari ate ku jueli ayen, <<Aaya, Nyɔnɔ Naawen yaa! Fi a yaali fi ko Izirali demma baai ale tali vua la ka meena?>>
14Naawen yaa biisi wa wanni te mi ayen, 15<<Saalɔ biiga, nuru baai ale diem bo Jerusalem la a biisi fidek buuni ale Izirali demma baai ale ka ligrɔba ale fu la a weeni ayen, <Ba yalima ale Naawen kama. Ba pai tɛŋka de a te ti kama ase nitalim la.> 16Dila la, weeni ayen, <Nyɔnɔwa Naawen ale biisi diila ale nna, Mi ta nuruma cheŋ ka niŋ a basi ate ba waaŋ tɛŋsaŋa po. Alege ku an beni ya ate m ŋman cheŋ m dek yenni tɛŋ sii ate ba cheŋ la po.> 17Dila weeni ba ayen, <Nyɔnɔwa Naawen ale biisi diila ale nna, Mi le tigsi ta nyini tɛŋsaŋa po a ta ba jam jigi yeŋ a ya pai Izirali tɛŋka a ŋman te ni.> 18Ba dan jam tɛŋka de po ba le yeeri bɔgluk tii ale ŋan mɛɛnta meena ate m kisi la. 19M le basi ate ba ta yaali kaai ale kaa basi ate ba a zuli mu la abe m pai popoli paala a te ba. Mi ale yeeri tuikpari ba po abe m basi ate ba ta zula. 20Ate ba va m ŋmarisika a boro abe ba a zuli m buusaŋa abe ba ta ŋa. Ba le chim m nuruba ate mi mɛ a chim ba Wen. 21Alege baai ale a yaali ayen ba va bɔgluk baataŋa ale bɔgluk tii tin kisi la, m le tuni ba ba biemu nyiŋ. Mi Nyɔnɔwa Naawen ale weeni.>>
22Ate ŋanvutaŋa a zak ba kiŋkaŋŋa ale wiilima ale bo ba gauŋ la, ate Izirali Wenni zulaŋa a yaa bo ba zuk. 23Naawen zulaŋa yaa nyini Jerusalem a jueli wari guuku ale bo tɛŋka kori geŋ la zuk. 24Wen Chiika yaa zak mi a ta mi jam nuru baai ate ba ta nyini Juda a jam Kaldiya la jigi. Kude ale nye la ka Wen Chiika ale pai sak mu. Mi ale nya diila yaa kpeglim. 25Mi yaa weeni baai meena ale nyini Juda la Naawen ale pai dii meena a sak mu la.
S'ha seleccionat:
Ezekiel 11: BWU
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
© 2023, Ghana Institute of Linguistics, Literacy and Bible Translation