Mɛ̈t 4
4
Ɣɔm Yecu
(Mak 1:12-13, Luk 4:1-13)
1Kä cua Yecu buath rɛy dɔaar ɛ Yiëë kɛ ɣöö ba jɛ wä ɣɔam ɛ gua̱n jiäkni. 2Kä /kenɛ mi̱th kɛ ni̱n ti jiɛn ŋuan wäär kɛnɛ cäŋ. Kä kɛ kɔrɛ cu buɔth ɛ näk ɛlɔ̱ŋ. 3Kä cu gua̱n ɣɔmä ben kä Jɛ, cuɛ jɛ jiök i̱, “Mi ɛ ji̱n Gat Kuɔth, ruacni kɛ pääm ti̱ti̱ kɛ ɣöö bikɛ rɔ̱ loc ni juray.” 4Kä cu Yecu jɛ loc i̱, “Ca jɛ gɔ̱r i̱,#4:4 Ŋuɔ̱t 8:3.
‘/Ci raan dee tëk kɛ mi̱eth kärɔa,
ɛ ni riet in bä raar
thok Kuɔth.’ ”
5Kä cu gua̱n jiäkni jɛ naŋ kä Jɛ-ru-tha-lɛm wec in rɛl rɔ kä cuɛ jɛ wä la̱th wi̱i̱ luaak Kuɔth mi bäär. 6Cuɛ jɛ jiök i̱, “Mi ɛ ji̱n Gat Kuɔth, yori rɔɔdu piny, kɛ ɣöö ca jɛ gɔ̱r i̱,#4:6 Diit 91:11-12.
‘Kuoth bɛ ja̱a̱kɛ la̱t ruac,
kɛ kui̱du’,
kä, ‘Bikɛ ji̱ thak
kɛ tetkiɛn,
kɛ ɣöö /ci cio̱o̱kdu
bi pi̱em pa̱a̱m.’ ”
7Cu Yecu jɛ jiök i̱, “Ca jɛ gɔ̱r bä i̱,#4:7 Ŋuɔ̱t 6:16. ‘/Cu Kuäär ni Kuothdu ɣɔ̱n.’ ”
8Kä cu gua̱n jiäkni jɛ lɛni naŋ wi̱i̱ pa̱a̱m mi bäär, cuɛ jɛ nyuɔ̱th kuääri ɣɔaa diaal kɛnɛ wuɔ̱tdiɛn, 9kä cuɛ Yecu jiök i̱, “Mi kämi rɔ mua̱a̱l nhiamdä a pali ɣä, bä ji̱ ka̱m ŋɔak ti̱ti̱ diaal.” 10Kä cu Yecu jɛ jiök i̱, “Woc rɔ, Cɛy-tan, kɛ ɣöö ca jɛ gɔ̱r i̱,#4:10 Ŋuɔ̱t 6:13.
‘Pal ni Kuäär in la Kuothdu,
kä bi lät ni jɛ ikä kärɔa.’ ”
11Kä cu gua̱n jiäkni jɛ ba̱ny piny. Kä cu ja̱a̱k Kuɔth ben kä cua jɛ ben lätikä.
Tuk Yecu kɛ lätkɛ kä Gɛ̈-lɛ-li
(Mak 1:14-15, Luk 4:14-15)
12Kä mëë ci Yecu jɛ liŋ ɛn ɣöö ca Jɔ̱ɔ̱n yian, cuɛ wä kä Gɛ̈-lɛ-li. 13Cuɛ jiɛɛn kä Na-dha-rɛth, cuɛ wä cieŋ kä Ka-pɛr-ni-äm mi te gekä baar, rɛy rööl Dhɛ-bu-lun kɛnɛ Nap-ta-li. 14Cua nɔmɔ la̱t kɛ ɣöö bi mëë ca lar ɛ gök ni I-ca-yaa a thuɔ̱k i̱,
15 # 4:15 Ica 9:1-2. “Ciëŋ Dhɛ-bu-lun kɛnɛ
ciëŋ Nap-ta-li,
duɔ̱ɔ̱p mi lot ni bar kɛnɛ
kui̱c kiɛɛr Jɔr-dɛn,
Gɛ̈-lɛ-li, dhɔr Juri.
16Nɛy tin te nyuurä rɛy muɔ̱th
cikɛ buay mi di̱i̱t nɛn,
kä kɛ kui̱ nɛɛni tin ci nyuur
rɛy ti̱pä li̱eth,
ci buay ben kä kɛ.”
17Kä ɛn guäth ɛmɔ cu Yecu ruac tok, kä cuɛ wee i̱, “Rietdɛ rɔ̱ kä jiäkun, kɛ ɣöö ci ciaŋ kuäärä nhial thia̱k.”
Ciöt Yecu kɛ jaak tin nhiam
(Mak 1:16-20, Luk 5:1-11)
18Kä mëë jäl Yecu gekä baar Gɛ̈-lɛ-li, cuɛ gaat wutdä da̱ŋ rɛw nɛn, Thay-mɔn min cɔal i̱ Pi-tɔr, kɛnɛ däman ni An-dɛ-röw, yuɔrkɛ cambak rɛy baar, kɛ ɣöö kɛ dëëp rɛc. 19Kä cuɛ kɛ jiök i̱, “Bia, guɔ̱ɔ̱rɛ ɣä, kä bä yɛ jakä dëëp nath.” 20Nikä kɛɛl cukɛ cambaknikiɛn ba̱ny piny, kä cukɛ jɛ guɔ̱ɔ̱r. 21Kä min wä Yecu kɛ thɔ̱a̱ŋ ɛ mɔ, cuɛ gaat wutdä da̱ŋ rɛw kɔ̱kiɛn nɛn, Je-mɛth, kɛnɛ däman ni Jɔ̱ɔ̱n gaat Dhɛ-ba-dii. Kä tekɛ rɛy ria̱a̱y kɛɛl kɛ gua̱ndiɛn ni Dhɛ-ba-dii, kɔackɛ cambaknikiɛn, kä cuɛ kɛ cɔl. 22Nikä kɛɛl cukɛ riey kɛnɛ gua̱ndiɛn ba̱ny piny, cukɛ jɛ guɔ̱ɔ̱r.
Ŋi̱i̱c Yecu kɛnɛ jakdɛ kɛ naath kä gɔw
(Luk 6:17-19)
23Kä cu Yecu ja̱l rɛy Gɛ̈-lɛ-li kɛɛliw, ŋi̱i̱cɛ naath gua̱thni palädiɛn, kä latdɛ thuk kuäärä Kuɔth ti gɔw, kä jakɛ jua̱th diaal kä gɔw, kä woocɛ liaw pua̱nyni nath. 24Kä cu kɛ̈kdɛ räth rɛy Thi-ri-ya kɛɛliw, kä cukɛ jɛ nöŋ ji̱ jua̱thni diaal tin tekɛ liaw ti gööl kɛnɛ bɛc pua̱ny, kɛ kuth ti jiäk, kɛ nok, amäni nɛy ti cɛ nuäŋ, kä cuɛ kɛ jakä gɔw. 25Kä cu buɔ̱n nath mi di̱t jɛ guɔ̱ɔ̱r kä Gɛ̈-lɛ-li kɛ Dɛ-ka-po-lith#4:25 Jɛn lotdɛ ni ɣöö wi̱i̱ da̱ŋ wäl. kɛnɛ Jɛ-ru-tha-lɛm kɛ Ju-dia, amäni ji̱ kuec kiɛɛr Jɔr-dɛn.
Nuer Bible © Bible Society in South Sudan 1998,2012.